ડમ્પર, ટ્રક અથડાયાં બાદ તેમાં બસ વચ્ચે ઘૂસી ગઈઃ 6નાં મોત

મુંબઈ આગ્રા હાઈવે પર ધૂળે પાસે અનેક વાહનોનો અકસ્માત

બે વાહન અથડાતાં બચાવ કામગીરી માટે પહોંચેલા ટોલ બૂથના કર્મચારીનું પણ બસની અડફેટે મોતઃ ૨૬ લોકો ઘાયલ

મુંબઈ -        મુંબઈ -આગ્રા  હાઈવે પર ધુળે નજીક લળીગ  ઘાટ વિસ્તારમાં આજે વહેલી સવારે રેતીના ડમ્પર, ટ્રક અને ખાનગી ટ્રાવેલ બસ વચ્ચે થયેલા આ વિચિત્ર અકસ્માતમાં છ લોકોના ઘટનાસ્થળે જ મોત થયા. જ્યારે ૨૬  જેટલા મુસાફરો ગંભીર રીતે ઘાયલ થયા છે અને તેમની હોસ્પિટલમાં સારવાર ચાલી રહી છે.અકસ્માત વખતે  બચાવ કામગીરી કરી રહેલા ટોલ કર્મચારીનું પણ મોત  નીપજ્યું હતું.

    આ સંદર્ભે પ્રાપ્ત પ્રાથમિક માહિતી અનુસાર આજે વહેલી સવારે લળીગ ઘાટ પર રેતી ભરેલા ડમ્પર અને ટ્રક વચ્ચે સામસામે ટક્કર થઈ હતી. અકસ્માતની માહિતી મળતાં હાઇવે પેટ્રોલ ટીમ અને હાઇવે પરના ટોલ સ્ટાફ તાત્કાલિક મદદ માટે ઘટનાસ્થળે દોડી ગયા હતા. આ સ્ટાફ અકસ્માતગ્રસ્ત વાહનોમાંથી ઘાયલ મુસાફરોને બહાર કાઢવા માટે બચાવ કામગીરી કરી રહ્યા હતા.

    બચાવ કામગીરી ચાલી રહી હતી ત્યારે પાછળથી આવતી એક ઝડપી ખાનગી ટ્રાવેલ બસે કાબુ ગુમાવ્યો અને ઘટનાસ્થળે ટ્રક ટક્કર મારી હતી. આ અથડામણમાં  બસના કેબિનમાં બેઠેલા કેટલાક મુસાફરો અને ત્યાં મદદ કરી રહેલા ટોલ એટેન્ડન્ટને ગંભીર ઇજાઓ પહોંચી હતી.આ ભયાનક અકસ્માતમાં છ લોકોએ જીવ ગુમાવ્યા હતા.  સાથી કર્મચારીના  મૃત્યુને કારણે ઘટનાસ્થળે હાજર ટોલ એટેન્ડન્ટ ખૂબ જ આક્રમક બની ગયા હતા.

    અકસ્માતમાં ઘાયલ થયેલા ૨૬  લોકોને સ્થાનિક નાગરિકો અને પોલીસની મદદથી તાત્કાલિક ધુળેની  સરકારી હોસ્પિટલમાં દાખલ કરવામાં આવ્યા છે.એમાંથી કેટલાકની હાલત ગંભીર હોવાનું જાણવા મળ્યું  છે. આ બનાવથી  હાઇવે પર ટ્રાફિક થોડા સમય માટે સંપૂર્ણપણે ખોરવાઈ ગયો હતો.આ મામલે ધુળે પોલીસ દ્વારા વધુ તપાસ ચાલી રહી છે.