ડીપફેક અને એઆઈ જનરેટેડ કન્ટેન્ટ સામે પ્રીતિ ઝિન્ટાની હાઈકોર્ટમાં અરજી

મીડિયા કંપનીઓ સહિત અન્યો સામે આદેશોની માંગ

વાંધાજનક  કન્ટેન્ટ દૂર કરવા  તમામ પક્ષકારો કોમન પદ્ધતિ તૈયાર કરે પછી છઠ્ઠી જુલાઈએ આદેશ આપવા હાઈકોર્ટનો સંકેત

મુંબઈ - બોલીવુડ અભિનેત્રી પ્રીતિ ઝિન્ટાએ બોમ્બે હાઈકોર્ટમાં એઆઈ દ્વારા જનરેટેડ ડીપફેક છબીઓ અને તેને દર્શાવતી મોર્ફ કરેલી સામગ્રી સામે મનાઈ હુકમ માંગ્યો છે.

ન્યાયાધીશ માધવ જામદારે  ત્રીજી જુલાઈના રોજ સંકેત આપ્યો હતો કે વેબસાઇટ્સ પરથી વાંધાજનક સામગ્રી દૂર કરવા માટે પક્ષકારો એક પદ્ધતિ પર કામ કરશે તે પછી   છઠ્ઠી  જુલાઈ, સોમવારના રોજ આદેશ પસાર કરશે.

પોતાના દાવામાં, ઝિન્ટાએ ગુગલ અને મેટા, તેમ જ ડોમેન નામ રજિસ્ટ્રાર અને ઓળખાયેલા ઉલ્લંઘનકારો સહિત અનેક મધ્યસ્થીઓને પ્રતિવાદી બનાવ્યા છે. તેમના પ્લેટફોર્મ પર હોસ્ટ કરાયેલા એઆઈ-જનરેટેડ ડીપફેક્સ અને મોર્ફ્ડ વિઝયુઅલ્સ દ્વારા તેને દર્શાવતા વિડિઓઝ, છબીઓ અને ચેટબોટ-શૈલીની ક્રિયાપ્રતિક્રિયાઓ તરફ તેણે ધ્યાન દોર્યું છે.

ઝિન્ટાના વકીલે જાણીતી વેબસાઇટ્સ અને મધ્યસ્થીઓને દાવામાં પ્રકાશિત બધી ઉલ્લંઘન કરતી સામગ્રીને દૂર કરવા  માટે  તાત્કાલિક એકપક્ષીય આદેશો માટે આગ્રહ રાખ્યો હતો. તેમણે અજાણી કંપનીઓ કે વ્યક્તિઓ સામે જોન ડો નિર્દેશો અને ઝિન્ટા દર્શાવતી અનધિકૃત સામગ્રી પોસ્ટ કરવાથી તમામ ઉલ્લંઘન કરનારાઓને પ્રતિબંધિત કરવા માટે વ્યાપક પ્રતિબંધ આદેશની પણ માંગ કરી હતી.

ગુગલ અને મેટા વતી હાજર રહેલા વકીલોએ કોર્ટને જણાવ્યું હતું કે તેમને અરજદાર દ્વારા ઓળખાયેલી મોર્ફ કરેલી અથવા અશ્લીલ સામગ્રી ધરાવતી લિંક્સ કાઢી નાખવા સામે વાંધો નથી, પરંતુ વિનંતી કરી હતી કે ઉલ્લંઘન ન કરતી સામગ્રીનું સક્રિયપણે નિરીક્ષણ કરવા અથવા દૂર કરવા માટે કોઈ સંપૂર્ણ નિર્દેશ જારી ન કરવામાં આવે.

તેઓએ દલીલ કરી હતી કે કેટલાક ફ્લેગ કરેલા યુઆરએલ્સમાં આવી સામગ્રી નથી.

એક ડોમેન નામ રજિસ્ટ્રારે રજૂઆત કરી હતી કે તે ફક્ત ડોમેન નામો રજીસ્ટર કરે છે અને તે પોતે એવા  યુઆરએલ્સ પર કાર્ય કરી શકતું નથી જે સોશિયલ મીડિયા પ્લેટફોર્મ પર હોસ્ટ કરેલી સામગ્રી તરફ દોરી જાય છે. 

ન્યાયાધીશ જામદારે સ્વીકાર્યું કે કોઈપણ આદેશ કાયદેસર ઓનલાઈન સામગ્રીને ખલેલ પહોંચાડયા વિના વાંધાજનક સામગ્રીને લક્ષ્ય બનાવવા માટે લાગુ થવો જોઈએ.