Trump's Deadline for Strait of Hormuz | પશ્ચિમ એશિયામાં યુદ્ધની સ્થિતિ હવે નિર્ણાયક વળાંક પર છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાનને સ્પષ્ટ ચેતવણી આપી છે કે જો મંગળવાર સાંજ સુધીમાં 'સ્ટ્રેટ ઓફ હોર્મુઝ' (હોર્મુઝની સામુદ્રધુની) ખોલવામાં નહીં આવે, તો ઈરાનના પાવર પ્લાન્ટ્સ અને પુલોને નષ્ટ કરી દેવામાં આવશે. ટ્રમ્પે આ સમયસીમા મંગળવાર રાત્રે 8 વાગ્યે (ભારતીય સમય મુજબ બુધવાર સવાર) નક્કી કરી છે.
ટ્રમ્પની 'પાવર પ્લાન્ટ ડે' ની ધમકી
ટ્રમ્પે સોશિયલ મીડિયા પર અત્યંત કડક ભાષામાં લખ્યું કે, જો જળમાર્ગ નહીં ખૂલે તો ઈરાનમાં 'પાવર પ્લાન્ટ ડે' અને 'બ્રિજ ડે' ઉજવાશે, એટલે કે તમામ મહત્વના ઈન્ફ્રાસ્ટ્રક્ચર ઉડાવી દેવાશે. ટ્રમ્પના મતે સોમવારે કોઈ ડીલ થવાની શક્યતા છે, નહીં તો તેઓ તેલના કુવાઓ પર કબજો કરી લેવા સુધીના પગલાં ભરી શકે છે.
ઈરાનની વળતી શરત અને ચેતવણી
ઈરાને ઝૂકવાને બદલે હોર્મુઝ ખોલવા માટે નવી શરત મૂકી છે. ઈરાની અધિકારી મહેદી તબાતબાઈના જણાવ્યા મુજબ, હોર્મુઝ ત્યારે જ ખુલશે જ્યારે ત્યાંથી પસાર થતા જહાજોના ટોલ ટેક્સનો એક હિસ્સો યુદ્ધમાં થયેલા નુકસાનની ભરપાઈ માટે આપવામાં આવે. બીજી તરફ, ઈરાની સંસદના સ્પીકરે ચેતવણી આપી છે કે ટ્રમ્પના આ પગલાથી આખું ક્ષેત્ર સળગી ઉઠશે અને અમેરિકા માટે આ 'જીવતું નર્ક' સાબિત થશે. એવું કહેવાય છે કે જો નાકાબંધી યથાવત્ રહેશે તો ભારત સહિત અનેક દેશોમાં ઈંધણ અને ખાતરની ગંભીર અછત વર્તાશે.
ભારતની રાજદ્વારી દોડધામ
હોર્મુઝની નાકાબંધીથી ભારતના ઈંધણ અને ખાતર પુરવઠા પર ગંભીર અસર પડી શકે છે. આ તણાવ વચ્ચે ભારતના વિદેશ મંત્રી એસ. જયશંકરે ઈરાન, કતાર અને યુએઈ (UAE) ના વિદેશ મંત્રીઓ સાથે ફોન પર વાતચીત કરી છે. ભારતનો પ્રયાસ છે કે ઊર્જા પુરવઠો કોઈપણ અવરોધ વગર ચાલુ રહે. જોકે ઈરાને ભારતીય જહાજોને પસાર થવાની મંજૂરી આપી છે, પરંતુ વધતો જતો તણાવ ભારત માટે ચિંતાનો વિષય છે.
