ખેડામાં રિક્ષા અને ઈકો કાર વચ્ચે ગમખ્વાર અકસ્માત: 3ના ઘટનાસ્થળે મોત, 4 ગંભીર

Kheda Accident: ખેડામાં ભયંકર અકસ્માતની ઘટના ઘટી છે. માતર-તારાપુર રોડ પરની ખોડિયાર ચોકડી પાસે રિક્ષાને ઈકો કારે ટક્કર મારતા ગમખ્વાર અકસ્માત સર્જાયો છે. અકસ્માતમાં 3 લોકોના ઘટનાસ્થળે મોત અને 4 લોકો ગંભીર રીતે ઈજાગ્રસ્ત થયા હોવાનું જણાય છે. ઈજાગ્રસ્તોને તાત્કાલિક સારવાર અર્થે હોસ્પિટલ ખસેડવામાં આવ્યા છે. ઘટનાની જાણ થતાં સ્થાનિક પોલીસ સ્થળ પર પહોંચીને આગળની કાર્યવાહી હાથ ધરી છે.

રિક્ષા અને ઈકો કાર વચ્ચે ગમખ્વાર અકસ્માતમાં 3ના ઘટનાસ્થળે મોત

મળતી માહિતી મુજબ, ખેડાના માતર-તારાપુર રોડ પર પૂરપાટ આવતી ઈકો કારે રિક્ષાને જોરદાર ટક્કર મારતા ભયાનક અકસ્માત સર્જાયો હતો. ગમખ્વાર અકસ્માતને પગલે સ્થાનિકો એકઠા થઈ જતાં 108ને જાણ કરી હતી અને ઈજાગ્રસ્તને તાત્કાલિક સારવાર માટે હોસ્પિટલ ખસેડવામાં આવ્યા હતા. અકસ્માત બાદ ઈકો કારચાલક ફરાર થઈ ગયો હતો. જો કે, પોલીસે કારચાલકને ઝડપી પાડ્યો છે.

અકસ્માતને લઈને માતર-તારાપુર રોડ પર વાહનવ્યવહાર પ્રભાવિત થયો હતો. જ્યારે ઘટનાની જાણ થતાં સ્થાનિક પોલીસ અને ધારાસભ્ય સ્થળ પર દોડી પહોંચ્યા હતા. પોલીસે મૃતકોના મૃતદેહને પીએમ અર્થે મોકલી આગળની કાર્યવાહી હાથ ધરી છે.

મૃતકોના નામ

• અમરસિંહ બુધાભાઈ વાઘેલા, (રહે.શેખુપુર)
• બળવંત વિષ્ણુભાઈ ચુનારા (રહે.દેથલી)
• મલેક અબ્દુલકૈયુમ ડોસુમીયા (રહે.સીંજીવાડા)

ઈજાગ્રસ્તોના નામ

• વિક્રમભાઈ અજીતભાઈ તળપદા
• પ્રવીણભાઈ રાઠોડભાઈ રાવળ
• લક્ષ્મણભાઈ સોમાભાઈ પરમાર
• ભાવનાબહેન લાલજીભાઈ રબારી