સાઉદીની ઓઈલ પાઈપલાઈન પર ડ્રોન હુમલાનું ઈરાકે શોધી કાઢ્યું લૉન્ચ પેડ, હવે સામે આવશે સમગ્ર નેટવર્ક?

Saudi oil pipeline drone attack: સાઉદી અરેબિયાની ઈસ્ટ-વેસ્ટ ઓઈલ પાઈપલાઈન પર થયેલા ડ્રોન હુમલાની તપાસમાં ઈરાકી સુરક્ષા દળોને મોટી સફળતા મળી છે. સુરક્ષા દળોએ ડ્રોન લૉન્ચ પેડ અને સંબંધિત ઉપકરણો કબજે કરીને તપાસ તેજ કરી દીધી છે. સાઉદી અરેબિયાની અત્યંત મહત્વપૂર્ણ તેલ પાઈપલાઈનને નિશાન બનાવીને કરાયેલા ડ્રોન હુમલાના મૂળ સુધી પહોંચવા માટે ઈરાકે મોટું પગલું ભર્યું છે. ઈરાને એ સ્થળ શોધી કાઢ્યું છે, જ્યાંથી ડ્રોન ઉડાડીને સાઉદી અરેબિયાની ઈસ્ટ-વેસ્ટ ઓઈલ પાઈપલાઈન પર હુમલો કરવામાં આવ્યો હતો. આ કાર્યવાહી બાદ હુમલા પાછળ સક્રિય નેટવર્કને લઈને તપાસ વધુ તીવ્ર બની છે. ઈરાક સરકારે સ્પષ્ટ કર્યું છે કે, તે પોતાની ધરતીનો ઉપયોગ કોઈ અન્ય દેશ વિરુદ્ધ હુમલા કરવા માટે નહીં થવા દે.

ઈન્ટેલિજન્સ બાતમીના આધારે લૉન્ચ સાઈટ સુધી પહોંચી ટીમ

ઈરાકની સિક્યોરિટી મીડિયા સેલના પ્રમુખ લેફ્ટનન્ટ જનરલ સાદ માને જણાવ્યું કે, ગુપ્તચર અને સુરક્ષા એજન્સીઓની સંયુક્ત ટીમે આ બાબતે કામ કર્યું હતું. ચોક્કસ માહિતી એકત્ર કર્યા બાદ ટીમે એ જગ્યા ટ્રેક કરી લીધી હતી, જ્યાંથી ડ્રોન લૉન્ચ કરવામાં આવ્યા હોવાનું માનવામાં આવે છે. સુરક્ષા દળોએ સ્થળ પર પહોંચીને ડ્રોન લૉન્ચિંગ સિસ્ટમ અને ઉપકરણો પોતાના કબજામાં લીધા છે. જોકે, ઈરાકી અધિકારીઓએ હજુ સુધી એ સ્પષ્ટ કર્યું નથી કે, લૉન્ચ સાઈટ પર કયા લોકો હાજર હતા અથવા આ હુમલામાં કયા ચોક્કસ સંગઠનની ભૂમિકા હતી.

સાઉદી અરેબિયા સાથે સતત સંપર્કમાં ઈરાક

ઈરાકે આ બાબતને માત્ર પોતાનો આંતરિક સુરક્ષાનો મુદ્દો નથી માન્યો. સાઉદી અરેબિયાની સુરક્ષા એજન્સીઓ સાથે સીધા સંપર્કમાં રહીને હુમલા અંગેની તમામ માહિતી શેર કરવામાં આવી રહી છે. સાદ માને જણાવ્યું કે, ઈરાકી અધિકારીઓ સાઉદી અધિકારીઓ સાથે સતત વાટાઘાટો કરી રહ્યા છે, જેથી કરીને ભવિષ્યમાં આવી ઘટનાઓ અટકાવી શકાય અને સુરક્ષા સહયોગ વધારી શકાય. આ ઘટનાક્રમ એટલા માટે પણ મહત્વપૂર્ણ છે, કારણ કે સાઉદી અરેબિયાની ઈસ્ટ-વેસ્ટ પાઈપલાઈન દેશના તેલ ઈન્ફ્રાસ્ટ્રક્ચરનો મુખ્ય આધાર છે. આ પાઈપલાઈન પરના હુમલાની અસર માત્ર સુરક્ષા પૂરતી સિમિત નથી રહેતી, પરંતુ વૈશ્વિક ઓઈલ સપ્લાય અને પ્રાદેશિક બજાર પર પણ તેની સીધી અસર પડે છે.

ઈરાકની જમીનને હુમલાનો અડ્ડો બનવા નહીં દઈએ

આ ઘટના બાદ ઈરાકે પોતાની સાર્વભૌમત્વ અને સુરક્ષા નીતિ અંગે કડક સંદેશ આપ્યો છે. સાદ માને કહ્યું કે, દેશની નીતિ 'પ્રિવેન્ટિવ સાર્વભૌમત્વ' (Preventive Sovereignty) ની છે. તેમના જણાવ્યા મુજબ, ઈરાકની જવાબદારી માત્ર પોતાની સીમાઓની અંદર થતા હુમલા રોકવાની નથી, પરંતુ પોતાની જમીનનો ઉપયોગ કોઈ અન્ય દેશ પર હુમલો કરવા માટે ન થાય તે સુનિશ્ચિત કરવાની પણ છે. ઈરાક કોઈ પ્રોક્સી વોર (Proxy War) માં ઘસડાવા માંગતું નથી.

પ્રાદેશિક તણાવ વચ્ચે વધી ચિંતા

સાઉદી ઓઈલ પાઈપલાઈનને નિશાન બનાવવાની આ ઘટના એવા સમયે સામે આવી છે, જ્યારે પશ્ચિમ એશિયા (મિડલ ઈસ્ટ) માં વિવિધ જૂથો વચ્ચે તણાવ સતત વધી રહ્યો છે. હવે સૌથી મોટો સવાલ એ છે કે, કબજે કરાયેલા લૉન્ચ સાધનો અને ઈન્ટેલિજન્સ વિગતોના આધારે તપાસકર્તાઓ હુમલાખોરો સુધી કેટલી ઝડપથી પહોંચી શકે છે.