'ભારતીયોના આવવાથી અમેરિકાને ખુબ ફાયદો થયો', H-1B વિઝા અને ઇમિગ્રેશન પર બોલ્યા મસ્ક

Elon Musk on H-1B Visa: અમેરિકામાં H-1B વિઝા પર ચાલી રહેલી ચર્ચા વચ્ચે ટેસ્લાના સીઈઓ ઇલોન મસ્કે એક મહત્ત્વપૂર્ણ નિવેદન આપ્યું છે. તેમણે જણાવ્યું હતું કે પ્રતિભાશાળી ભારતીયોથી અમેરિકાને ઘણો ફાયદો થયો છે. તેમણે અમેરિકામાં ટેકનોલોજી અને ઇનોવેશનને આકાર આપવામાં ઇમિગ્રન્ટ પ્રતિભાની ભૂમિકાને સ્વીકારી છે.

ભારતીયોથી અમેરિકાને ઘણો ફાયદો થયો: મસ્ક

ઇલોન મસ્કે વૈશ્વિક કંપનીઓમાં ટોચના હોદ્દા પર ભારતીય મૂળના લોકોની હાજરીનો પણ ઉલ્લેખ કર્યો. તેમણે કહ્યું કે, 'પશ્ચિમી કંપનીઓમાં અમારા બધા સીઈઓ ભારતીય મૂળના છે.' બ્રોકરેજ ફર્મ ઝેરોધાના સહ-સ્થાપક નિખિલ કામથ સાથેના પોડકાસ્ટમાં મસ્કે કહ્યું, 'અમેરિકા લાંબા સમયથી વિશ્વભરના ઇન્ટેલિજેન્ટ લોકોને આકર્ષિત કરે છે, જેના કારણે ભારતમાં સ્થળાંતર પણ થયું છે. મને લાગે છે કે પ્રતિભાશાળી ભારતીયો અમેરિકા આવતા હોવાથી અમેરિકાને ઘણો ફાયદો થયો છે. ભારતીય મૂળના ઘણા સીઈઓ પશ્ચિમી કંપનીઓમાં ઉચ્ચ હોદ્દા પર છે.'

આ પણ વાંચો: ટ્રમ્પ દુનિયાને આપશે મોટો ઝટકો! અમેરિકામાં વિદેશીઓની એન્ટ્રી પર પ્રતિબંધ મૂકવાની તૈયારી, ખુદ આપ્યો સંકેત

H-1B વિઝા અને ઇમિગ્રેશન પર ટ્રમ્પનો મત

મંગળવારે (25 નવેમ્બર, 2025), વ્હાઇટ હાઉસે H-1B વિઝા પર ડોનાલ્ડ ટ્રમ્પના વિચારનો બચાવ કરતા કહ્યું હતું કે, 'આ બાબતે રાષ્ટ્રપ્રમુખનો દ્રષ્ટિકોણ સંતુલિત અને સામાન્ય સમજ પર આધારિત છે.' વ્હાઇટ હાઉસના પ્રેસ સચિવ કેરોલિન લેવિટે જણાવ્યું હતું કે, 'ટ્રમ્પ શરૂઆતમાં ફક્ત વિદેશી કામદારોને જ આવવા દેશે, જેથી મોટી કંપનીઓ જ્યારે અમેરિકામાં નવી ફેક્ટરીઓ સ્થાપશે ત્યારે તેઓ કામ શરૂ કરી શકે, પરંતુ ત્યારબાદ તે જગ્યાઓ પર ફક્ત અમેરિકન કામદારોને જ રોજગારી આપવામાં આવશે.'

તેમણે કહ્યું હતું કે, 'ઘણા લોકોએ રાષ્ટ્રપ્રમુખના વિચારને સમજી નથી શક્યા. ટ્રમ્પે વિદેશી કંપનીઓને સ્પષ્ટપણે કહ્યું છે કે જો તેઓ અમેરિકામાં રોકાણ કરે છે, તો તેમણે ફક્ત અમેરિકનોને જ નોકરી પર રાખવા પડશે. ટ્રમ્પે કાયદેસર ઇમિગ્રેશનને ટેકો આપ્યાના થોડા દિવસો પછી જ આ નિવેદન આવ્યું છે, જેમાં તેમણે કહ્યું હતું કે તેઓ હજારો વિદેશી કામદારોને ટેક-સંબંધિત ઉદ્યોગોમાં અમેરિકન કામદારોને તાલીમ આપવા માટે આવકારશે.'

'વિદેશી વર્કફોર્સ અમેરિકનોને કમ્પ્યુટર ચિપ્સ બનાવતા શીખવશે'

એરિઝોનામાં મોટી કમ્પ્યુટર ચિપ ફેક્ટરી ખોલવા માટે અબજો ડોલર ખર્ચ કરતી કંપનીઓના ઉદાહરણનો ઉલ્લેખ કરીને ટ્રમ્પે કહ્યું કે, 'તેઓ ફક્ત બેરોજગાર લોકોની ભરતી કરીને આવી ફેક્ટરીઓ ચલાવી શકતા નથી. તેમને શરૂઆતમાં હજારો નિષ્ણાતો લાવવાની જરૂર પડશે, અને તેઓ આનું સ્વાગત કરે છે. વિદેશી વર્કફોર્સ આપણા લોકોને કમ્પ્યુટર ચિપ્સ અને અન્ય ઉત્પાદનો કેવી રીતે બનાવવા તે શીખવશે.' ટ્રમ્પે સ્વીકાર્યું કે આ અભિગમ તેમના સમર્થકો તરફથી કેટલીક ટીકા તરફ દોરી શકે છે.

આ પણ વાંચો: અમેરિકામાં ફરી અંધાધૂંધ ગોળીબાર: કેલિફોર્નિયામાં બર્થડે પાર્ટીમાં હુમલો, 4ના મોત, 10 ઈજાગ્રસ્ત

ટ્રમ્પ-મસ્કના સંબંધોમાં ખટાશ

ઇલોન મસ્કે અમેરિકન રાષ્ટ્રપ્રમુખની ચૂંટણી દરમિયાન ટ્રમ્પને સંપૂર્ણ ટેકો આપ્યો હતો અને વિવિધ સ્થળોએ તેમના માટે પ્રચાર કર્યો હતો. તેઓ ટ્રમ્પ સાથે પ્રચારમાં જોડાયા હતા અને "મેક અમેરિકા ગ્રેટ અગેઇન" ના સૂત્રને સમર્થન આપ્યું હતું. ટ્રમ્પ વહીવટના શરૂઆતના દિવસોમાં મસ્ક ડિપાર્ટમેન્ટ ઓફ ગવર્નમેન્ટ એફિશિયન્સી (DOGE) નો સૌથી જાહેર ચહેરો બન્યા હતા. થોડા દિવસો પછી તેમની મિત્રતામાં તિરાડ પડી ગઈ, અને તેમણે તે પદ છોડી દીધું. ત્યારબાદ મસ્ક અને ટ્રમ્પ જાહેરમાં એકબીજા પર પ્રહારો કરી રહ્યા હતા.