મુંબઈના જીએસબી ગણપતિને ૭૦૩ કરોડનું વીમા કવચ

માટુંગાના ગણપતિનો ગયાં વર્ષે ૪૭૪ કરોડનો વીમો હતોે

ગણેશજીને ૬૬ કિલો સોનાના અને ૩૩૫ કિલો ચાંદીના આભૂષણોનો શણગાર

મુંબઈ - મુંબઈના સૌથી શ્રીમંત ગણપતિ તરીકે ઓળખાતા કિંગ્સ- સર્કલના જીએસબી ગણેશ સેવા મંડળના ગણેશજીને ૭૦૩.૨૭ કરોડ રૃપિયાનું વીમા કવચ આપવામાં આવ્યું છે. ગયા વર્ષે ૪૭૪ કરોડનો વીમો ઉતારવામાં આવ્યો હતો.

જીએસબી  (ગૌડ સારસ્વત બ્રાહ્મણ) સેવા મંડળના શાનદાર મંડપમાં બિરાજતા ગણેશજીની પ્રતિમાને ૬૬ કિલો સોનાના અને ૩૩૫  કિલો ચાંદીના આભૂષણોથી શણગારવામાં આવે છે. ઉપરાંત કિંમતી રત્નો અને માણેકથી સજાવવામાં આવે છે. એટલે જ કરોડોનો વીમો ઉતારવામાં આવે છે. આ વીમામાં ભક્તોની સુરક્ષાની બાબતોને આવરી લેવામાં આવે છે.

મુંબઈના સૌથી શ્રીમંત મંડળ તરીકે જાણીતા જીએસબી સેવા મંડળના સંયોજક ડો. ભુજંગ પૈએ જણાવ્યું હતું પાંચ દિવસની ગણેશોત્સવની ઉજવણી દરમ્યાન ભક્તોની સુરક્ષા, કિંમતી આભૂષણો તેમજ અન્ય મિલકતની સુરક્ષા માટે કરોડોનો વીમો ઉતારવામાં આવે છે. છેલ્લાં કેટલાય વર્ષો દરમ્યાન મહાગણપતિની પ્રતિમાને શણગારવા માટેના સોના- ચાંદીના દાગીના ભક્તજનો તેમજ સેવાદારો તરફથી દાનમાં આપવામાં આવ્યા છે. સોના- ચાંદીની કિંમતમાં જંગી વધારાને પગલે વીમાની રકમ પણ વધી ગઈ છે. જીએસબી ગણપતિ 'નવસાલા પાવનારા વિશ્વ ચા રાજા' એટલે કે ભક્તોની મનોકામના પૂરી કરતા વિશ્વના રાજા તરીકે ઓળખાય છે.