સુરક્ષા દળે સાડાદસ કરોડની રેલવે ટિકિટો જપ્ત કરી

સે.રે.માં ટિકિટના કાળા બજારના જંગી કૌભાંડનો પર્દાફાશ

સાત  રેલવે કર્મચારી સહિત અનેક એજન્ટોને સાડાચાર વર્ષ દરમ્યાન ઝડપી લેવામાં આવ્યા

મુંબઇ  -  રેલવે ટિકિટોના થતા કાળાબજારને નાથવા માટે આરપીએફ (રેલવે પ્રોટેક્શન ફોર્સ) દ્વારા છેલ્લાં સાડાચાર વર્ષ સુધી ચલાવવામાં આવેલી ઝુંબેશ દરમ્યાન સાડાદસ કરોડ રૃપિયાની રેલવે ટિકિટો જપ્ત કરવામાં આવી હોવાનું  સેન્ટ્રલ રેલવે તરફથી જણાવાયું હતું.

રેલવે ટિકિટોના કાળાબજારના કૌભાંડમાં સંડોવાયેલા સાત રેલવે કર્મચારી તેમ જ અનેક અનધિકૃત (ટાઉટ) અને કેટલાક અધિકૃત એજન્ટોની અટકાયત કરવામાં આવી હતી.

આરટીઆઇ કાર્યકર અનિલ ગલગલી તરફથી માહિતી અધિકાર કાનૂન હેઠળ દરાખલ કરવામાં આવેલી અરજીને પગલે મધ્ય રેલવે તરફથી આ માહિતી આપવામાં આવી હતી. સેન્ટ્રલ રેલવેના મુખ્ય  સુરક્ષા કમિશનર હેમંત કુમારે જણાવ્યું હતું કે સાડાચાર વર્ષમાં ટિકિટના કાળાબજાર અને દલાલીના ૧,૬૭૬ કેસ નોંધાયા હતા. ગુના નોંધીને આરપીએફ દ્વારા ૧૦.૫૦ કરોડથી વધુ કિંમતની ઇ-ટિકિટ અને કેન્સલ કરવામાં આવેલી ટિકિટો જપ્ત કરવામાં આવી હતી.