શું તમે ખુદને ભગવાન સમજો છો?: તુકારામ મુંઢેના FDA વિભાગ પર ભડકી બોમ્બે હાઇકોર્ટ

Bombay High Court Slams Maharashtra FDA : 21 ઓગસ્ટ 2026 ના રોજ મહારાષ્ટ્ર FDA દ્વારા મુંબઈ ક્રિકેટ એસોસિએશન (MCA) ના બાંદ્રા કુર્લા કોમ્પ્લેક્સ (BKC) પરિસરમાં આવેલા 5 ફૂડ આઉટલેટ્સના લાઈસન્સ સસ્પેન્ડ કરવામાં આવ્યા હતા. આ મામલે બોમ્બે હાઈકોર્ટના એક્ટિંગ ચીફ જસ્ટિસ રવીન્દ્ર વી ઘુગે અને જસ્ટિસ ગૌતમ એ અંખાડની ખંડપીઠે FDA ની ઝાટકણી કાઢી હતી. કોર્ટના આદેશ બાદ કરવામાં આવેલી નવી તપાસમાં તમામ 5 આઉટલેટ્સ ક્વોલિટી ચેકમાં સફળ રહ્યા હતા, જેના પગલે FDA એ લાઈસન્સ સસ્પેન્શનનો આદેશ પરત ખેંચવાની કોર્ટ સમક્ષ ખાતરી આપી હતી.

ન્યાયાધીશોની તીખી ટિપ્પણી 'શું તમને લાગે છે કે તમે ભગવાન છો?'

હાઈકોર્ટે ફુડ સેફ્ટી એન્ડ સ્ટેન્ડર્ડ્સ (FSS) એક્ટ 2006 હેઠળ કાયદાકીય પ્રક્રિયાનો યોગ્ય પાલન કર્યા વિના ઉતાવળે આદેશો જારી કરવા બદલ અધિકારીઓ પ્રત્યે ભારે નારાજગી વ્યક્ત કરી હતી. ખંડપીઠે તીખી ટિપ્પણી કરતા કહ્યું કે, "મચ્છરને મારવા માટે તલવારનો ઉપયોગ કરશો નહીં. શું તમને લાગે છે કે તમે ભગવાન છો કે કંઈ પણ કરી શકો છો? સાફ-સફાઈ જાળવવી જરૂરી છે પરંતુ વહીવટી કાર્યવાહી સંતુલિત અને વાજબી હોવી જોઈએ." કોર્ટે ઉમેર્યું કે રેગ્યુલેટરી સિસ્ટમે સુધારાને પ્રોત્સાહન આપવું જોઈએ, નહીં કે તુરંત કામગીરી બંધ કરવા મજબૂર કરવું જોઈએ.

સિપ્લાના લાઈસન્સ રદ્દ કરવા પર પણ FDA ની ઝાટકણી

29 ઓગસ્ટના રોજ અન્ય એક કેસની સુનાવણી દરમિયાન પણ FDA ને હાઈકોર્ટની ફટકારનો સામનો કરવો પડ્યો હતો. FDA એ પુણેના વાડકી ખાતે આવેલી ફાર્માસ્યુટિકલ કંપની સિપ્લા (Cipla) ની ફેસિલિટીનું દવાનું લાઈસન્સ 27 ઓગસ્ટથી રદ કરી દીધું હતું. સિપ્લા વતી રજૂઆત કરતા સીનિયર વકીલ આબાદ પોંડાએ જણાવ્યું કે FDA એ 26 ઓગસ્ટના રોજ જાહેર રજાના દિવસે કંપનીને ઈમેઈલ મોકલીને સુનાવણી માટે હાજર રહેવા આદેશ આપ્યો હતો. કંપનીએ તારીખ આગળ વધારવા વિનંતી કરી હોવા છતાં સાંભળવાની તક આપ્યા વગર જ લાઈસન્સ રદ્દ કરવાનો એકતરફી આદેશ જારી કરી દેવાયો હતો.

કુદરતી ન્યાયના સિદ્ધાંતોનું ઉલ્લંઘન, FDA નિર્ણય પાછો ખેંચશે

બોમ્બે હાઈકોર્ટે FDA ની આ કાર્યવાહીને કુદરતી ન્યાયના સિદ્ધાંતો વિરુદ્ધ અને મનસ્વી ગણાવી હતી. કોર્ટે સવાલ કર્યો કે શું રજાના દિવસે કંપનીને ઈમેઈલ મોકલીને તે જ દિવસે જવાબ માગવો ન્યાયી પ્રક્રિયા છે? સિપ્લાના પ્રોડક્ટ્સની સેફ્ટી કે ગુણવત્તા સામે કોઈ પ્રશ્ન ન હોવા છતાં કરાયેલી આ મનમાની કાર્યવાહી બાદ FDA એ કોર્ટમાં સ્વીકાર્યું હતું કે તેઓ લાઈસન્સ રદ્દ કરવાનો આદેશ તુરંત પરત ખેંચી લેશે અને કંપનીને નવી શો-કોઝ નોટિસ આપ્યા બાદ જ નિયમાનુસાર આગળ વધશે.