મુદત પૂર્વે મુક્તિની અબુ સાલેમની અરજી પર સુપ્રીમનો ચુકાદો અનામત

૯૩ વિસ્ફોટો કેસમાં  અબુ સાલેેમ સજા ભોગવી રહ્યો છે

૨૦૨૪ની ૨૪મી ડિસેમ્બરે પોતાને પચ્ચીસ વર્ષની સજા પૂર્ણ થઈ ચૂકી હોવાથી મુક્ત કરી દેવાની અબુ સાલેમની માગણી

મુંબઈ -   સુપ્રીમ કોર્ટે સોમવારે ગેંગસ્ટર અને ૧૯૯૩ના મુંબઈ વિસ્ફોટોના દોષિત અબુ સાલેમની જેલમાં મળેલી માફી અને અન્ડરટ્રાયલ તરીકે કસ્ટડીમાં વિતાવેલા સમયગાળાને ભારતની પોર્ટુગલ પ્રત્યાર્પણ ખાતરી હેઠળ પચ્ચીસ વર્ષની કેદની મર્યાદામાં ગણવા જોઈએ કે કેમ તે અંગે દલીલો સાંભળ્યા પછી તેની મુદત પૂર્વેની મુક્તિની અરજી પર પોતાનો ચુકાદો અનામત રાખ્યો હતો.

 અબુના  વકીલે દલીલ કરી છે કે  પ્રત્યાર્પણની શરતો હેઠળ  સાલેમે ૨૪ ડિસેમ્બર, ૨૦૨૪ ના રોજ  પચ્ચીસ વર્ષની જેલની સજા પૂર્ણ કરી છે. ખાસ ટાડા કોર્ટ દ્વારા જારી કરાયેલ ચોક્કસ નિર્દેશ છતાં જેલ સત્તાવાળાઓએ કસ્ટડીમાં વિતાવેલા સમયને અંડરટ્રાયલ તરીકે ગણ્યો નથી.

ન્યાયાધીશ વિક્રમનાથ અને ન્યાયાધીશ સંદીપ મહેતાની બનેલી બેન્ચે ે પોતાનો આદેશ અનામત રાખ્યો હતો અને પક્ષકારોને એક અઠવાડિયાની અંદર લેખિત રજૂઆતો અને સહાયક ચુકાદાઓ દાખલ કરવાની મંજૂરી આપી હતી.

૧૯૯૩ના મુંબઈ શ્રેણીબદ્ધ વિસ્ફોટ કેસમાં દોષિત ઠેરવવામાં આવ્યા બાદ અબુ સાલેમ આજીવન કેદની સજા ભોગવી રહ્યો છે અને નાસિક રોડ સેન્ટ્રલ જેલમાં બંધ છે.

આ ઉપરાંત, સીબીઆઈએ ખાસ ટાડા કોર્ટને જણાવ્યું છે કે સાલેમે તેની કેદની સજા પર લાગુ  પચ્ચીસ  વર્ષની મુદત પૂરી થાય તે પહેલાં દોષિત ઠેરવવામાં અગાઉના બે ચુકાદામાં દંડની ચુકવણી કરવી પડશે.

તપાસ એજન્સીએ જણાવ્યું હતું કે સાલેમે નિર્ધારિત સમયગાળો પૂર્ણ થાય તે પહેલાં કોર્ટ રજિસ્ટ્રીમાં કુલ ૧૬.૫૧ લાખ રૃપિયાનો દંડ જમા કરાવવો પડશે. સીબીઆઈના જણાવ્યા અનુસાર, ૧૨ ઓક્ટોબર, ૨૦૩૦ સુધીમાં રકમ ચૂકવવામાં નિષ્ફળતાથી સાલેમને કોર્ટ દ્વારા નિર્ધારિત વૈકલ્પિક ડિફોલ્ટ સજા ભોગવવી પડશે.

સાલેમે ખાસ ટાડા કોર્ટનો સંપર્ક કર્યો હતો અને સ્પષ્ટતા માંગી હતી કે શું તેને દંડ ભરવાની જરૃર છે કે વધારાની સજા ભોગવવી પડશે.

મુખ્ય તપાસ એજન્સીએ જણાવ્યું હતું કે દંડ વૈકલ્પિક નથી અને કોર્ટ સાલેમને નિર્ધારિત પ્રક્રિયા અનુસાર રકમ જમા કરાવવાનો નિર્દેશ આપી શકે છે.