જામનગરમાં જુગારના ત્રણ દરોડા : એલસીબીના દરોડામાં સાત જુગારી પકડાયા, છ ફરાર

Jamnagar: જામનગર શહેર અને જિલ્લામાં પોલીસે જુગારની પ્રવૃત્તિ સામે કાર્યવાહી હાથ ધરી ત્રણ અલગ અલગ સ્થળે દરોડા પાડી કુલ 19 શખસોને ઝડપી લીધા છે, જ્યારે છ શખસો ફરાર થઈ ગયા છે. ત્રણેય દરોડામાં રોકડ રકમ, મોબાઈલ ફોન, મોટરસાઇકલ સહિત કુલ રૂ. 3,34,322નો મુદ્દામાલ કબજે કરવામાં આવ્યો છે.

સાધના કોલોનીમાં એલસીબીનો દરોડો : સાત પકડાયા, છ ફરાર

પ્રથમ દરોડામાં જામનગર લોકલ ક્રાઈમ બ્રાન્ચની ટીમે સાધના કોલોનીમાં બ્લોક નંબર એમ-51ની બાજુની શેરીમાં દરોડો પાડ્યો હતો. અહીં જાહેરમાં રૂપિયાના સિક્કા ઉછાળીને કાટીછાપ નામનો પૈસાની હારજીતનો જુગાર રમાતો હોવાનું સામે આવ્યું હતું.
પોલીસે દરોડા દરમિયાન અનિલભાઈ સોમાભાઈ ચાવડા, રહીમભાઈ ઉર્ફે નંઢો ઇબ્રાહીમભાઈ ખીરા સુમરા, યુનુસભાઈ ઇબ્રાહીમભાઈ ખીરા સુમરા, સુનીલભાઈ ફેરૂમલભાઈ નાગદેવ, અશોકભાઈ ઉર્ફે મીર્ચી ખટાઉમલ મંગે, નાજીરભાઈ ઉર્ફે નાજલો નુરમામદ ધોધા અને આફ્રીદી મહેબૂબભાઈ દરજાદાની ધરપકડ કરી હતી.

જ્યારે અનુ બાપુ, ઉમર હાજી ખફી, હિતેશ ઉર્ફે સાકીરો સોમાભાઈ ચાવડા, લાલાભાઈ, ઇકુભાઈ અને બસીરભાઈ સહિત છ શખસો નાસી છૂટ્યા હતા.

પોલીસે સ્થળ પરથી રોકડા રૂ. 52,000, આઠ મોબાઈલ ફોનની કિંમત રૂ. 40,000, બે રૂપિયાના બે સિક્કા અને ચાર મોટરસાઇકલની કિંમત રૂ. 2 લાખ મળી કુલ રૂ. 2,92,002નો મુદ્દામાલ કબજે કર્યો હતો.

ગોકુલનગરમાં તીનપત્તીના જુગાર પર દરોડો : પાંચ શખસો ઝડપાયા

બીજા બનાવમાં ગોકુલનગરમાં શાયોનાવારી શેરીમાં અજીત વિદ્યાલયની બાજુની શેરીમાં એલસીબીની ટીમે દરોડો પાડી તીનપત્તી રોન પોલીસ નામનો જુગાર રમતા પાંચ શખસોને ઝડપી લીધા હતા.

પોલીસે યોગરાજસિંહ જીતુભા ગોહિલ, હિતેશભાઈ હરેશભાઈ અગેસણીયા, દિલીપભાઈ બચુભાઈ મકવાણા, વજશીભાઈ અરજણભાઈ ગોજીયા અને સુરેશભાઈ કલ્યાણજીભાઈ અનુવાડિયાને ઝડપી લીધા હતા.

આ દરોડામાં રોકડા રૂ. 20,500, ગંજીપત્તાનાં 52 પાનાં અને ત્રણ મોબાઈલ ફોનની કિંમત રૂ. 10,500 મળી કુલ રૂ. 31,000નો મુદ્દામાલ કબજે કરવામાં આવ્યો હતો.

જામજોધપુરમાં વડલાના ઝાડ નીચે જુગાર રમતા સાત શખસો પકડાયા

ત્રીજા બનાવમાં જામજોધપુર પોલીસની ટીમે ગૌશાળા સામે વડલાના ઝાડના ઓટા પાસે જાહેરમાં દરોડો પાડ્યો હતો. અહીં ગંજીપત્તાનાં પાનાં વડે તીનપત્તી રોન પોલીસ નામનો જુગાર રમતા સાત શખસોને ઝડપી લેવામાં આવ્યા હતા.

પોલીસે મહેન્દ્રભાઈ ઉર્ફે ચનીભાઈ છગનભાઈ ચનીયારા, સુરેશભાઈ કારાભાઈ જોષી, લલિતભાઈ મનસુખભાઈ પરમાર, ભરતભાઈ મગનભાઈ સોલંકી, રોહિતભાઈ બુદ્ધગરભાઈ મેઘનાથી, દેવરાજભાઈ ભીખાભાઈ કટારા અને અલ્લારખા ફકરૂદીનભાઈ મનસુરીને ઝડપી લીધા હતા.

પોલીસે સ્થળ પરથી રોકડા રૂ. 11,450 અને ગંજીપત્તાનાં 52 પાનાં કબજે કર્યા હતા. આ દરોડામાં કુલ રૂ. 11,450નો મુદ્દામાલ કબજે થયો હતો.

આમ, જામનગર એલસીબીના બે અને જામજોધપુર પોલીસના એક મળી ત્રણ દરોડામાં કુલ 19 શખસો ઝડપાયા છે અને છ ફરાર આરોપીઓની શોધખોળ હાથ ધરવામાં આવી છે.