કાલાવડ-બાલંભડી હાઇવે પર બે બાઇક અથડાતાં 64 વર્ષીય બુઝુર્ગનું કરુણ મૃત્યુ

Jamnagar Accident : કાલાવડથી બાલંભડી ગામ વચ્ચે હાઇવે રોડ પર બે મોટરસાઇકલ વચ્ચે સર્જાયેલા અકસ્માતમાં 64 વર્ષીય વૃદ્ધનું ગંભીર ઇજાઓને કારણે મૃત્યુ નીપજ્યું હતું.
પોલીસમાં નોંધાયેલી ફરિયાદ મુજબ, મગનભાઈ લક્ષ્મણભાઈ પાનસુરીયા પોતાની મોટરસાઇકલ પર કાલાવડથી બામણગામ તરફ જઈ રહ્યા હતા. દરમિયાન સામેથી આવતી હીરો કંપનીની મોટરસાઇકલના ચાલકે પુરઝડપે અને ગફલતભરી રીતે વાહન ચલાવી તેમની મોટરસાઇકલ સાથે અથડામણ કરી હોવાનો આરોપ છે.
અકસ્માતમાં મગનભાઈને માથા તથા શરીરના ભાગે ગંભીર ઇજાઓ પહોંચતાં તેમનું મૃત્યુ નીપજ્યું હતું. કાલાવડ ટાઉન પોલીસે અકસ્માત સર્જનાર મોટરસાઇકલના ચાલક સામે ભારતીય ન્યાય સંહિતા તથા મોટર વ્હીકલ એક્ટની કલમો હેઠળ ગુનો નોંધી તપાસ હાથ ધરી છે.