ભારતનો પ્લાન સફળ! રશિયા-અમેરિકાની નિકાસ ઘટતાં યુરોપમાં વધારી ડીઝલ સપ્લાય

India Becomes Top Diesel Supplier To Europe: મિડલ ઈસ્ટમાં તણાવ અને વૈશ્વિક પુરવઠાની અડચણો વચ્ચે રશિયા અને અમેરિકા તરફથી યુરોપને થતી ડીઝલની સપ્લાય ધીમી પડી છે, ત્યારે ભારત એક મુખ્ય સપ્લાયર તરીકે ઉભરી આવ્યું છે. ઓગસ્ટ 2026 માં બાબ-અલ-મંડેબ સ્ટ્રેટ (Bab el-Mandeb) મારફતે યુરોપ પહોંચેલા કુલ ડીઝલમાંથી લગભગ 60% જથ્થો ભારતીય રિફાઇનરીઓ દ્વારા પૂરો પાડવામાં આવ્યો છે.

યુરોપમાં ભારતીય ડીઝલનો દબદબો

વોર્ટેક્સા (Vortexa) ના તાજેતરના આંકડા અને PTI ના રિપોર્ટ અનુસાર:

મુખ્ય શિપિંગ રૂટ: ઓગસ્ટ મહિનામાં બાબ-અલ-મંડેબ સ્ટ્રેટ દ્વારા દરરોજ લગભગ 2,00,000 બેરલ ડીઝલ કે ગેસ ઓઇલની હેરફેર થઈ હતી, જેમાં ભારતીય હિસ્સો સૌથી વધુ હતો.

વિશ્વનો ચોથો મોટો રિફાઇનર: ભારત વાર્ષિક 258.1 મિલિયન ટનની સ્થાપિત ક્ષમતા સાથે વિશ્વનો ચોથો સૌથી મોટો રિફાઇનર છે. ઘરેલું માગ કરતા વધુ ઉત્પાદન ક્ષમતા હોવાને કારણે ભારત વૈશ્વિક સ્તરે અગ્રેસર બની રહ્યું છે.

નિકાસ આંકડા: નાણાકીય વર્ષ 2025-26 માં ભારતે 61.5 મિલિયન ટન રિફાઇન્ડ પેટ્રોલીયમ ઉત્પાદનોની નિકાસ કરી હતી.

રશિયા અને અમેરિકાની સપ્લાયમાં મોટો ઘટાડો

રશિયા અને અમેરિકાથી યુરોપ જતા ડીઝલના પુરવઠામાં નોંધપાત્ર ઘટાડો નોંધાયો છે.

રશિયન નિકાસમાં કડાકો: ઓગસ્ટના પ્રથમ 25 દિવસમાં રશિયાની દરિયાઈ માર્ગે ડીઝલ નિકાસ ઘટીને સરેરાશ 1,50,000 બેરલ પ્રતિદિન થઈ ગઈ હતી, જે ગયા વર્ષની સરખામણીએ દરરોજ 6,10,000 બેરલ ઓછી છે.

ડ્રોન હુમલાની અસર: રશિયા-યુક્રેન યુદ્ધ દરમિયાન જુલાઈ અને ઓગસ્ટ મહિનામાં જ રશિયન રિફાઇનરીઓ પર લગભગ 32 ડ્રોન હુમલા થયા હતા. 2,60,000 બેરલ પ્રતિદિન ક્ષમતા ધરાવતી 'પર્મ રિફાઇનરી' પરના હુમલા બાદ તેની ક્ષમતા માત્ર 28% જ કાર્યરત રહી ગઈ છે, જેના કારણે રશિયાની નિકાસ ખોરવાઈ ગઈ છે.