CJPનું આંદોલન પૂરું થયા બાદ જંતર મંતર પર Gen-Z ફરી મેદાને, જાણો આ વખતે શું છે માગ?

Student Detention Protest: કેન્દ્રીય શિક્ષણ મંત્રીના રાજીનામા બાદ કોકરોચ જનતા પાર્ટી (CJP)એ જંતર-મંતર પરથી પોતાનો પ્રોટેસ્ટ પૂરો કર્યો હતો. પરંતુ, આ મુદ્દો ફરી એકવાર ગરમાવા લાગ્યો છે. CJPના આ પ્રોટેસ્ટમાં મુખ્ય લડાઈ લડનારા Gen Z યુવાઓ ફરી એકવાર જંતર-મંતર પહોંચી ગયા છે. તેમના હાથમાં બેનર છે અને તેઓ સૂત્રોચ્ચાર કરી રહ્યા છે. પરંતુ સૌથી મોટો સવાલ એ છે કે આખરે આ યુવાનો હવે શા માટે ધરણા પ્રદર્શન કરી રહ્યા છે, તેમની મુખ્ય માગણીઓ શું છે અને આ વિરોધ પાછળ કોણ છે?

જંતર-મંતર પર વિરોધ પ્રદર્શન કરનાર કોણ છે અને તેમની માગણીઓ શું છે?

સૌથી પહેલા એ જાણવું જરૂરી છે કે જંતર-મંતર પર ધરણા કરવા પહોંચેલા વિદ્યાર્થીઓ સીધી રીતે કોકરોચ જનતા પાર્ટી સાથે જોડાયેલા નથી. અહીં પ્રદર્શન કરી રહેલા યુવાનો 'દિશા વિદ્યાર્થી સંગઠન'ના છે. જોકે, CJPના નેતૃત્વમાં થયેલા અગાઉના પ્રોટેસ્ટમાં પણ આ સંગઠનના યુવાનો સામેલ હતા. આ વિદ્યાર્થીઓની મુખ્ય માગણી એ છે કે જે વિદ્યાર્થીઓને કસ્ટડીમાં લેવામાં આવ્યા છે, તેમને તાત્કાલિક મુક્ત કરવામાં આવે. આ સિવાય કોર્ટે પણ નિર્દેશ આપ્યો છે કે જે વિદ્યાર્થીઓનો ડેટા એકત્ર કરવામાં આવ્યો છે, તે રેકોર્ડને સિસ્ટમમાંથી હટાવવામાં આવે.

સરકારની કાર્યવાહી સામે વિદ્યાર્થીઓનો આક્રોશ

પ્રોટેસ્ટમાં સામેલ એક વિદ્યાર્થીનીએ પીટીઆઈ સાથે વાતચીત કરતા જણાવ્યું હતું કે, 'અમે 36 દિવસ સુધી અહીં ટકી રહ્યા હતા. સરકારનું વલણ એવું છે કે પહેલા વિદ્યાર્થીઓ પર લાઠીચાર્જ કરવામાં આવે છે, ત્યારબાદ રાજીનામું આપવામાં આવે છે અને પછી ફરી અમારી વિરુદ્ધ જ કાર્યવાહી કરવામાં આવે છે. દેશના અલગ-અલગ ભાગો જેવા કે બિહાર, અસમ, બંગાળ અને મુંબઈના વિદ્યાર્થીઓ આજે એકસાથે ઊભા છે. સરકારના આકરા વલણ બાદ હવે દેશનો ખૂણે-ખૂણો જંતર-મંતર બની ગયો છે. વિદ્યાર્થીઓ માત્ર એટલું જ ઈચ્છે છે કે અટકાયત કરાયેલા યુવાનોને છોડવામાં આવે અને તેમનો એકત્ર કરાયેલો ડેટા રેકોર્ડમાંથી દૂર કરવામાં આવે.

જંતર-મંતર પર જોરદાર સૂત્રોચ્ચાર અને CJPની ચેતવણી

જંતર-મંતર પર એકઠા થયેલા વિદ્યાર્થીઓ સરકાર સામે ભારે આક્રોશ વ્યક્ત કરતા જોવા મળ્યા હતા. વિદ્યાર્થીઓએ 'વિદ્યાર્થીઓની ધરપકડ બંધ કરો', 'ડરાવવાનું અને ધમકાવવાનું બંધ કરો' અને 'એફઆઈઆર બંધ કરો' જેવા તીવ્ર સૂત્રોચ્ચાર કર્યા હતા. બીજી તરફ, CJPએ પણ અસમ, બિહાર, પશ્ચિમ બંગાળ અને દિલ્હી સહિતના રાજ્યોમાં પ્રદર્શનકારીઓ સામે થયેલી પોલીસ કાર્યવાહી સામે વિરોધ નોંધાવ્યો છે.

CJPના રાષ્ટ્રીય પ્રવક્તા આશુતોષ રાંકાએ સોશિયલ મીડિયા પર પોસ્ટ કરીને કેન્દ્રીય મંત્રીઓનું ધ્યાન દોર્યું હતું કે પ્રદર્શનકારીઓ સામે કાર્યવાહી ન કરવાના આશ્વાસનનો ભંગ થઈ રહ્યો છે. જો સરકારે પોતાનું વચન ન પાળ્યું, તો પાર્ટી ફરીથી આંદોલન કરવા માટે મજબૂર બનશે.