Iran US War Ceasefire: અમેરિકા અને ઈરાન વચ્ચે બીજા તબક્કાની વાતચીતને લઈને સ્થિતિ ડામાડોળ જણાઈ રહી છે, પરંતુ આ દરમિયાન અમેરિકન રાષ્ટ્ર પ્રમુખ ડોનાલ્ડ ટ્રમ્પે સકારાત્મક સંકેતો આપ્યા છે. તેમણે કહ્યું કે વાતચીતને લઈને 'ગુડ ન્યૂઝ' છે અને શક્યતા છે કે શુક્રવારે મંત્રણા થઈ શકે છે. બીજી તરફ ઈરાને ટ્રમ્પના આ દાવાને ફગાવી દીધો છે.
શુક્રવારે મંત્રણા માટે રાજી થશે ઈરાન?
આ નિવેદન એવા સમયે આવ્યું છે જ્યારે સ્થિતિ અત્યંત તણાવપૂર્ણ છે. સીઝફાયર પર અસંમતિ, દરિયાઈ અથડામણ અને રાજદ્વારી ગતિરોધ સતત યથાવત છે. ટ્રમ્પના આ સંકેતને સંભવિત રાજદ્વારી પ્રગતિ તરીકે જોવામાં આવી રહ્યો છે, જો કે હજુ સુધી કોઈ સત્તાવાર કાર્યક્રમ કે એજન્ડાની પુષ્ટિ થઈ નથી. સ્થિતિ હજુ પણ નાજુક બનેલી છે, પરંતુ જો શુક્રવારે મંત્રણા થાય છે તો તે તણાવ ઘટાડવાની દિશામાં એક મહત્વનું પગલું સાબિત થઈ શકે છે.
શાંતિ મંત્રણા પર ટ્રમ્પનો નવો દાવો, ઈરાને કહ્યું, ખોટું છે, કોઈ યોજના નથી
અમેરિકા અને ઈરાન વચ્ચે બીજા તબક્કાની શાંતિ મંત્રણાને લઈને વિરોધાભાસી સંકેતો સામે આવી રહ્યા છે, જેનાથી સ્થિતિ વધુ ગૂંચવાઈ ગઈ છે. New York Postના રિપોર્ટ અનુસાર, શાંતિ મંત્રણા આગામી 36 થી 72 કલાકની અંદર શરૂ થઈ શકે છે, જેનાથી એવી આશા જન્મી છે કે રાજદ્વારી પ્રયાસો ફરી પાટા પર આવી શકે છે. પરંતુ બીજી તરફ ઈરાને આ દાવાઓને સરેઆમ ફગાવી દીધા છે. IRGC સાથે જોડાયેલી એજન્સી તસનીમ ન્યૂઝે સોશિયલ મીડિયા પ્લેટફોર્મ પર પોસ્ટ કરતા કહ્યું કે રાષ્ટ્ર પ્રમુખ ટ્રમ્પનો સીઝફાયર વધારવાનો દાવો ખોટો છે અને હાલમાં શુક્રવાર સુધી કોઈ પણ મંત્રણાની કોઈ યોજના નથી.
ઈરાન અમેરિકા સાથે વાતચીત કરવા તૈયાર નથી
આ રીતે એક તરફ અમેરિકન પક્ષ વાતચીતને લઈને આશાવાદી સંકેતો આપી રહ્યો છે, જ્યારે ઈરાન ખુલ્લેઆમ ઈનકાર કરી રહ્યું છે. આ વિરોધાભાસ જ આ સમગ્ર સંકટને વધુ જટિલ બનાવી રહ્યો છે, જ્યાં રાજદ્વારી પ્રયાસો અને સંઘર્ષ બંને એકસાથે ચાલતા દેખાઈ રહ્યા છે ડોનાલ્ડ ટ્રમ્પે New York Post સાથેની વાતચીતમાં આ નિવેદન એવા સમયે આપ્યું, જ્યારે તેમણે આ અગાઉ ઈરાન સાથે સીઝફાયર લંબાવવાનો નિર્ણય લીધો હતો, જેથી તેહરાનને શાંતિ મંત્રણામાં સામેલ થવા માટે વધારાનો સમય મળી શકે. જો કે આ નિર્ણય પર ઈરાન તરફથી અત્યાર સુધી કોઈ સત્તાવાર પ્રતિક્રિયા આવી નથી.
વેઇટ એન્ડ વોચ!
આ ઘટનાક્રમ એટલા માટે પણ મહત્વનો માનવામાં આવી રહ્યો છે કારણ કે પ્રથમ વખત અમેરિકાએ ઈરાન વિરુદ્ધ પોતાના આગામી પગલાને લઈને કોઈ સ્પષ્ટ સમયમર્યાદા નક્કી કરી નથી. આનાથી સંકેત મળે છે કે વોશિંગ્ટન હાલમાં સૈન્ય દબાણ અને રાજદ્વારી વિકલ્પ બંને ખુલ્લા રાખવા માંગે છે. આ સાથે જ ટ્રમ્પે પોતાની આ વ્યૂહનીતિનો શ્રેય પાકિસ્તાન અને પોતાના નજીકના સલાહકારોને આપ્યો છે, જેઓ આ સમગ્ર સંકટમાં મધ્યસ્થી અને વાતચીતની શક્યતાઓને આગળ વધારવામાં લાગેલા છે. આ સ્થિતિ એક વેઇટ એન્ડ વોચવાળી નીતિને દર્શાવે છે, જ્યાં એક તરફ વાતચીતનો રસ્તો ખુલ્લો રાખવામાં આવ્યો છે, તો બીજી તરફ દબાણ પણ યથાવત છે.
