ડ્રગ્સ કારોબારનાં નાણાંથી ડોલાએ દુબઈમાં પ્રોપર્ટીઓ ખરીદી

ડ્રગ્સ વેપારની ૩૦  ટકા રકમ ડોલાને મળતી હતી

ડ્રગ્સમાંથી મળતાં નાણાંનો બહુ મોટો હિસ્સો ફરી કારોબાર વધારવા માટે જ વપરાતો હતોઃ ક્રાઈમ બ્રાન્ચની પૂછપરછમાં વિગતો ખુલી

મુંબઇ -  નાર્કોટિક્સ  કન્ટ્રોલ બ્યુરો (એનસીબી) દ્વારા ધરપકડ બાદ કુખ્યાત ડ્રગ ટ્રાફિકર સલીમ ડોલાને વધુ તપાસ માટે મુંબઇ ક્રાઇમ બ્રાન્ચને સોંપવામાં આવ્યો છે. ક્રાઇમ બ્રાન્ચના  વિવિધ એકમો દ્વારા પૂછપરછ દરમિયાન તપાસકર્મીઓએ ડ્રગ સિન્ડિકેટ સાથે જોડાયેલા નાણાકીય નેટવર્ક વિશે નવી વિગતો શોધી કાઢી હતી. પોલીસ સૂત્રો અનુસાર મુંબઇ ક્રાઇમ બ્રાન્ચના યુનિટ-૭એ સૌ પ્રથમ સાતારા ડ્રગ ફેકટરી કેસના સંદર્ભમાં  ડોલાની પૂછપરછ કરી હતી. ત્યાર બાદ ક્રાઇમ  બ્રાન્ચ યુનિટ-૨એ મૈસુર ડ્રગ ફેકટરી કેસમાં ૩૦ મે સુધી તેની પૂછપરછ કરી અને ડોલાને ન્યાયિક કસ્ટડીમાં મોકલી દેવામાં આવ્યો હતો. હવે ક્રાઇમ બ્રાન્ચ યુનિટ-૬ તેની વધુ તપાસ માટે કસ્ટડી લે તેવી સંભાવના છે.

પૂછપરછ દરમિયાન તપાસકર્તાઓને જાણવા મળ્યું હતું કે માદક દ્રવ્યોના વેચાણ અને હેરફેર દ્વારા ઉત્પન્ન થયેલા કાળા નાણાંનો આશરે ૩૦ ટકા હિસ્સો કથિત રીતે ડોલાને મોકલવામાં આવતો હતો. તપાસમાં વધુમાં જાણવા મળ્યું હતું કે ડોલાએ કથિત રીતે આ રકમનો એક ભાગ દુબઇમાં મિલકતો ખરીદવા માટે વાપર્યો હતો. જ્યારે ભંડોળનો એકભાગ ડ્રગ સિન્ડિકેટના સંચાલન અને વિસ્તરણમાં ફરીથી રોકવામાં  આવતો હતો.

એનસીબીના મુંબઇ ઝોનલ યુનિટે થોડા દિવસો પહેલા ૨૦૨૩ના હાઇ-પ્રોફાઇલ ડ્રગ ટ્રાફિકિંગના કેસમાં સંદર્ભમાં ડોલાની ધરપકડ કરી હતી. ભાગેડુ ગેંગસ્ટર દાઉદ ઇબ્રાહિમ સાથે જોડાયેલા કથિત ડ્રગ્સ નેટવર્કમાં તેને મુખ્ય ઓપરેટિવ માનવામાં આવતો હતો. ડોલાને મુંબઇ લાવવામાં આવે તે પહેલા ઔપચારિક રીતે ધરપકડ કરવા પહેલા તેને તુર્કીથી દિલ્હી લાવવામાં આવ્યો હતો.

તપાસકર્તાઓનું માનવું છે કે ડોલાની પૂછપરછથી કથિત આંતરરાષ્ટ્રીય ડ્રગ ટ્રાફિકિંગ નેટવર્કમાં વધારાની કડીઓ શોધવામાં અને આ કામગીરીમાં સામેલ અન્ય સહયોગીઓને ઓળખવામાં મદદ મળી શકે છે.