રામાયણનું ટ્રેલરઃ લોકોને રામ અને સીતા કરતાં તો શુર્પણખા ગમી ગઈ

હનુમાન ગાયબ હોવાથી લોકોને અચરજ

રાવણ તરીકે યશનો ખોંખારો નબળો લાગ્યોઃ જોકે, વિઝ્યુઅલ ઈફેક્ટસનાં વખાણ                                                      

મુંબઇ -  'રામાયણ ભાગ એક'નું ટ્રેલર આખરે મોડે મોડે આજે વહેલી સવારે રજૂ થતાં જ તેના ઓનલાઇન રિવ્યુ શરૃ થઇ ગયા છે. આ રીવ્યુઝ અનુસાર રણબીર કપૂર રામને બદલે રણબીર કપૂર જ વધારે લાગે છે. જ્યારે સીતાના પાત્રમાં સાઇ પલ્લવી ફિક્કી પડી છે. નેટ યૂઝર્સએ તો સાઈ પલ્લવી  સાથે  બેકગ્રાઉન્ડમાં દેખાતી એક આર્ટિસ્ટ યુવતી  વધારે બ્યુટીફૂલ છે અને તેને સીતા બનાવવા જેવી હતી તેવો ચુકાદો પણ આપી દીધો હતો.

જ્યારે લંકેશ તરીકે રાવણના પાત્રમાં યશ છવાઇ જાય છે પણ તેનો અવાજ તેની ભૂમિકાની સરખામણીમાં નબળો લાગે છે. સૌથી મોટું અચરજ આ ટ્રેલરનું એ છે કે તેમાંથી હનુમાન યાને સની દેઓલ ગાયબ છે. રાવણને બાદ કરતાં રામ અને સીતાના સંવાદો લાગણીહીન લાગે છે. રકુલ પ્રીત સિંહ શૂર્પણખાના પાત્રમાં રીતસર ચમકે છે.  વાસ્તવમાં આજે અનેક નેટીઝન્સએ રકુલ પ્રીતના લૂકસની પ્રશંસા કરી હતી અને તેને બહેતર રોલ મળવો જોઈતો હતો એવી ડિમાન્ડ કરી હતી. ઐરાવત અને ઇન્દ્રની લડાઇના દિલધડક દૃશ્યો જોતાં દર્શકોના જીવ અદ્ધર થઇ જાય છે.

નેવુંના દાયકા પહેલાં ફિલ્મના ટ્રેલરમાં ફિલ્મનો સાર આવી જતો હતો પણ નેવુંના દાયકામાં ડર અને રાજા હિન્દુસ્તાની ફિલ્મના ટ્રેલરથી દર્શકોને લલચાવવાના હેતુથી ટ્રેલર બનાવવાનું શરૃ થયું પણ રામાયણના ચાર મિનિટ દસ સેકન્ડ લાંબા ટ્રેલરમાં ફિલ્મના સ્કેલનો અંદાજ આપવામાં ફિલ્મમેકર્સ સફળ થયા છે. રામાયણની કથા તો બધાં જાણે છે પણ તે કેવી રીતે કહેવાઇ છે તેના પર સઘળો દાવ છે.

દર્શકોને આશા છે કે ફિલ્મમાં ટ્રેલર કરતાં ઘણું વધારે જોવા મળશે. ટ્રેલર જોતાં એવું લાગે છે કે 'બાહુબલિ' બાદ પહેલીવાર વિરાટ સ્કેલ પર મહાકાવ્ય રજૂ થઇ રહ્યું છે. નવેમ્બરમાં દિવાળીના તહેવારમાં 'રામાયણ' ભાગ એક રજૂ થવા સાથે તેના નિર્માતા-નિર્દેશકની દર્શકોની નજરે અગ્નિ પરીક્ષા થશે એ નક્કી છે.