શિર્ડી સાઈ બાબા મંદિરમાં વીઆઈપી દર્શન ફી ૨૦૦થી વધીને ૩૦૦

વીઆઈપી દર્શનમાં પણ મોંઘવારી

્વીઆઈપી  દર્શન તથા ઝટપટ દર્શનની ફી સમાન હોવાથી ભક્તોને અન્યાય થતો હતો

મુંબઈ -  દરરોજ હજારો ભક્તોૅના વણથંભ્યા પ્રવાહથી ધમધમતા અને કરોડોની દાનની આવક ધરાવતા શિર્ડી સાઈબાબા મંદિરમાં વીઆઇપી ભક્તો માટે બ્રેક દર્શન સુવિધાની ફી ૨૦૦થી વધારીને ૩૦૦ રૃપિયા કરી છે. આને કારણે સશુલ્ક દર્શન કરતા સર્વસામાન્ય ભાવિકોને અન્યાય દૂર થયો છે.

અત્યાર  સુધી શિર્ડી સાઈબાબા સંસ્થાન તરફથી સવારે, બપોરે અને રાત્રે જનસંપર્ક કાર્યાલય મારફત ૨૦૦ રૃપિયામાં વીઆઇપી બ્રેક દર્શનની સુવિધા આપવામાં આવતી હતી. બીજી તરફ સર્વસામાન્ય ભક્તો ઝટપટ દર્શન માટે ૨૦૦ રૃપિયાની ફી ચૂકવીને ગેટ નંબર ૬ અને ૭માંથી પ્રવેશતા હતા. પરંતુ આમાં એવું થથું હતું કે ઝટપટ દર્શન માટેની લાઇન આગળ જઈને ભક્તોની કોમન લાઇનમાં ભળી જતી હતી. પરિણામે ૨૦૦ રૃપિયા ચૂકવીને હેરાનગતી સહન કરવી પડતી હતી. જ્યારે ૨૦૦ રૃપિયામાં પ્રોટોકોલ ધારકોને વીઆઇપી બ્રેક દર્શનની સુવિધા મળતી હતી. આ તફાવત દૂર કરવા માટે વીઆઇપી પાસના દરમાં આજથી ૧૦૦ રૃપિયાનો વધારો કરવામાં આવ્યો છે.

હવે  સશુલ્ક દર્શન માટે ૨૦૦ રૃપિયાની ફી ભરતા સર્વસામાન્ય દર્શનાર્થીઓને પૈસા ચૂકવ્યા પછી પણ ઘણીવાર ઝટપટ દર્શનનો લાભ નથી મળતો આ તકલીફ દૂર કરવા માટે સ્વતંત્ર લાઇનની વ્યવસ્થા કરવાની મંદિર પ્રશાસનને ભાવિકો તરફથી અપીલ કરવામાં આવી હતી.

૨૨મી જૂન ૨૦૨૫થી ૩૦ જૂન ૨૦૨૬ દરમિયાન ૧.૫૮ લાખ ભાવિકોએ બ્રેક દર્શનનો લાભ લીધો હતો, જેનાંથી સાઈ સંસ્થાનને ૩.૧૭ કરોડની આવક થઈ હતી. આ જ સમયગાળામાં ૩૦ લાખ ભાવિકોએ સશુલ્ક દર્શનનો લાભ લીધો હતો.