અમદાવાદના ઉમંગે કમ્બોડિયાના સાયબર ઠગોને એક હજાર સિમ મોકલ્યાં

નવી મુંબઈના ડિજિટલ એરેસ્ટ કેસમાં ઉમંગની વડોદરાથી ધરપકડ

ઈલેક્ટ્રિકલ એન્જિનિયર ઉમંગ લાકોડે મોકલેલાં સિમકાર્ડથી દેશભરના લોકો સાથે છેતરપિંડી થઈ ઃ ૩૪૭ સિમ સહિતની ચીજો જપ્ત

મુંબઈ -  નવી મુંબઈમાં પ્રકાશમાં આવેલાં દોઢ કરોડના ડિજિટલ સ્કેમમાં આંતરરાષ્ટ્રીય સાયબર ગુનેગારો સાથે  સાંઠગાંઠ બદલ મૂળ અમદાવાદના અમરાઈવાડીના રહીશ ૨૪ વર્ષીય એન્જિનિયર ઉમંગ વિજયભાઈ લાકોડની વડોદરાથી ધરપકડ કરાઈ હતી.   ઉમંગે આંતરરાષ્ટ્રીય સાઈબર ક્રાઈમમાં ઉપયોગ માટે એક હજારથી વધુ સિમ કાર્ડ એક્ટિવેટ  કરી કંબોડિયા મોકલ્યાં હતાં.

નવી મુંબઈના રહીશને ગત માર્ચમાં  એટીએસ  અધિકારીઓના સ્વાંગમાં ડિજિટલ એરેસ્ટના નામે ધમકાવીને ૧.૫૫ કરોડ રુપિયા પડાવી  લેવાયાની ફરિયાદ નોંધાઈ હતી.

    આ ગુનામાં ઉપયોગમાં લેવાયેલા વોટ્સએપ એકાઉન્ટ્સ, સિગ્નલ પ્રોફાઇલ્સ અને મોબાઇલ નંબરોના ટેકનિકલ વિશ્લેષણ બાદ નવી મુંબઈ પોલીસે ઉમંગની વડોદરાથી ધરપકડ કરી હતી    પોલીસે  તેની પાસેથી વિવિધ ટેલિકોમ કંપનીઓના  ૩૪૭ સિમ કાર્ડ પાઉચ, ત્રણ મોબાઇલ ફોન, બે ડેબિટ કાર્ડ, છ ચેકબુક, એક પાસબુક અને બે આધાર કાર્ડ જપ્ત કર્યા છે.    ઈલેક્ટ્રિકલ એન્જિનિયર ઉમંગે એક્ટિવેટ કરીને કમ્બોડિયાં મોકલેલાં સિમકાર્ડથી ભારતભરમાં અનેક લોકો સાથે સાયબર છેતરપિંડી થઈ હોવાની આશંકા છે. પોલીસ આ કામ માટે ઉમંગને કેટલાં નાણાં ચૂકવાયાં હતાં તે સહિતની બાબતોની તપાસ કરી રહી છે. આ કેસમાં હજુ વધુ ધરપકડો થવાની સંભાવના છે.