વેનેઝુએલામાં સદીનો સૌથી વિનાશક ભૂકંપ: કાટમાળ નીચે જિંદગીની શોધ, મૃત્યુઆંક 188

Venezuela Earthquake: કુદરત ક્યારેક એવો પ્રહાર કરે છે જે માનવજાતને હચમચાવી મૂકે છે. દક્ષિણ અમેરિકાના દેશ વેનેઝુએલામાં બુધવારે સાંજે આવેલા બે શક્તિશાળી ભૂકંપે ભારે તબાહી મચાવી છે. આ ભૂકંપ છેલ્લા 100 વર્ષ કરતાં પણ વધુ સમયમાં વેનેઝુએલામાં આવેલો સૌથી ભયાનક ભૂકંપ ગણાવાઈ રહ્યો છે. ગુરુવાર સુધીમાં સત્તાવાર આંકડા મુજબ મૃત્યુઆંક 188 પર પહોંચી ગયો છે, જ્યારે 200થી વધુ લોકો હજુ પણ ધરાશાયી થયેલી ઇમારતોના કાટમાળ નીચે ફસાયેલા હોવાની આશંકા છે. આ આંચકા એટલા પ્રચંડ હતા કે તેના આંચકા છેક બ્રાઝિલના એમેઝોન સુધી અનુભવાયા હતા.

અમેરિકાએ વેનેઝુએલા પરના પ્રતિબંધો હટાવ્યા

આ કટોકટીની સ્થિતિમાં કાટમાળ નીચે દબાયેલા લોકોને બચાવવા માટે સ્થાનિક લોકો અને બચાવ ટીમો સમય સામે રેસ લગાવી રહી છે. આ દરમિયાન આંતરરાષ્ટ્રીય સ્તરે પણ મોટી હલચલ જોવા મળી છે. વેનેઝુએલા પર અનેક આર્થિક પ્રતિબંધો લગાવનાર અમેરિકાએ 23 ઓક્ટોબર સુધી વેનેઝુએલા પરના કેટલાક આર્થિક પ્રતિબંધો હટાવવાની જાહેરાત કરી છે, જેથી ભૂકંપ રાહત કાર્યો માટે થતી નાણાકીય લેવડદેવડમાં કોઈ અવરોધ ન આવે.

કાટમાળ વચ્ચે લાચારી અને આક્રંદ

ઉત્તર વેનેઝુએલાના શહેરોમાં અત્યારે ચારેય તરફ ચીસાચીસ અને આક્રંદનો માહોલ છે. ધૂળ અને લોહીથી લથપથ બાળકો, નાગરિકો અને પાલતુ પ્રાણીઓને કાટમાળમાંથી બહાર કાઢવામાં આવી રહ્યા છે. કાટમાળ વચ્ચે જિંદગીની શોધ કેટલી આકરી છે તેનું વર્ણન કરતા લા ગ્વાયરાના નિવૃત્ત શિક્ષક જુઆન આલ્બર્ટો મેન્ડાનોએ જણાવ્યું કે, તેઓ કાટમાળમાંથી પસાર થઈ રહ્યા હતા ત્યારે એક મૃતદેહની બાજુમાં જ એક મહિલા ફસાયેલી હતી અને મદદ માટે હાથથી ઈશારો કરી રહી હતી. તેમણે કહ્યું કે, ભગવાન તેને શક્ય તેટલી વહેલી તકે બહાર કાઢે. જ્યારે અમે તેની ચીસ સાંભળી, ત્યારે અમે કંઈ કરી શકીએ તેમ નહોતા.

કુદરતી આફત પાછળનું વૈજ્ઞાનિક કારણ અને તબાહીના આંકડા

આ ભૂકંપ કેમ આટલો વિનાશક સાબિત થયો તે અંગે બ્રાઝિલના જીઓલોજિકલ સર્વેના સંશોધક માર્કોસ ફેરેરાએ જણાવ્યું કે, માત્ર એક મિનિટના ગાળામાં બે મોટા આંચકા આવ્યા અને તેમની ઊંડાઈ ઓછી હતી. આ 'વન-ટુ પંચ' જેવી સ્થિતિ હતી. જેમ કોઈ એક વ્યક્તિ બૂમ પાડે અને તરત જ બીજી વ્યક્તિ પણ બૂમ પાડવા લાગે, તો અવાજ પ્રચંડ થઈ જાય છે, બરાબર તેમ જ આ બંને ભૂકંપે ધ્રુજારીના વેગને બમણો કરી દીધો અને વિનાશ વધી ગયો.

વેનેઝુએલા માટે આ કુદરતી આફત એવા સમયે આવી છે જ્યારે દેશ પહેલેથી જ રાજકીય અને આર્થિક કટોકટીમાંથી પસાર થઈ રહ્યો છે. આ વર્ષની શરૂઆતમાં જ અમેરિકાના સૈન્ય ઓપરેશનમાં તત્કાલીન પ્રમુખ નિકોલાસ માદુરોની ધરપકડ બાદ, જાન્યુઆરીમાં પૂર્વ ઉપપ્રમુખ ડેલ્સી રોડ્રિગ્ઝે કાર્યકારી પ્રમુખ તરીકે સત્તા સંભાળી હતી. ડેલ્સી રોડ્રિગ્ઝ માટે આ ભૂકંપ સૌથી મોટો પડકાર છે. તેમણે લા ગ્વાયરાને "ડિઝાસ્ટર ઝોન" જાહેર કર્યો છે અને ભારે બાંધકામ મશીનરી ધરાવતી કંપનીઓને બચાવ કાર્યમાં મદદ કરવા અપીલ કરી છે.

વૈશ્વિક મદદ અને ભવિષ્યની ચિંતા

મુખ્ય એરપોર્ટ બંધ હોવા છતાં, વિશ્વભરમાંથી મદદનો પ્રવાહ શરૂ થઈ ગયો છે. મેક્સિકો, કતાર, બ્રાઝિલ, સ્પેન, પોર્ટુગલ અને કેનેડા જેવા દેશોએ ડ્રોન, સ્નિફર ડોગ્સ, તબીબી સામગ્રી અને એરપ્લેન મોકલ્યા છે.

શાળાઓ અને ટ્રાન્સપોર્ટ સેવાઓ ઠપ

હાલમાં કારાકાસ જેવા મોટા શહેરોમાં પણ મેટ્રો સેવા અને નેચરલ ગેસનો સપ્લાય બંધ કરી દેવાયો છે. શાળાઓને આશ્રયસ્થાનમાં ફેરવી દેવામાં આવી છે. લોકો પોતાના સ્વજનોને શોધવા માટે હાથમાં ફોટા લઈને ફરી રહ્યા છે.