VIDEO : યુક્રેનનો રશિયા પર સૌથી મોટો ડ્રોન હુમલો, ઓઈલ રિફાઈનરી ભડભડ સળગી, 3ના મોત

Ukraine-Russia War : યુક્રેને રશિયા પર પોતાના ડ્રોન હુમલા તેજ કર્યા છે. રવિવારે યુક્રેનના લોન્ગ-રેન્જ ડ્રોન હુમલાને કારણે રશિયાના દક્ષિણ ભાગમાં આવેલી મોટી ઓઈલ રિફાઈનરીમાં ભીષણ આગ લાગી હતી. આ હુમલા અને અલગ-અલગ જગ્યાએ થયેલી અન્ય ઘટનાઓમાં કુલ 3 લોકોના મોત થયા છે. યુક્રેનનો હેતુ રશિયાની કમાણી રોકવા અને ઈંધણ સપ્લાય ખોરવવાનો છે.

સ્લાવ્યાંસ્ક રિફાઈનરીમાં ભીષણ આગ
રશિયાના ક્રાસ્નોડાર ગવર્નરના જણાવ્યા મુજબ, સ્લાવ્યાંસ્ક-ના-કુબાની શહેરની રિફાઈનરી પર યુક્રેની ડ્રોનનો કાટમાળ પડતાં આગ લાગી હતી. આ રિફાઈનરી દર વર્ષે 40 લાખ ટન ક્રૂડ ઓઈલ પ્રોસેસ કરે છે. આ સિવાય યુક્રેને સરહદથી 700 કિમી દૂર યારોસ્લાવમાં આવેલી અન્ય એક રિફાઈનરીને પણ નિશાન બનાવી છે, જેના કારણે ત્યાંના રોડ અને એરપોર્ટ અસ્થાયી ધોરણે બંધ કરવા પડ્યા હતા.

રશિયામાં ઈંધણની ભારે કટોકટી
યુક્રેનના સતત હુમલાના કારણે રશિયાના કબજા હેઠળના ક્રિમિયામાં પેટ્રોલ વેચાણ પર પ્રતિબંધ મુકાયો છે. સાઈબેરીયાના ઈરકુત્સ્કમાં પણ ઈંધણની તંગી સર્જાતા સરકારી સ્ટેશનો પરથી હવે નાગરિકો રોજનું માત્ર 50 લીટર પેટ્રોલ જ ખરીદી શકશે. ખાનગી ગેસ સ્ટેશનોએ પણ સપ્લાય ચેઈન ખોરવાતા વેચાણ મર્યાદિત કર્યું છે.

બંને દેશો વચ્ચે સેંકડો ડ્રોન અને મિસાઈલમારો
છેલ્લા 24 કલાકમાં બંને દેશો તરફથી ભારે આક્રમણ થયું છે. રશિયાના રક્ષામંત્રાલયે ક્રિમિયા અને બ્લેક સી પર યુક્રેનના 213 ડ્રોન તોડી પાડવાનો દાવો કર્યો છે. બીજી તરફ, રશિયાએ પણ યુક્રેન પર 142 ડ્રોન અને 8 મિસાઈલો ઝિંકી હતી, જેમાંથી યુક્રેની એરફોર્સે 125 ડ્રોન અને 7 મિસાઈલો હવામાં જ નષ્ટ કરી દીધી હોવાનો દાવો કર્યો છે.