સિયા ગોયલ અને ચેતન ચૌધરી જેલમાં ધકેલાયાં

વધુ પોલીસ રિમાન્ડ આપવા કોર્ટનો ઈનકાર

 પોલીસે મોબાઈલ ડેટા ઉકેલવા  માટે વધુ ૩ દિવસના રિમાન્ડ માગ્યા હતા

મુંબઈ -  પુણેની એક કોર્ટે શુક્રવારે ૨૫ વર્ષીય પુણેના રિયલ્ટર કેતન અગ્રવાલની હત્યાના કેસમાં સિયા ગોયલ અને તેના કથિત પ્રેમી ચેતન ચૌધરીને ૧૪ દિવસની ન્યાયિક કસ્ટડીમાં મોકલી દીધા છે.

ગોયલ (૨૦) અને ચૌધરી (૨૨) પર ૧૮ જૂનના રોજ પુણે જિલ્લાના લોહાગઢ કિલ્લામાં અગ્રવાલને ખડક પરથી ધક્કો મારીને મોતને ઘાટ ઉતારવાનો આરોપ છે. અગ્રવાલ અને ગોયલ આ વર્ષે નવેમ્બરમાં લગ્ન કરવાના હતા.

પોલીસ કસ્ટડી પૂરી થયા બાદ બંને આરોપીઓને જ્યુડિશિયલ મેજિસ્ટ્રેટ ફર્સ્ટ ક્લાસ એએમ વિભૂતે સમક્ષ રજૂ કરવામાં આવ્યા હતા.

ફરિયાદ પક્ષે પોલીસ કસ્ટડી ત્રણ દિવસ લંબાવવાની માંગ કરી હતી, અને દલીલ કરી હતી કે ગોયલ અને ચૌધરીના મોબાઇલ ફોનમાંથી મળેલા ડેટામાં સંકેતો અને કોડેડ ભાષામાં ચેટ છે, અને વાતચીતને સમજવા માટે તેમની કસ્ટોડિયલ પૂછપરછ જરૃરી છે.

ગોયલ અને ચૌધરીના વકીલે અરજીનો વિરોધ કરીને દલીલ કરી કે પોલીસને કેસની તપાસ માટે પૂરતો સમય આપવામાં આવ્યો છે અને વધુ કસ્ટડીમાં પૂછપરછ ગેરવાજબી છે.

બંને પક્ષોને સાંભળ્યા બાદ, કોર્ટે ફરિયાદ પક્ષની અરજી ફગાવી દીધી અને આરોપીને ૧૬ જુલાઈ સુધી ન્યાયિક કસ્ટડીમાં મોકલ્યા હતા.