'અમારું વિઝન હિન્દ મહાસાગરને અવસરોનું મહાસાગર બનાવવાનું..', સેશેલ્સથી PM મોદીનો સંદેશ

PM Modi Seychelles Visit : વડાપ્રધાન નરેન્દ્ર મોદીને સેશેલ્સ દેશે પોતાના સર્વોચ્ચ સન્માન 'ગાર્ડિયન ઓફ ધ બ્લૂ હોરાઇઝન' (Guardian of the Blue Horizon)થી સન્માનિત કર્યા છે. આ પુરસ્કાર તેમને પર્યાવરણના રક્ષણ અને વિશ્વમાં ટકાઉ વિકાસને પ્રોત્સાહન આપવા માટે આપવામાં આવ્યો છે. પોતાની મુલાકાત દરમિયાન PM મોદીએ સેશેલ્સ દેશની સંસદને પણ સંબોધન કર્યુ, સાથેજ નાનકડા એવા દેશમાં 50 વર્ષમાં આવેલા બદલાવોને પણ બિરદાવ્યા, અને ભારત-સેશેલ્સના 50 વર્ષ જૂના સબંધોને પણ યાદ કર્યા.

હિંદ મહાસાગર માટે પીએમ મોદીનો મોટો સંદેશ
પોતાની સેશેલ્સ મુલાકાત દરમિયાન વડાપ્રધાને એક ખૂબ જ સુંદર અને સ્પષ્ટ સંદેશ આપ્યો હતો. તેમણે કહ્યુ કે, 'ભારત એવા હિંદ મહાસાગરની કલ્પના કરે છે, જ્યાં દરિયાઈ સુરક્ષાની સાથે આર્થિક સમૃદ્ધિ પણ વધે. જ્યાં આપણી ભાગીદારી કદ (આકાર) પર નહીં, પરંતુ પરસ્પર સન્માન અને વિશ્વાસ પર આધારિત હોય. અને જ્યાં આપણે દરેક દેશ માત્ર આજુબાજુમાં નહીં, પણ સાથે-સાથે ચાલીએ. અમારું વિઝન હિંદ મહાસાગરને તકોનો મહાસાગર બનાવવાનો છે.'

'ગાર્ડિયન ઓફ ધ બ્લુ હોરાઇઝન' સન્માન
વડાપ્રધાન મોદીને રવિવારે સેશેલ્સના રાષ્ટ્રપતિ પેટ્રિક હર્મિની દ્વારા 'ગાર્ડિયન ઓફ ધ બ્લૂ હોરાઇઝન' ની માનદ ઉપાધિથી સન્માનિત કરવામાં આવ્યા હતા. વડાપ્રધાન મોદીને કોઈપણ વિદેશી રાષ્ટ્ર દ્વારા આપવામાં આવેલું આ 34મું આંતરરાષ્ટ્રીય સન્માન છે. વડાપ્રધાન મોદી શનિવારે આ દ્વીપસમૂહ દેશ સેશેલ્સ પહોંચ્યા છે, જ્યાં તેઓ દેશના રાષ્ટ્રીય દિવસની સુવર્ણ જયંતી ઉજવણીમાં મુખ્ય અતિથિ તરીકે ભાગ લઈ રહ્યા છે.

PM મોદીનો સોશિયલ મીડિયા પર સંદેશ

સોશિયલ મીડિયા પર પોતાનો સંદેશ શેર કરતા PM મોદીએ લખ્યું કે, 'હું નમ્રતાપૂર્વક આ સન્માનનો સ્વીકાર કરું છું, અને તેને તે તમામ દેશોને સમર્પિત કરું છું, જેઓ આબોહવા પરિવર્તન (ક્લાઈમેટ ચેન્જ) ના પડકારનો સામનો કરી રહ્યા છે, અને પર્યાવરણ સંરક્ષણને આવનારી પેઢીઓ પ્રત્યેની પોતાની જવાબદારી માને છે. આ એક ગંભીર પડકાર છે, જેનો આપણે સાથે મળીને સામનો કરવો પડશે.' વડાપ્રધાને જણાવ્યું હતું કે, ભારત, 'પૃથ્વીને વધુ હરિયાળી અને ટકાઉ બનાવવા માટે તમામ શક્ય યોગદાન આપવા તૈયાર છે. આ આપણી વિવિધ સ્થાનિક નીતિઓ, 'મિશન લાઈફ' પર આપવામાં આવી રહેલા વિશેષ ભાર અને આંતરરાષ્ટ્રીય સૌર ગઠબંધન (આઈએસએ), આપત્તિ-પ્રતિરોધક ઈન્ફ્રાસ્ટ્રક્ચર માટે ગઠબંધન જેવી વૈશ્વિક પહેલોમાં આપણી સક્રિય ભૂમિકાથી સ્પષ્ટ થાય છે.' ઉલ્લેખનીય છે કે, આ જ મહિને વડાપ્રધાન મોદીને સ્લોવાકિયાની રાજધાની બ્રાતિસ્લાવામાં દેશના સર્વોચ્ચ નાગરિક સન્માન 'ધ ઓર્ડર ઓફ ધ વ્હાઇટ ડબલ ક્રોસ (ફર્સ્ટ ક્લાસ)' થી પણ સન્માનિત કરવામાં આવ્યા હતા.