યુદ્ધ વચ્ચે ઈઝરાયલનો ખેલ, ઈરાન જોતું રહ્યું, UAEમાં ઘાતક લેઝર હથિયાર અને સૈનિકો કર્યા તહેનાત

Middle East Conflict: મિડલ ઈસ્ટમાં ઇરાન અને અમેરિકા-ઇઝરાયલ વચ્ચે ચાલી રહેલા ભીષણ યુદ્ધની વચ્ચે એક અત્યંત મહત્ત્વપૂર્ણ અને શાંત ઘટના સામે આવી છે. ઈઝરાયલે તેના મિત્ર દેશ યુએઈ (UAE)ને ઇરાની હુમલાઓથી બચાવવા માટે વિશ્વની સૌથી અદ્યતન લેસર શસ્ત્ર પ્રણાલી 'આયર્ન બીમ' ગુપ્ત રીતે તહેનાત કરી હોવાના અહેવાલ છે.

યુએઈને ઇઝરાયલી હથિયારોનું સુરક્ષા કવચ

ઇરાનના મિસાઇલ અને ડ્રોન હુમલાઓને ખાળવા માટે ઇઝરાયલે માત્ર આયર્ન બીમ જ નહીં, પરંતુ સંરક્ષણ સાધનોનો આખો કાફલો યુએઈને પૂરો પાડ્યો છે.

•આયર્ન બીમ: ઇઝરાયલની સૌથી અદ્યતન લેસર સંરક્ષણ પ્રણાલી.

•આયર્ન ડોમ: વિશ્વ વિખ્યાત મિસાઇલ ઇન્ટરસેપ્ટર સિસ્ટમ.

•સ્પેક્ટ્રો સર્વેલન્સ ડિવાઇસ: આ સાધન 20 કિલોમીટર દૂરથી ઇરાની ડ્રોનને શોધી કાઢવાની ક્ષમતા ધરાવે છે.

•ગુપ્ત માહિતી: ઇરાન દ્વારા છોડવામાં આવતી ટૂંકા અંતરની મિસાઇલો અંગેની ચોક્કસ ઇન્ટેલિજન્સ માહિતી પણ ઇઝરાયલે શેર કરી હતી.

ઇઝરાયલી સૈનિકોની તહેનાતી

આ સંરક્ષણ સહયોગમાં સૌથી ચોંકાવનારી બાબત એ છે કે ઇઝરાયલે માત્ર શસ્ત્રો જ નહીં, પરંતુ તેના સંચાલન માટે પોતાના ડઝનબંધ સૈનિકોને પણ યુએઈમાં મોકલ્યા હતા. સૂત્રોના જણાવ્યા અનુસાર, બંને દેશો વચ્ચેના સંરક્ષણ સંબંધોમાં આ અત્યાર સુધીનું સૌથી મોટું અને અભૂતપૂર્વ પગલું માનવામાં આવે છે.

પરીક્ષણ હેઠળના શસ્ત્રોનો યુદ્ધમાં ઉપયોગ

યુદ્ધની ઝડપી ગતિને જોતા, ઇઝરાયલે તેના કેટલાક એવા શસ્ત્રો પણ યુએઈ પહોંચાડ્યા હતા જે હજુ પ્રોટોટાઇપ પરીક્ષણના તબક્કામાં હતા. આ સિસ્ટમો ઇઝરાયલની પોતાની રડાર સિસ્ટમ સાથે સંપૂર્ણ સંકલિત નહોતી, તેમ છતાં યુએઈએ ઇરાનના મોટાભાગના હુમલાઓને નિષ્ફળ બનાવવા માટે આ પ્રણાલીઓનો અસરકારક ઉપયોગ કર્યો હતો.

શા માટે ઇરાને યુએઈને નિશાન બનાવ્યું?

28મી ફેબ્રુઆરી, 2026ના રોજ અમેરિકા અને ઇઝરાયલે ઇરાન પર હુમલા કર્યા બાદ ઇરાને વળતો પ્રહાર કર્યો હતો. ઇરાને યુએઈ પર 500થી વધુ બેલિસ્ટિક મિસાઇલો અને આશરે 2,000 ડ્રોન છોડ્યા હતા. યુએઈને નિશાન બનાવવાનું મુખ્ય કારણ 2020માં ઇઝરાયલ સાથે થયેલા ઐતિહાસિક મિત્રતા કરાર (Abraham Accords) હોવાનું માનવામાં આવે છે.

ઉલ્લેખનીય છેકે, ઇઝરાયલના આ સુરક્ષા કવચને કારણે યુએઈ ઇરાનના ભયાનક હુમલાઓ સામે પોતાની રક્ષા કરવામાં સફળ રહ્યું છે.