રશિયાના દરિયામાં ઉતર્યું સોવિયેત યુગનું સૌથી ખતરનાક ન્યૂક્લિયર શિપ, નાટો દેશોમાં ફફડાટ!

Russian Nuclear Cruiser Admiral Nakhimov Returns : રશિયાનું 28 હજાર ટનનું ન્યૂક્લિયર ક્રૂઝર 'એડમિરલ નખિમોવ' (Admiral Nakhimov) આશરે 30 વર્ષ પછી સમુદ્રમાં પરત ફર્યું છે. હાઇપરસોનિક જિર્કોન અને કેલિબર મિસાઇલોથી સજ્જ આ યુદ્ધ જહાજ નાટો (NATO) દેશો માટે મોટો ખતરો બની ગયું છે. સોવિયેત યુગના આ સૌથી ખતરનાક શિપને સંપૂર્ણપણે અપગ્રેડ કરવામાં આવ્યું છે. હવે આ રશિયન નેવીનું નવું ફ્લેગશિપ બનશે, જેનાથી આર્ક્ટિક ક્ષેત્રમાં રશિયાની તાકાતમાં ધરખમ વધારો થશે.

28 હજાર ટનનું વિશાળ જહાજ

સમુદ્રમાં રશિયાએ પોતાનું સૌથી મોટું અને ખૂંખાર યુદ્ધ જહાજ ઉતારી દીધું છે. 28 હજાર ટનનું આ વિશાળ ન્યૂક્લિયર ક્રૂઝર આશરે ત્રણ દાયકા પછી ફ્રન્ટલાઇન સર્વિસમાં પરત ફર્યું છે. તેને આર્ક્ટિકમાં નાટોના મુખ્ય દરિયાઈ માર્ગો પાસે તૈનાત કરવામાં આવ્યું છે, જેનાથી નાટો દેશોની ઊંઘ હરામ થઈ ગઈ છે. સોવિયત સંઘના પતન પછી રશિયન નેવીનો આ સૌથી મોટો મોર્ડનાઇઝેશન પ્રોગ્રામ છે. આ જહાજ હવે રશિયાના નોર્ધન ફ્લીટના હેડક્વાર્ટર સેવેરોમોર્સ્ક પહોંચી ગયું છે. આ કોઈ સામાન્ય જહાજ નથી, પરંતુ હાઇપરસોનિક મિસાઇલો અને આધુનિક હથિયારોથી સજ્જ એક ચાલતો-ફરતો કિલ્લો છે, જે એકલું જ દુશ્મનના આખા કાફલાને તબાહ કરવાની ક્ષમતા ધરાવે છે.

30 વર્ષ પછી સમુદ્રમાં કેવી રીતે પરત ફર્યું આ ખૂંખાર રશિયન યુદ્ધ જહાજ?

રશિયન નેવીનું આ યુદ્ધ જહાજ છેલ્લે 1997માં સમુદ્રમાં જોવા મળ્યું હતું. ત્યારબાદ તેને ઉત્તરી રશિયાના સેવેરોડવિન્સ્કમાં એક ડ્રાય ડોકમાં રાખવામાં આવ્યું હતું. 1990નો દાયકો રશિયન નેવી માટે ખૂબ જ મુશ્કેલ હતો. ફંડની ભારે અછતને કારણે ઘણા યુદ્ધ જહાજોને નિવૃત્ત કરવા પડ્યા હતા, પરંતુ 'એડમિરલ નખિમોવ'ને ભંગારમાં બદલવાને બદલે રિપેર કરવાનો નિર્ણય લેવાયો. વર્ષ 2014માં તેનું અપગ્રેડેશન કાર્ય શરૂ થયું. આશરે એક દાયકાની સખત મહેનત પછી, આ જહાજ 2025માં ટ્રાયલ્સ માટે સમુદ્રમાં ઉતર્યું હતું. આ પ્રોજેક્ટ ખૂબ લાંબો અને પડકારજનક હતો, પરંતુ હવે તે રશિયન નેવીનું નવું ફ્લેગશિપ બનવા માટે સંપૂર્ણપણે તૈયાર છે.

'એડમિરલ નખિમોવ'ને સોવિયેત નૌસેનાનું સૌથી મોટું હથિયાર કેમ કહેતા હતા?

