VIDEO: બુલેટ ટ્રેન પ્રોજેક્ટ: 21 કિમી લાંબી અંડરગ્રાઉન્ડ ટનલ માટે મુંબઈ નજીક ઘણસોલી શાફ્ટમાં બીજા TBMનું કટરહેડ ઉતારાયું

Bullet Train Project Update: મુંબઈ-અમદાવાદ બુલેટ ટ્રેન પ્રોજેક્ટની કામગીરી ચાલી રહી છે, ત્યારે 21 કિલોમીટર લાંબી ટનલ માટે બીજી ટનલ બોરિંગ મશીન(TBM)નું કટરહેડ મુંબઈ નજીક સાવલી (ઘણસોલી) શાફ્ટ ખાતે ઉતારવામાં આવ્યું છે. જેમાં 13.6 મીટર વ્યાસ અને અંદાજે 350 ટન વજન ધરાવતો આ વિશાળ ઘટક TBMના મુખ્ય શીલ્ડની પ્રાથમિક એસેમ્બલીનો અંતિમ તબક્કો છે. આ બીજી TBM સાવલી (ઘણસોલી)થી પોતાની સફર શરૂ કરીને વિક્રોલી તરફ આગળ વધશે. પ્રથમ TBMનું કટરહેડ આ અઠવાડિયાની શરૂઆતમાં વિક્રોલી ખાતે ઉતારવામાં આવ્યું હતું. હવે બંને TBM અંતિમ એસેમ્બલી અને કમિશનિંગ ટ્રાયલમાંથી પસાર થશે, ત્યારબાદ જુલાઈ 2026ના પ્રથમ અઠવાડિયામાં તેમની પ્રારંભિક ડ્રાઈવ શરૂ કરવામાં આવશે.

ઇજનેરીનું અદભુત ઉદાહરણ

• 13.6 મીટર વ્યાસ ધરાવતું આ કટરહેડ એવી એકલ ટનલના ખોદકામ માટે ડિઝાઇન કરવામાં આવ્યું છે, જેમાં હાઈ-સ્પીડ કોરિડોરની અપ અને ડાઉન બંને લાઇન સમાવી શકાય

• આ યુનિટમાં 84 કટર ડિસ્ક, 124 સ્ક્રેપર અને 16 બકેટ લિપ્સ લગાવવામાં આવ્યા છે, જે ખોદકામ દરમિયાન પથ્થરો કાપવા અને કચરો દૂર કરવાની કામગીરી કાર્યક્ષમ રીતે કરે છે

TBM સંબંધિત વધારાની માહિતી

• TBM 1નું વજન : 3080 ટન

• TBM 2નું વજન : 3184 ટન

• કટરહેડનો વ્યાસ : 13.6 મીટર

• TBMનો પ્રકાર : મિક્સ શીલ્ડ / સ્લરી આધારિત

દરેક TBMની કુલ લંબાઈ 95.32 મીટર છે અને તેમાં કટર વ્હીલ, મેઇન બેરિંગ, જૉ ક્રશર, ઇરેક્ટર, મેઇન શીલ્ડ, ટેલ શીલ્ડ તેમજ ટનલિંગ કામગીરીને સહાયરૂપ બનતી ચાર વિશેષ ગેન્ટ્રી જેવા મહત્ત્વપૂર્ણ ઘટકોનો સમાવેશ થાય છે. આ મશીનો વધુમાં વધુ 4 RPM(રિવોલ્યુશન પ્રતિ મિનિટ)ની કટરહેડ ગતિ અને વધુમાં વધુ 49 મિ.મી. પ્રતિ મિનિટની ખોદકામ ક્ષમતા સાથે કાર્ય કરી શકે છે, જેના કારણે ઉચ્ચ સુરક્ષા ધોરણો જાળવી રાખતાં નિયંત્રિત અને સતત ટનલ નિર્માણ સુનિશ્ચિત થાય છે.