હાઈકોર્ટની ઝાટકણી બાદ એફડીએએ સિપ્લા ફાર્માનું લાયસન્સ રદ કરતો નિર્ણય પાછો ખેંચ્યો

 હદપાર કરીને વધુ આકરા  બનો છો ઃ હાઈકોર્ટ

રજાના દિવસે સુનાવણી માટે કંપનીને બોલાવતો ઈ-મેઈલ મોકલવા સામે પણ કોર્ટે પ્રશ્ન કર્યો

મુંબઈ -   મહારાષ્ટ્ર એફડીએએ શનિવારે સિપ્લા ફાર્મા એન્ડ લાઇફ સાયન્સ લિમિટેડના પુણે સ્થિત કેરી એન્ડ ફોરવડગ યુનિટના દવા વેચાણ લાઇસન્સ રદ કરવાના પોતાના આદેશને પાછો ખેંચી લીધો છે. બોમ્બે હાઇકોર્ટે નિયમનકારને હદપાર કરવા અને  વધુ કડક વર્તન કરવા બદલ ફટકાર લગાવી હતી.

કાર્યકારી મુખ્ય ન્યાયાધીશ રવિન્દ્ર ઘુગે અને ન્યાયાધીશ ગૌતમ અંકડની બેન્ચે જણાવ્યું હતું કે એફડીએએ  કુદરતી ન્યાયના સિદ્ધાંતો વિરુદ્ધ કાર્ય કર્યું છે.

એફડીએએ જણાવ્યું હતું કે તે લાઇસન્સ રદ કરવાનો આદેશ તાત્કાલિક પાછો ખેંચી લેશે અને કંપનીને નવી કારણ બતાવો નોટિસ જારી કરશે, જેના આધારે તર્કસંગત આદેશ પસાર કરવામાં આવશે.

ફૂડ એન્ડ ડ્રગ એડમિનિસ્ટ્રેશન (એફડીએ)એ ૨૭ ઓગસ્ટથી રિએક્ટિન પ્લસ ટેબ્લેટ્સના પેકેજિંગ, સ્ટોરેજ અને રિકોલ સંબંધિત ગંભીર અનિયમિતતાઓ માટે પુણેના વાડકી ખાતે સિપ્લા ફાર્મા એન્ડ લાઇફ સાયન્સ લિમિટેડના દવા વેચાણ લાઇસન્સ રદ કર્યા હતા.

શુક્રવારે સાંજે, સિપ્લા ફાર્મા અને લાઇફ સાયન્સિસે જણાવ્યું હતું કે તેણે કાર્યવાહીને પડકારી છે, પરંતુ સ્પષ્ટતા કરી હતી કે એફડીએના આદેશમાં તેના ઉત્પાદનોની સલામતી, ગુણવત્તા અથવા અસરકારકતા અંગે કોઈ ચિંતાનો આરોપ નથી, ન તો તે દર્દીની સલામતીના કોઈ મુદ્દાને સામેલ કરે છે અથવા સૂચવે છે.

  બેન્ચે પ્રશ્ન કર્યોે કે વિભાગે દવા કંપનીને શા માટે ઇમેઇલ મોકલ્યો, જેમાં તેને સુનાવણી માટે પ્રતિનિધિ મોકલવાનું કહેવામાં આવ્યું, ખાસ કરીને રાજ્ય સરકાર દ્વારા જાહેર કરાયેલી રજાના દિવસે.

 તમે (એફડીએ) પ્રશંસનીય અને પ્રશંસાપાત્ર કામ કરી રહ્યા છો, પરંતુ હવે તમે વધુ પડતું કરી રહ્યા છો. આ પહેલી વાર નથી બન્યું કે આવું થઈ રહ્યું છે. તમે અન્યાય કર્યોે છે, અને હવે તમારે આ મુદ્દાનો ઉકેલ લાવવો પડશે,એમ હાઈકોર્ટે કહ્યું.