ભારત અને ચીન વચ્ચે મિત્રતા ગાઢ બનશે
ભારત અને ચીન વચ્ચે મિત્રતા વધારવા માટે, ચીનના વિદેશ પ્રધાન વાંગ યીએ તાજેતરમાં વિદેશ પ્રધાન એસ. જયશંકર સાથે વાતચીત કરી હતી. ભારત-અમેરિકા સંબંધોમાં અસ્થિરતા વચ્ચે યોજાયેલી બંને ટોચના પ્રધાનોની બેઠકમાં વેપારના વિસ્તરણ પર ચર્ચા કરવામાં આવી હતી. જેમાં ખાસ કરીને ભારતમાં ખાતરો, દુર્લભ ખનિજો અને ટનલિંગ મશીનોની નિકાસને સરળ બનાવવા પર ધ્યાન કેન્દ્રિત કરવામાં આવ્યું હતું. આ ઉપરાંત, બંને દેશો વચ્ચે રોકાણ અને સામાન્ય લોકોની અવરજવરને સરળ બનાવવા અંગે પણ ચર્ચા કરવામાં આવી હતી. વર્ષ ૨૦૨૦માં ગલવાન ખીણમાં બંને પડોશી દેશોના સૈનિકો વચ્ચે થયેલી અથડામણ પછી, વેપારથી લઈને પર્યટન સુધીના દરેક ક્ષેત્રને અસર થઈ છે.
નાણાકીય વર્ષ ૨૦૨૦માં ભારતીય ખાતરની આયાતમાં ચીનનો હિસ્સો ૨૭.૧૬ ટકાથી ઘટીને નાણાકીય વર્ષ ૨૦૨૫માં ૧૦.૫૧ ટકા થઈ ગયો હતો.
બંદરોમાં ખાનગી ક્ષેત્રની ભાગીદારી વધારાશે
સરકાર ૨૦૩૦ સુધીમાં મુખ્ય બંદરોમાં ખાનગી ક્ષેત્રની ભાગીદારી ૮૫ ટકા સુધી વધારવાનું લક્ષ્ય રાખે છે. મહારાષ્ટ્રમાં વાધવન ખાતેનું ગ્રીનફિલ્ડ બંદર, જે રૂ. ૭૬,૦૦૦ કરોડના રોકાણ સાથે બનાવવામાં આવશે, તે ક્ષમતાની દ્રષ્ટિએ ભારતનું સૌથી મોટું બંદર હશે, જેના બે તબક્કા ૨૦૨૯ અને ૨૦૩૭માં પૂર્ણ થશે. નિકોબાર બંદર (રૂ. ૪૮,૦૦૦ કરોડનો ખર્ચ) ૧૦ વર્ષમાં પૂર્ણ થશે. ભૌગોલિક રાજકીય અનિશ્ચિતતાઓને ઘટાડવા માટે ભારત-મધ્ય પૂર્વ યુરોપ કોરિડોર અને આંતરરાષ્ટ્રીય ઉત્તર-દક્ષિણ પરિવહન કોરિડોર જેવા વૈકલ્પિક વેપાર કોરિડોર પણ વિકસાવવામાં આવી રહ્યા છે. ભારતે છેલ્લા ૧૧ વર્ષમાં તેની બંદર ક્ષમતામાં નોંધપાત્ર વધારો કર્યો છે. ૧૨ મુખ્ય બંદરો પર કાર્ગો હેન્ડલિંગ ૮૫૫ મિલિયન ટનથી વધીને ૧૬૯૦ મિલિયન ટન થયું છે.
