Who Is Ruling Venezuela? | અમેરિકાના હુમલા બાદ હવે ડેલ્સી રોડ્રિગેઝને વેનેઝુએલાના વચગાળાના પ્રમુખ બનાવવામાં આવ્યા છે. અમેરિકાએ નિકોલસ માદુરોને કેદ કરતાં વેનેઝુએલાની સુપ્રીમ કોર્ટે ઉપપ્રમુખ ડેલ્સી રોડ્રિગેઝને દેશની સત્તા સોંપી.
અમેરિકાની કાર્યવાહી ગેરકાયદે: વેનેઝુએલાની સુપ્રીમ કોર્ટ
સુપ્રીમ કોર્ટના આદેશમાં કહેવામાં આવ્યું છે કે ડેલ્સી રોડ્રિગેઝે તાત્કાલિક ધોરણે પ્રમુખ તરીકે જવાબદારી સ્વીકારવાની રહેશે. અમે વેનેઝુએલાના લોકો પર અમેરિકા દ્વારા કરાયેલા હુમલા તથા માદુરો અને તેમની કિડનેપિંગનો વિરોધ કરીએ છીએ. અમેરિકાની આ કાર્યવાહી વેનેઝુએલાના બંધારણ, કાયદા તથા આંતરરાષ્ટ્રીય કાયદા અને સંયુક્ત રાષ્ટ્ર ચાર્ટરનું ઉલ્લંઘન છે. અમેરિકાનો ઉદ્દેશ્ય વેનેઝુએલાના સંસાધનો પર કબજો કરવાનો છે. દેશની સ્વતંત્રતા અને સંપ્રભુતાની રક્ષા માટે વેનેઝુએલાના લોકો અને તમામ પક્ષોએ એક થઈ જવું જોઈએ.
ડેલ્સી રોડ્રિગેઝ બન્યા વેનેઝુએલાના વચગાળાના પ્રમુખ
નોંધનીય છે માદુરો ડેલ્સી રોડ્રિગેઝને 'ટાઈગર' કહીને સંબોધિત કરતાં. તેમનો જન્મ 18 મે, 1969ના રોજ કારાકાસમાં થયો હતો. તેમણે વેનેઝુએલામાં જ લૉનું શિક્ષણ પ્રાપ્ત કર્યું. વર્ષ 2014થી 2017 સુધી તેઓ વેનેઝુએલાના વિદેશ મંત્રી રહ્યા. 2018માં તેમને ઉપપ્રમુખનું પદ આપવામાં આવ્યું. વેનેઝુએલાનું નાણાં મંત્રાલય અને ઓઈલ મંત્રાલય પણ તેમના હાથોમાં જ છે.
વેનેઝુએલા પર કોનું રાજ?
હવે મોટો સવાલ થાય છે કે વેનેઝુએલા કોણ ચલાવશે? કારણ કે માદુરોની કેદ બાદ અમેરિકાના પ્રમુખ ડોનાલ્ડ ટ્રમ્પે દાવો કર્યો છે કે હવે વેનેઝુએલાને અમેરિકા જ ચલાવશે. એવામાં સવાલ થાય છે કે શું અમેરિકા પોતાના કોઈ પ્રતિનિધિ અથવા તેમનો પક્ષ લે તેવા નેતાને વેનેઝુએલાની સત્તા સોંપવા માંગે છે? અને જો હા તો તે આ કેવી રીતે કરવામાં આવશે?
અમે વેનેઝુએલા પર શાસન કરીશું: ડોનાલ્ડ ટ્રમ્પ
અમેરિકાના માર-એ-લાગોમાં પત્રકાર પરિષદમાં ડોનાલ્ડ ટ્રમ્પે કહ્યું હતું કે વેનેઝુએલામાં સુરક્ષિત બદલાવ ન આવે ત્યાં સુધી અમે જ શાસન કરીશું. તે માટે પહેલેથી જ અધિકારીઓ નક્કી કરી દેવામાં આવ્યા છે. અમે વેનેઝુએલામાં ફરી ઓઈલ ઈન્ફ્રાસ્ટ્રક્ચર બનાવીશું. આટલું જ નહીં ટ્રમ્પે એમ પણ જાહેરાત કરી છે કે અમેરિકા માદુરોની નજીક ગણાતા નેતાઓને સત્તામાં નહીં રહેવા દે. અમારી તેમના પર સતત નજર છે.
વેનેઝુએલા અંગે ભારતની પ્રતિક્રિયા
વેનેઝુએલા પર અમેરિકાના હુમલા અંગે ભારતે પ્રથમ પ્રતિક્રિયા આપી છે. ભારતીય વિદેશ મંત્રાલયે સત્તાવાર નિવેદન જાહેર કરી વેનેઝુએલાના ઘટનાક્રમ પર ચિંતા વ્યક્ત કરી છે અને તમામ પક્ષોને શાંતિની અપીલ કરી છે. વેનેઝુએલાની પરિસ્થિતિ પર ભારતની સતત નજર છે. વિદેશ મંત્રાલયે કહ્યું છે, કે વેનેઝુએલામાં વર્તમાન ઘટનાક્રમ ચિંતાનો વિષય છે. અમે બદલાતી પરિસ્થતિ પર સતત નજર રાખી રહ્યા છીએ. વેનેઝુએલાના લોકોના હિત અને સુરક્ષાનું અમે સમર્થન કરીએ છીએ. તથા તમામ સંબંધિત પક્ષોને અપીલ કરીએ છીએ કે વાતચીતના માધ્યમથી શાંતિપૂર્ણ રીતે સમાધાન લાવે. જેથી ક્ષેત્રમાં શાંતિ અને સ્થિરતા જળવાઈ રહે. કારાકાસમાં ભારતીય એમ્બેસી સતત ભારતીય લોકો સાથે સંપર્કમાં છે. નોંધનીય છે કે અગાઉ ભારત સરકારે પોતાના નાગરિકો માટે એડવાઈઝરી જાહેર કરી હતી. વેનેઝુએલામાં રહેતા ભારતીયોને ગેરજરૂરી યાત્રાથી બચવા સલાહ આપવામાં આવી હતી.