આ કીરોવ ક્લાસનું ન્યૂક્લિયર બેટલ ક્રૂઝર છે, જેને ખાસ કરીને સોવિયત નેવી માટે બનાવવામાં આવ્યું હતું. તેનું નિર્માણ મે 1983માં લેનિનગ્રાડમાં શરૂ થયું હતું, અને 30 ડિસેમ્બર 1988ના રોજ તેને સોવિયત નેવીમાં સામેલ કરાયું હતું. ત્યારે તેનું નામ ‘કલિનિન’ રાખવામાં આવ્યું હતું, જે 1992માં બદલીને 19મી સદીના મહાન રશિયન કમાન્ડરના નામ પરથી ‘એડમિરલ નખિમોવ’ કરવામાં આવ્યું. કોલ્ડ વોર (શીત યુદ્ધ) દરમિયાન આ નેવીનું સૌથી ખતરનાક સરફેસ શિપ ગણાતું હતું. તેમાં 20 પી-700 ગ્રેનિટ લોન્ગ-રેન્જ એન્ટી-શિપ ક્રૂઝ મિસાઇલો લાગેલી હતી, જેની રેન્જ આશરે 400 કિલોમીટર હતી, અને તે ન્યૂક્લિયર વોરહેડ પણ લઈ જઈ શકતી હતી. તેનું મુખ્ય કામ નાટોના કેરિયર સ્ટ્રાઇક ગ્રુપ્સનો શિકાર કરવાનું હતું.

અપગ્રેડ થયા પછી આ ન્યૂક્લિયર ક્રૂઝર નાટો માટે કાળ કેવી રીતે બનશે?

અપગ્રેડેશન પહેલાં આ માત્ર કોલ્ડ વોર યુગનું એક મિસાઇલ ક્રૂઝર હતું, જે જૂની સિસ્ટમ પર નિર્ભર હતું. પરંતુ હવે તેના વેપન, સેન્સર અને પ્રોપલ્શન સહિત બધું જ નવું, અને આધુનિક ટેકનોલોજીથી સજ્જ કરવામાં આવ્યું છે. હવે આ જહાજ મલ્ટિપલ મિશન પાર પાડી શકે છે. તેમાં નવા વર્ટિકલ લોન્ચ સેલ્સ લગાવવામાં આવ્યા છે, રડાર અને નેવિગેશન સિસ્ટમને ડિજિટલ કરવામાં આવી છે, અને તેના બંને ન્યૂક્લિયર રિએક્ટરને નવું જીવન મળ્યું છે. ન્યૂક્લિયર પ્રોપલ્શનને કારણે તેની રેન્જ અસિમિત થઈ ગઈ છે, અને તે સમુદ્રમાં 59 કિલોમીટર પ્રતિ કલાકની ટોપ સ્પીડથી સતત ચાલી શકે છે.

હાઇપરસોનિક જિર્કોન અને કેલિબર મિસાઇલો તેને કેટલી ખતરનાક બનાવે છે?

આ જહાજની સૌથી મોટી તાકાત તેની નવી મિસાઇલો છે. તેમાં કુલ 80 લોન્ચ સેલ્સ ધરાવતી 10 યુનિવર્સલ વર્ટિકલ લોન્ચ સિસ્ટમ મોડ્યૂલ છે, જેમાંથી સબસોનિક કેલિબર ક્રૂઝ મિસાઇલ અને સુપરસોનિક ઓનિક્સ એન્ટી-શિપ મિસાઇલ દાગી શકાય છે. તેનું સૌથી ઘાતક હથિયાર હાઇપરસોનિક જિર્કોન ક્રૂઝ મિસાઇલ છે, જેને રોકવી કોઈપણ એર ડિફેન્સ માટે અશક્ય છે. એર ડિફેન્સ માટે તેમાં ફોર્ટ-એમ સિસ્ટમ (96 વર્ટિકલ લોન્ચ સેલ્સ) અને છ પેન્ટિર-એમ નેવલ એર-ડિફેન્સ સિસ્ટમ જોડવામાં આવી છે, જે દુશ્મનના એરક્રાફ્ટ અને ડ્રોન્સને આસાનીથી તોડી પાડી શકે છે.

આ મહાવિનાશક ક્રૂઝરથી રશિયન નેવીની તાકાત કેટલી વધશે?

'એડમિરલ નખિમોવ'ની વાપસીથી રશિયન નેવીની તાકાત અનેક ગણી વધી જશે. લાંબા સમયથી જૂના જહાજો અને નવા નિર્માણમાં થતા વિલંબથી નબળી પડી રહેલી બ્લૂ-વોટર ફ્લીટની ખામી હવે પૂરી થશે. આ દુનિયાના સૌથી ભારે હથિયારોથી સજ્જ સરફેસ કોમ્બેટન્ટ્સમાંથી એક છે, જે આર્ક્ટિક અને નોર્થ એટલાન્ટિકમાં મોસ્કોની સૈન્ય હાજરીને મજબૂત કરશે. હવે નાટો દેશોએ સમુદ્રમાં કોઈપણ પગલું ભરતા પહેલાં હજાર વાર વિચારવું પડશે.