પાર્થ પવારને ૧૮૦૦ કરોડની જમીન ૩૦૦ કરોડમાં વેચવાનું સેલ ડીડ રદ

વેચાણખત શરુઆતથી જ રદ થવાને પાત્ર હતું ઃ કોર્ટ

બોટનિકલ સર્વેની જમીનનો બારોબાર સોદો થયો હતો પરંતુ કબજો સોંપાયો ન હતો, ૨૧ કરોડની સ્ટેમ્પ ડયૂટી પણ માફ કરાઈ હતી

મુંબઈ - નાયબ મુખ્યમંત્રી સુનેત્રા પવારના પુત્ર પાર્થ પવારને ૧૮૦૦ કરોડની સરકારી જમીન ૩૦૦ કરોડમાં વેચી દેવાના વિવાદમાં હવે અદાલતે આ જમીન સોદાનું સેલ ડીડ જ રદબાતલ જાહેર કર્યું છે.  પાર્થ પવારની બહુમતી ભાગીદારી ધરાવતી કંપની અમાડિયા એન્ટરપ્રાઈઝિસ સાથે આ જમીન સોદો કરનારી આરોપી શીતલ તેજવાણીએ  કરેલી અરજી સંદર્ભમાં એક સિવિલ કોર્ટ દ્વારા આ સેલ ડીડ રદ કરવાનો આદેશ અપાયો હતો.

સંયુક્ત સિવિલ જજ એન.આર. ગજભીયેના આદેશમાં જણાવાયું છે કે, જો કાયદા હેઠળ પરવાનગી હોય તો, પક્ષકારો મહારાષ્ટ્ર સ્ટેમ્પ એક્ટની કલમ ૪૭ અને ૪૮ હેઠળ સ્ટેમ્પ ડયુટીના રિફંડ માટે સક્ષમ અધિકારીનો સંપર્ક કરી શકશે.

તેજવાણીએ મૂળ જમીનમાલિકોના પાવર-ઓફ-એટર્ની ધારક તરીકે, વેચાણ દસ્તાવેજ રદ કરવાની માંગણી સાથે કોર્ટમાં અરજી કરી હતી.

કોર્ટે જાહેર કર્યું કે ૨૦ મે, ૨૦૨૫ ના રોજ અમાડિયા એન્ટરપ્રાઇઝિસ એલએલપીના નામે રૃ. ૩૦૦ કરોડના મૂલ્યમાં કરવામાં આવેલો રજિસ્ટર્ડ વેચાણ દસ્તાવેજ શરૃઆતથી જ રદબાતલ, શરૃઆતથી જ નિષ્ક્રિય અને કોઈ કાનૂની અસર ધરાવતો નથી.કોર્ટે સબ-રજિસ્ટ્રાર ઓફ એશ્યોેરન્સ, હવેલી-૪, પુણેને નોંધણી રેકોર્ડ અને ઇન્ડેક્સ-ટુ માં જરૃરી એન્ટ્રીઓ કરવાનો નિર્દેશ આપ્યો હતો.તેણે એ પણ જાહેર કર્યું કે રદ થયા પછી અમાડિયા એન્ટરપ્રાઇઝિસ એલએલપીનો મિલકતમાં કોઈ અધિકાર, ટાઇટલ કે રસ રહેશે નહીં.કોર્ટે નોંધ્યું કે પ્રતિવાદીએ વેચાણ દસ્તાવેજ થયો હોવાનું તેમ જ વેચાણની રકમ ચૂકવવામાં આવી ન હતી તે હકીકત સ્વીકારી હતી. તેણે એ પણ નોંધ્યું હતું કે જમીનનો ભૌતિક કબજો ક્યારેય સોંપવામાં આવ્યો ન હતો.

આ વેચાણ દસ્તાવેજ કંપની વતી અમાડિયા એન્ટરપ્રાઇઝિસ એલએલપીના સહ-ભાગીદાર દિગ્વિજય પાટીલ દ્વારા કરવામાં આવ્યો હતો.

 શીતલ તેજવાણીએ પુણેના મુખ્ય મુંઢવા વિસ્તારમાં ૪૦ એકર જમીનનો પ્લોટ અમાડિયા એન્ટરપ્રાઇઝિસ એલએલપીને ૩૦૦ કરોડ રૃપિયામાં વેચી દીધો હોવાનો આરોપ છે. નોંધણી દરમિયાન ૨૧ કરોડ રૃપિયાની સ્ટેમ્પ ડયુટી માફ કરવામાં આવી હોવાનું પ્રકાશમાં આવ્યા બાદ આ સોદો શંકાના ઘેરામાં આવ્યો હતો. પાછળથી એવું બહાર આવ્યું કે જમીન સરકારની હતી અને બોટનિકલ સર્વે ઓફ ઇન્ડિયાને ભાડે આપવામાં આવી હતી, તેથી આ સમગ્ર વ્યવહાર ગેરકાયદે હતો.