UAE Iran conflict: પશ્ચિમ એશિયામાં ફરી એકવાર સ્થિતિ ઝડપથી વણસતી જણાઈ રહી છે. સંયુક્ત આરબ અમીરાત (UAE) એ દાવો કર્યો છે કે તેના પર ઈરાન દ્વારા મોટા પાયે મિસાઈલ અને ડ્રોન હુમલા કરવામાં આવ્યા છે, જેને રોકવા માટે દેશની એર ડિફેન્સ સિસ્ટમ સંપૂર્ણપણે સક્રિય થઈ ગઈ છે. ઈરાન અને અમેરિકા વચ્ચે થયેલા યુદ્ધવિરામ બાદ આ પ્રકારનો આ પ્રથમ હુમલો છે.
UAE એ શું કહ્યું?
UAE ના સંરક્ષણ મંત્રાલયે સોશિયલ મીડિયા પોસ્ટમાં જણાવ્યું હતું કે, ‘ઈરાન તરફથી દેશના વિવિધ વિસ્તારો તરફ છોડવામાં આવેલી ચાર ક્રૂઝ મિસાઈલોની ઓળખ કરવામાં આવી હતી. તેમાંથી ત્રણને દેશની દરિયાઈ સીમામાં સફળતાપૂર્વક નષ્ટ કરવામાં આવી હતી, જ્યારે એક સમુદ્રમાં પડી હતી. સંરક્ષણ મંત્રાલયે પુષ્ટિ કરી છે કે દેશના વિવિધ ભાગોમાં સંભળાયેલા અવાજો એર ડિફેન્સ સિસ્ટમ દ્વારા મિસાઈલ નષ્ટ કરવાને કારણે હતા.’ સંયુક્ત આરબ અમીરાતના વિદેશ મંત્રાલયે ઈરાન દ્વારા કરવામાં આવેલા મિસાઈલ અને ડ્રોન હુમલાની નિંદા કરતું નિવેદન બહાર પાડ્યું છે. મંત્રાલયે જણાવ્યું હતું કે તે આ હુમલાઓનો જવાબ આપવાનો પોતાનો 'પૂર્ણ અને કાયદેસરનો અધિકાર' સુરક્ષિત રાખે છે, જેને તેણે દેશની સુરક્ષા માટે સીધો ખતરો પેદા કરતું એક ગંભીર દુષ્ટચક્ર ગણાવ્યું છે.
હુમલામાં ત્રણ ભારતીયો ઘાયલ
બીજી તરફ હુમલા વચ્ચે ફુજૈરાહ અમીરાતમાંથી મોટા સમાચાર સામે આવ્યા છે, જ્યાં એક ઈરાની ડ્રોન ક્રૂડ સુવિધા (Oil Facility) સાથે અથડાયું હતું. ડ્રોન અથડાવાને કારણે આગ લાગી હતી. 'ખલીજ ટાઈમ્સ'ના રિપોર્ટ મુજબ, આ હુમલામાં 3 ભારતીયો ઘાયલ થયા છે. સિવિલ ડિફેન્સની ટીમ તાત્કાલિક ઘટનાસ્થળે પહોંચી હતી અને આગ પર કાબૂ મેળવવાની કામગીરી ચાલુ રહી હતી. રિપોર્ટ અનુસાર, અમેરિકા-ઈઝરાયલ અને ઈરાન વચ્ચે ચાલી રહેલા સંઘર્ષ દરમિયાન UAE સૌથી વધુ નિશાના પર રહ્યું છે. એવું કહેવામાં આવી રહ્યું છે કે 28 ફેબ્રુઆરીથી 8 એપ્રિલ સુધીના સંઘર્ષમાં ઈરાને UAE પર 2,800 થી વધુ ડ્રોન અને મિસાઈલો છોડી હતી. જોકે બાદમાં યુદ્ધવિરામ લાગુ કરવામાં આવ્યો હતો, પરંતુ હવે ફરીથી હુમલા શરૂ થતા ચિંતા વધી ગઈ છે.
સંયુક્ત આરબ અમીરાત (UAE) ના સંરક્ષણ મંત્રાલયનું કહેવું છે કે ઈરાને તેના પર ડ્રોન અને ક્રૂઝ મિસાઈલો વડે હુમલો કર્યો છે. એપ્રિલની શરૂઆતમાં લાગુ થયેલા નાજુક યુદ્ધવિરામ બાદ પ્રથમ વખત ઈરાને તેના પર હુમલો કર્યો છે. આ હુમલા અમેરિકન રાષ્ટ્ર પ્રમુખ ડોનાલ્ડ ટ્રમ્પના હોર્મુઝ સ્ટ્રેટને ફરીથી ખોલવાના નવા પ્રયાસોના જવાબમાં કરવામાં આવ્યા હોય તેમ લાગે છે.
તેલ ટેન્કર પર હુમલો
આ પહેલા UAEએ આરોપ લગાવ્યો હતો કે ઈરાને હોર્મુઝ સ્ટ્રેટમાં ADNOCના એક તેલ ટેન્કર પર ડ્રોન હુમલો કર્યો હતો. આ ઘટના બાદ UAE એ તેને ‘દરિયાઈ લૂંટ’ જેવું પગલું ગણાવીને સખત નિંદા કરી હતી. આ દરમિયાન અમેરિકાએ સંકેત આપ્યો છે કે તે હોર્મુઝ સ્ટ્રેટમાં જહાજોને સુરક્ષિત બહાર કાઢવાના મિશન પર કામ કરી રહ્યું છે. CENTCOM હેઠળ અમેરિકન સેના વેપારી જહાજોની અવરજવરને સુરક્ષિત બનાવવામાં લાગેલી છે.