અમેરિકાએ વેનેઝુએલાના પ્રમુખને કેદ કર્યા
અમેરિકાની સેનાએ વેનેઝુએલાના સૈન્ય અડ્ડા પર ભીષણ હુમલો કર્યો. જે બાદ વેનેઝુએલાના પ્રમુખ નિકોલસ માદુરો અને તેમની પત્ની સિલિયા ફ્લોરેસને કેદ કરી લેવાયા. અમેરિકાની સેના તેમને વિશેષ વિમાનમાં ન્યૂયોર્ક લઈ ગઈ. અમેરિકા સતત વેનેઝુએલા પર ડ્રગ્સની હેરાફેરી અને નાર્કો આતંકવાદનો આરોપ લગાવતું રહ્યું છે. બીજી તરફ વેનેઝુએલાનો આરોપ છે કે અમેરિકાની આ કાર્યવાહી માત્રને માત્ર ક્રૂડ ઓઈલના ખજાના પર કબજો કરવા માટે છે.
સંયુક્ત રાષ્ટ્ર ચિંતિત, આંતરરાષ્ટ્રીય કાયદાનો થયો ભંગ
વેનેઝુએલા પર અમેરિકાની કાર્યવાહીનો સંયુક્ત રાષ્ટ્રએ પણ વિરોધ કર્યો છે. સંયુક્ત રાષ્ટ્રના સચિવ એન્ટોનિયો ગુટેરેસે અમેરિકાની કાર્યવાહી પર ચિંતા વ્યક્ત કરતાં કહ્યું છે કે આ ખતરનાક ઉદાહરણ પૂરું પાડશે. મહાસચિવના પ્રવક્તા સ્ટેફાન દુજારિકે કહ્યું છે, કે આ સૈન્ય કાર્યવાહીથી ક્ષેત્રીય સ્તરે ગંભીર અને ચિંતાજનક અસરની આશંકા છે. આ પ્રકારના ઘટનાક્રમ એક ખતરનાક ઉદાહરણ ઊભું કરે છે. દુનિયાના તમામ દેશોએ આંતરરાષ્ટ્રીય કાયદા, સંયુક્ત રાષ્ટ્ર ચાર્ટરનું સન્માન કરવું જોઈએ. અત્યંત ચિંતાની વાત છે કે આંતરરાષ્ટ્રીય કાયદાઓનો ભંગ કરવામાં આવ્યો.
કમલા હેરિસે ટ્રમ્પની કાર્યવાહીનો વિરોધ કર્યો
અમેરિકાના પૂર્વ વાઈસ પ્રેસિડેન્ટ કમલા હેરિસે વેનેઝુએલા પર કરાયેલી કાર્યવાહી અંગે પ્રમુખ ડોનાલ્ડ ટ્રમ્પની આકરી ટીકા કરી છે. તેમણે દાવો કર્યો છે કે આ ડ્રગ્સ કે લોકશાહી નહીં તેલ ( ક્રૂડ ઓઇલ )નો મામલો છે.અમેરિકાએ વેનેઝુએલા પર હુમલો કરી વેનેઝુએલાના પ્રમુખ નિકોલસ માદુરો અને તેમની પત્નીને કેદ કર્યા છે. જેને લઈને દુનિયાના અનેક દેશો સવાલ ઉઠાવી રહ્યા છે. એવામાં કમલા હેરિસે કહ્યું છે, કે વેનેઝુલા પર ટ્રમ્પની કાર્યવાહીથી અમેરિકા ના તો અધિક સુરક્ષિત છે, ના મજબૂત બન્યું છે. માદુરો ક્રૂર અને ગેરકાયદે તાનાશાહ હતા, પણ આ કાર્યવાહી પણ ગેરકાયદે જ છે. સત્તા પરિવર્તન અને ઓઈલ માટે યુદ્ધ છેવટે તો અરાજકતામાં જ પરિણમશે. જેની કિંમત અમેરિકાના પરિવારોએ ચૂકવવી પડશે. કમલા હેરિસે વધુમાં કહ્યું, કે અમેરિકાની જનતા ટ્રમ્પના જુઠ્ઠાણાથી કંટાળી ગઈ છે. આ ડ્રગ્સ કે લોકશાહીનો મામલો નથી. આ ઓઈલ અને ટ્રમ્પની તાકાતવર નેતા બનવાની ઈચ્છાનો મામલો છે. તેમને ડ્રગ્સ કે લોકશાહીની જ ચિંતા હોત તો ક્યારેય ડ્રગ્સ પેડલર્સને માફ ન કર્યા હોત. ટ્રમ્પ અમેરિકાના સૈનિકોને ખતરામાં નાંખી રહ્યા છે અને અબજો ડોલર ખર્ચો કરી રહ્યા છે. ટ્રમ્પ સમગ્ર ક્ષેત્રને અસ્થિર કરી રહ્યા છે. આ કાર્યવાહીથી દેશને કોઈ લાભ નથી. અમેરિકાને એવા નેતૃત્વની જરૂર છે જે અમેરિકાની જનતાને સર્વોપરી રાખે. અમેરિકાના પરિવારો માટે મોંઘવારી ઘટાડે. કાયદાનું શાસન લાગુ કરે.
