તમારા વાળ પણ પાતળા છે? આ ઘરેલુ ઉપાયથી થઈ જશે જાડા અને મજબૂત

Homemade Hair Oil for Hair Fall: વાળનું નિર્બળ બનવું, ટૂટવું અને ધીમે-ધીમે પાતળા દેખાવું આજકાલ ઘણા લોકો માટે ચિંતાનો વિષય બન્યો છે. આ સમસ્યાના ઉકેલ માટે લોકો અલગ-અલગ ઘરેલુ ઉપાયો અપનાવતા હોય છે. જો તમારા વાળ પણ નબળા અને પાતળા થઈ ગયા છે, તો એક ખાસ ઘરેલુ તેલ તમારા વાળને જાડા અને મજબૂત બનાવવામાં અસરકારક સાબિત થઈ શકે છે.

આ તેલ બનાવવા માટે જરૂરી સામગ્રી

આ ફાયદાકારક હેર ઓઈલ તૈયાર કરવા માટે અડધો કપ નારિયેળનું તેલ, ઓલિવ ઓઈલ અથવા તલનું તેલ, 1 મોટી ચમચી પૂરી રીતે સૂકાયેલી ડુંગળી, 3થી 4 લવિંગ અને લસણના એક નાના ટુકડાની જરૂર પડે છે.

બનાવવાની સરળ રીત

આ તેલ બનાવવા માટે સૌથી પહેલા નારિયેળનું તેલ, ઓલિવ ઓઈલ અથવા તલના તેલને હળવું ગરમ કરો. ત્યારબાદ તેમાં ડુંગળી, લવિંગ અને લસણ ઉમેરો. હવે આ તેલને ખૂબ જ ધીમી આંચ પર આશરે 8થી 10 મિનિટ સુધી ગરમ થવા દો. આ દરમિયાન ડુંગળી, લસણ કે લવિંગ બળી ન જાય તેનું ધ્યાન રાખો અને વચ્ચે-વચ્ચે તેલને હળવા હાથે હલાવતા રહો. તેલ બરાબર ઉકળી ગયા બાદ ગેસ બંધ કરી દો અને તેને ઠંડુ થવા દો. તેલ ઠંડુ થયા બાદ તેને ગાળીને કોઈ સાફ અને સૂકી બોટલમાં ભરી લો.

વાળમાં લગાવવાની યોગ્ય રીત

અઠવાડિયામાં એક કે બે વાર સાફ વાળમાં આ તેલનો ઉપયોગ કરવાની સલાહ આપવામાં આવે છે. તેલને સ્કેલ્પ પર લગાવીને આશરે 3થી 5 મિનિટ સુધી હળવા હાથે માલિશ કરો. આ તેલને વાળ અને સ્કેલ્પ પર 30થી 60 મિનિટ સુધી લાગેલું રહેવા દો અને ત્યારબાદ શેમ્પૂ કરી લો. નિયમિતપણે આ ઉપાય અપનાવવાથી સ્કેલ્પમાં બ્લડ સર્ક્યુલેશન વધે છે, જેનાથી વાળના મૂળ સુધી પૂરતું પોષણ મળે છે અને વાળ મજબૂત બને છે.