પરમાણુ હથિયારો વાપરતાં પણ અચકાઈશું નહીં! કાલિનિનગ્રાડ મુદ્દે રશિયાની નાટોને ખુલ્લી ધમકી

Russia NATO Tensions : રશિયા અને NATO વચ્ચે તણાવ સતત વધી રહ્યો છે. રશિયાએ NATOને ચેતવણી આપતાં કહ્યું છે કે જો પશ્ચિમી દેશો કાલિનિનગ્રાડને રશિયાના બાકીના વિસ્તારથી અલગ પાડવાનો પ્રયાસ કરશે, તો મોસ્કો પોતાની પાસે ઉપલબ્ધ તમામ લશ્કરી ક્ષમતાનો ઉપયોગ કરી શકે છે. તેમાં પરમાણુ હથિયારોનો પણ સમાવેશ થાય છે. અહેવાલ મુજબ, રશિયાએ NATOને એક અનૌપચારિક રાજદ્વારી દસ્તાવેજ મોકલ્યો છે. આ દસ્તાવેજમાં NATO પર ‘ખતરનાક અને બેદરકારીભર્યો માર્ગ’ અપનાવવાનો આરોપ મૂકવામાં આવ્યો છે. મોસ્કોએ ચેતવણી આપી છે કે આવી સ્થિતિ સીધા લશ્કરી સંઘર્ષનું જોખમ વધારી શકે છે.

કાલિનિનગ્રાડને લઈને રશિયાની ચેતવણી

કાલિનિનગ્રાડ રશિયાનો મહત્ત્વનો સૈન્ય વિસ્તાર છે, જે બાલ્ટિક સમુદ્રના કિનારે આવેલો છે અને પોલૅન્ડ તથા લિથુઆનિયા વચ્ચે સ્થિત છે. રશિયાના બાકીના ભૂભાગથી અલગ આવેલા આ વિસ્તારને લઈને NATO સાથે લાંબા સમયથી વ્યૂહાત્મક તણાવ છે. રશિયાના દસ્તાવેજમાં કહેવામાં આવ્યું છે કે જો NATO દેશો કાલિનિનગ્રાડને રશિયાના બાકીના દેશથી અલગ પાડવાનો કોઈ પ્રયાસ કરશે, તો રશિયા પોતાના પ્રદેશની રક્ષા માટે ઉપલબ્ધ તમામ દળો અને ક્ષમતાનો ઉપયોગ કરવા તૈયાર રહેશે. તેમાં પરમાણુ હથિયારોનો પણ સમાવેશ કરવામાં આવ્યો છે. રશિયાએ જોકે એવું પણ કહ્યું છે કે NATOના સભ્ય દેશો પર હુમલો કરવાનો તેનો કોઈ ઇરાદો નથી. પરંતુ કાલિનિનગ્રાડ સામે કોઈ આક્રમક કાર્યવાહી થશે તો તેનો સૌથી કડક જવાબ આપવામાં આવશે.

NATOએ શું કહ્યું?

NATOની પ્રવક્તા એલિસન હાર્ટે રશિયા દ્વારા મોકલવામાં આવેલા અનૌપચારિક દસ્તાવેજની પુષ્ટિ કરી છે, પરંતુ તેની વિગતો જાહેર કરી નથી. તેમણે કહ્યું કે NATO એક રક્ષણાત્મક સંગઠન છે અને તેની કોઈ પણ પ્રવૃત્તિ કે લશ્કરી કવાયત રશિયાના કોઈ વિસ્તાર માટે જોખમ ઊભું કરતી નથી. NATOએ પરમાણુ હથિયારોના ઉપયોગની ધમકીને પણ બિનજવાબદાર ગણાવી છે અને રશિયાને યુક્રેનમાં ચાલી રહેલું યુદ્ધ બંધ કરવાની અપીલ કરી છે.

યુરોપમાં વધતો તણાવ

રશિયાની આ ચેતવણી એવા સમયે આવી છે જ્યારે યુરોપીય દેશો મોસ્કો પર ‘હાઇબ્રિડ વોર’ દ્વારા તણાવ વધારવાનો આરોપ લગાવી રહ્યા છે. તેમાં તોડફોડ અને આગચંપી જેવી ઘટનાઓનો પણ સમાવેશ થાય છે. રશિયા આવા આરોપોને નકારે છે. એક યુરોપીય સંરક્ષણ અધિકારીએ કહ્યું કે શીત યુદ્ધ પછી પહેલી વખત રશિયા તરફથી આ પ્રકારની સીધી ચેતવણી મળી છે, તેથી આ સ્થિતિ ગંભીર છે. NATOના એક રાજદ્વારીએ રશિયાના પત્રને યુરોપીય દેશોને ડરાવવાનો વધુ એક પ્રયાસ ગણાવ્યો અને કહ્યું કે NATO યુક્રેનને સમર્થન આપવાથી પાછળ નહીં હટે.