પુણે પોલીસ દ્વારા અપહરણ, લૂંંટ, કસ્ટડીમાંં ત્રાસ અપાયાનો બે મહિલા વકીલનો આરોપ

બિલ્ડર સામેના કેસને રફેદફે કરવા દરોડાનો આરોપ

 સીબીઆઈ તપાસની માગ કરતી અરજી પર હાઈકોર્ટે નોટિસ જારી કરી

મુંબઈ -  પુણે  પોલીસના વરિષ્ઠ અધિકારીઓ દ્વારા મધ્યરાત્રિએ અપહરણ, હુમલો, લૂંટ અને કસ્ટડીમાં ત્રાસ આપવાનો આરોપ લગાવતી બે મહિલા વકીલો દ્વારા દાખલ કરવામાં આવેલી રિટ અરજી પર બોમ્બે હાઈકોર્ટે બુધવારે નોટિસ જારી કરી છે.

આ અરજી એડવોકેટ કીત આહુજા અને કનિકા આહુજા દ્વારા દાખલ કરવામાં આવી છે. તેમણે પોલીસના કથિત દુષ્કર્મની સ્વતંત્ર ન્યાયિક તપાસ અથવા સેન્ટ્રલ બ્યુરો ઓફ ઇન્વેસ્ટિગેશન (સીબીઆઈ) દ્વારા તપાસની માંગ કરી છે.

 આ અરજીમાં મહારાષ્ટ્ર રાજ્ય અને સીબીઆઈ ઉપરાંત, પુણે પોલીસ કમિશનર અમિતેશ કુમાર અને એડિશનલ કમિશનર તેજસ્વી સાતપુતે સહિત વરિષ્ઠ પોલીસ અધિકારીઓનો પણ સમાવેશ થાય છે.

ન્યાયાધીશ સારંગ વી કોટવાલ અને રણજીતસિંહ આર ભોંસલેની બેન્ચે પ્રતિવાદીઓને નોટિસ જારી કરી અને કેસની સુનાવણી બે અઠવાડિયા પછી મુલતવી રાખી છે.

અરજી મુજબ, ૧૭ જૂન, ૨૦૨૬ ના રોજ સવારે ૧.૪૦ વાગ્યે લગભગ ૨૦૦ પોલીસ કર્મચારીઓએ પુણેમાં કીત આહુજાના રહેણાંક પરિસરમાં બળજબરીથી ધસી આવ્યા હતા. અરજદારોએ જણાવ્યું હતું કે પોલીસ દળ ગેસ કટર અને લાકડીઓથી સજ્જ ખાનગી એસયુવી અને પોલીસ વાનમાં આવ્યું હતું. મોટાભાગના કર્મચારીઓ કથિત રીતે સિવિલ વસ્ત્રો પહેરેલા હતા અને તેમના પર નામ પ્લેટો નહોતી. અરજીમાં આરોપ મૂકવામાં આવ્યો છે કે મહેમાનો, ભાડૂઆતો, એક વૃદ્ધ મહિલા અને એક શિશુ સહિત ૨૪ રહેવાસીઓને સર્ચ વોરંટ વિના ગેરકાયદે અટકાયતમાં લેવામાં આવ્યા હતા.

કનિકા આહુજાએ આરોપ લગાવ્યો હતો કે પુરુષ અધિકારીઓએ તેમના પર શારીરિક હુમલો કર્યોે હતો, તેમના કપડાં ફાડી નાખ્યા હતા અને તેમની છાતી અને પીઠ પર ઇજાઓ પહોંચાડી હતી. વકીલોએ દાવો કર્યો હતો કે આ દરોડા અગ્રણી રિયલ એસ્ટેટ ડેવલપર્સ સામે ચાલી રહેલા કરોડો રૃપિયાના સિવિલ કેસને  રફેદફે કરવા માટે પાડવામાં આવ્યા હતા. તેમણે આરોપ લગાવ્યો હતો કે પોલીસે વીજળીના તાર કાપી નાખ્યા હતા, સીસીટીવી બંધ કરી દીધા હતા અને કિંમતી વસ્તુઓ, રોકડ અને મૂળ કાનૂની કેસ ફાઇલો લૂંટી લીધી હતી.

વધુમાં, વકીલોએ પોલીસ રેકોર્ડમાં ગંભીર વિસંગતતાઓ તરફ ધ્યાન દોર્યું. પોલીસે દાવો કર્યો હતો કે તેમની કાર્યવાહી પ્રથમ માહિતી અહેવાલ (એફઆઈઆર) ને અનુસરીને કરવામાં આવી હતી. જોકે, સ્ટેશન રેકોર્ડ્સ દર્શાવે છે કે કથિત એફઆઈઆર તેમની પ્રારંભિક અટકાયતના કલાકો પછી, સવારે ૪.૧૨ વાગ્યે જ નોંધવામાં આવી હતી. 

વકીલોએ એવો પણ દાવો કર્યો હતો કે મહારાષ્ટ્ર ડીજીપીને કરેલી તેમની વહીવટી ફરિયાદને આરોપી અધિકારીઓને બેદરકારીથી પાછી મોકલી દેવામાં આવી હતી.

આને ધ્યાનમાં રાખીને, અરજીમાં હાઇકોર્ટના વર્તમાન અથવા નિવૃત્ત ન્યાયાધીશ દ્વારા ન્યાયિક તપાસ કરાવવા અને ભૂલ કરનારા અધિકારીઓ સામે ફોજદારી કાર્યવાહી કરવાની માંગ કરવામાં આવી છે.