જામનગરમાં સુપરમાર્કેટ રોડ પરથી અંગ્રેજી દારૂની બાટલીના જથ્થા સાથે એક શ્રમિક ઝડપાયો

Jamnagar: જામનગર શહેરના સુપરમાર્કેટ રોડ પર નવાનગર સરકારી શાળા નજીક સર્વેલન્સ સ્કોડે પેટ્રોલિંગ દરમિયાન એક વ્યક્તિને ભારતીય બનાવટના વિદેશી દારૂની છ બોટલ સાથે ઝડપી પાડી તેની સામે પ્રોહિબિશન કાયદા હેઠળ ગુનો નોંધ્યો છે.

પોલીસ ફરિયાદ મુજબ, સીટી એ ડિવિઝન પોલીસ સ્ટેશનના સર્વેલન્સ સ્કોડના પોલીસ કોન્સ્ટેબલ કિશોરભાઈ ભુટાભાઈ ગાગીયાની ફરિયાદના આધારે શનિવારે સાંજે પેટ્રોલિંગ દરમિયાન એક વ્યક્તિ હાથમાં કાળી થેલી લઈને શંકાસ્પદ હાલતમાં આવતો જોવા મળ્યો હતો. તેને રોકી તપાસ કરતાં થેલીમાંથી ભારતીય બનાવટનો વિદેશી દારૂ મળી આવ્યો હતો.

પકડાયેલા આરોપીની ઓળખ સુરેશ ઉર્ફે સાંઈ ગીરધારીલાલ શર્મા (ઉ.વ. 50), રહે. સાધના કોલોની, ગેટ નં. 2, બ્લોક એમ-1, રૂમ નં. 2197, જામનગર તરીકે થઈ છે. તેની પાસેથી ઈંગ્લીશ દારૂ ની સીલબંધ છ બોટલ, કુલ કિંમત રૂ. 3,000નો મુદ્દામાલ કબજે કરવામાં આવ્યો હતો.

દારૂ અંગે પાસ-પરમિટ માંગતા આરોપી કોઈ આધાર રજૂ કરી શક્યો ન હતો. જેથી પોલીસે દારૂ કબજે કરી આરોપીની ધરપકડ કરી હતી. આ અંગે પ્રોહિબિશન કાયદાની કલમ 65(એ)(એ) અને 116(બી) હેઠળ ગુનો નોંધી આગળની તપાસ હાથ ધરી છે.