Russia-India Strategic Partnership 2026: વૈશ્વિક સ્તરે વધી રહેલા ભૌગોલિક-રાજકીય તણાવ અને અમેરિકાની પ્રતિબંધોની ધમકીઓ વચ્ચે ભારત અને રશિયાની વ્યૂહાત્મક ભાગીદારી વધુ ગાઢ બની રહી છે. ભારતમાં રશિયાના રાજદૂત ડેનિસ અલિપોવે સ્પષ્ટ કર્યું છે કે રશિયા ભારતની વધતી જતી વૈશ્વિક ભૂમિકાનું સંપૂર્ણ સમર્થન કરે છે અને કોઈપણ અવરોધ વિના ભારતની ઊર્જા તેમજ સંરક્ષણ જરૂરિયાતો પૂરી કરવા કટિબદ્ધ છે.
"ભારત જેટલું માંગશે એટલું ઓઇલ આપીશું"
પશ્ચિમ એશિયામાં ચાલી રહેલા સંઘર્ષ છતાં રશિયાએ ભારતને ઊર્જા ક્ષેત્રે મોટી ખાતરી આપી છે. રાજદૂત અલિપોવે જણાવ્યું કે રશિયા ભારતની જરૂરિયાત મુજબ કાચું ઓઇલ અને LPG સપ્લાય કરવા તૈયાર છે. તેમણે અમેરિકા અને યુરોપને 'અવિશ્વસનીય ભાગીદાર' ગણાવ્યા અને આક્ષેપ કર્યો કે પ્રતિબંધોની ધમકીઓ આપીને અમેરિકા ભારત-રશિયાના સંબંધોમાં નુકસાનકારક ભૂમિકા ભજવી રહ્યું છે. છેલ્લા એક મહિનામાં રશિયાથી ભારતની ઓઇલ આયાતમાં મોટો ઉછાળો જોવા મળ્યો છે.
સંરક્ષણ ક્ષેત્રે મોટી અપડેટ: S-400 અને SU-57
ભારત અને રશિયા વચ્ચેના ઐતિહાસિક સંરક્ષણ સંબંધોમાં નવા આયામો ઉમેરાઈ રહ્યા છે. S-400 વાયુ રક્ષા પ્રણાલીના બાકી રહેલા જથ્થા ટૂંક સમયમાં ભારતને સોંપવામાં આવશે. રશિયાએ પુષ્ટિ કરી છે કે ભારત તેના પાંચમી પેઢીના અત્યાધુનિક લડાયક વિમાન SU-57માં રસ દાખવી રહ્યું છે. બ્રહ્મોસ મિસાઇલ અને AK-203 રાઇફલ્સનું સંયુક્ત ઉત્પાદન બંને દેશોના સફળ સહયોગનું ઉદાહરણ છે.
આર્થિક લક્ષ્યાંક અને રાષ્ટ્રીય ચલણનો ઉપયોગ
બંને દેશો આર્થિક મોરચે પણ ઝડપથી આગળ વધી રહ્યા છે. ભારત અને રશિયા વચ્ચે દ્વિપક્ષીય વેપારને 100 અબજ ડૉલર સુધી લઈ જવાનું લક્ષ્ય નિર્ધારિત કરવામાં આવ્યું છે. અમેરિકન ડૉલર પરની નિર્ભરતા ઘટાડતા હવે 95% વેપાર બંને દેશોની રાષ્ટ્રીય મુદ્રામાં (રૂપિયા-રૂબલ) થઈ રહ્યો છે. રશિયા ઇચ્છે છે કે ભારત તરફથી કૃષિ ઉત્પાદનો, મશીનરી અને હાઇ-ટેક ચીજોની નિકાસ વધે જેથી વેપાર ખાધ સંતુલિત કરી શકાય.
રાજદ્વારી મુલાકાતો અને બ્રિક્સ 2026
સપ્ટેમ્બર 2026માં ભારતની અધ્યક્ષતામાં યોજાનાર બ્રિક્સ (BRICS) શિખર સંમેલનમાં ભાગ લેવા રાષ્ટ્રપતિ પુતિન ભારત આવે તેવી શક્યતા છે. આ વર્ષે વડાપ્રધાન નરેન્દ્ર મોદી રશિયાની મુલાકાત લે તેવી પણ તૈયારીઓ ચાલી રહી છે.
