માથેરાનમાં પ્લાસ્ટિકના યુઝ-એન્ડ-થ્રો રેઇનકોટ પર પ્રતિબંધની ઐસી તૈસી

સ્થાનિક તંત્ર મૂકદર્શક બનીને બેસી રહ્યું

પહેલા જ વરસાદમાં કેટલાય ટુરિસ્ટો પ્લાસ્ટિકના આ પાતળા રેઇનકોટ પહેરી નીકળી પડયા

મુંબઇ - ઇકોસેન્ઝીટીવ ઝોનમાં આવેલા હિલ- સ્ટેશનમાં નગર- પરિષદ તરફથી પ્લાસ્ટિકના યુઝ-એન્ડ-થ્રો પાતળા રેઇનકોટ પર પ્રતિબંધ મૂકવામાં આવ્યો છે. પણ ગઇ કાલના પહેલાં જ વરસાદમાં નિયમની ઐસીતૈસી કરીને કેટલાય ટુરિસ્ટો વરસાદની મજા લેવા નીકળી પડયાં હતાં.

નિયમના  છડેચોક ઉલ્લંઘનને લીધે સાવ જ પાતળા પ્લાસ્ટિકના રેઇનકોટ પરનો પ્રતિબંધ શું ફક્ત કાગળ ઉપર જ રહ્યો છે? એવો સવાલ સ્થાનિક જાગૃત નાગરિકોએ કર્યો હતો.

ચોમાસામાં ઘણાં ટુરિસ્ટો વરસાદની મજા લેવા આવતા હોય છે. માથેરાનમાં રોકાય ત્યાં સુધી યુઝ-એન્ડ- થ્રો રેઇનકોટ પહેરીને નીકળી  પડે છે. ત્યારબાદ માથેરાનથી પાછા ફરતી વખતે રસ્તા પર કે  ઝાડી- ઝાંખરામાં કે પછી વૃક્ષો ઉપર આ રેઇનકોટ ફેંકીને ચાલ્યા જતા હોવાથી પર્યાવરણને પારાવાર નુકસાન થાય છે. બીજું સુંદર હરિયાળી પર લટકતા આ પ્લાસ્ટિકના રેઇનકોટનો દેખાવ પણ ખૂબ ખરાબ લાગે છે.

માથેરાન નગરપરિષદે ૧૩મી એપ્રિલ ૨૦૨૬માં યોજાયેલી મીટિંગમાં રેઇનકોટ પર પ્રતિબંધનો નિર્ણય લીધો હતો. આ  નિર્ણય ઉપર પર્યટન અને નિયોજન સમિતીએ મંજૂરીની મહોર મારી હતી. ઉપરાંત માથેરાનના વેપારીઓ સાથે બેઠક યોજીને નિર્ણયનો અમલબજવણીની તૈયારી પણ દેખાડવામાં આવી હતી. પરંતુ પહેલાં જ વરસાદમાં ટુરિસ્ટો તરફથી મોટા પ્રમાણમાં રેઇનકોટ વપરાતા હોવાનું નજરે પડયું હતું. આથી સ્થાનિક નાગરિકોએ એવો આક્ષેપ કર્યો હતો કે વેપારીઓ પર નગર- પરિષદનું  કોઇ નિયંત્રણ જ નથી.

પર્યટકો તરફથી ગમે ત્યાં ફેંકવામાં આવતા રેઇનકોટને લીધે કચરાનું સામ્રાજ્ય વધ્યું છે.