'શાંતિ મંત્રણા ઠુકરાવી તો...', ટ્રમ્પ-ઝેલેન્સકીની બેઠક અગાઉ પુતિનની ખુલ્લી ધમકી

Russia vs Ukrain War Updates: યુક્રેન યુદ્ધને લઈને રશિયન પ્રમુખ વ્લાદિમીર પુતિને શનિવારે અત્યંત કડક વલણ અપનાવ્યું હતું. તેમણે સ્પષ્ટપણે કહ્યું કે મોસ્કોને લાગે છે કે કીવ સંઘર્ષને શાંતિપૂર્ણ રીતે ઉકેલવામાં કોઈ ખાસ રસ દાખવી રહ્યું નથી. પુતિને ચેતવણી આપી હતી કે જો કૂટનીતિ નિષ્ફળ રહેશે, તો રશિયા તેના 'વિશેષ સૈન્ય અભિયાન'ના તમામ ઉદ્દેશ્યોને સૈન્ય તાકાત દ્વારા હાંસલ કરશે.

રશિયન સરકારી સમાચાર એજન્સીના અહેવાલ મુજબ, પુતિને કહ્યું, "જો કીવના અધિકારીઓ આ મામલાને શાંતિપૂર્ણ રીતે ઉકેલવા માંગતા નથી, તો અમે અમારી સામે રાખવામાં આવેલા તમામ કાર્યોને વિશેષ સૈન્ય અભિયાન હેઠળ સૈન્ય માધ્યમોથી પૂરા કરીશું." પુતિને એ પણ કહ્યું કે જે નેતૃત્વને તેઓ 'કીવ શાસન' કહે છે, તે શાંતિ સમજૂતીને લઈને કોઈ ઉતાવળ નથી બતાવી રહ્યું.

કીવ પર અત્યાર સુધીનો સૌથી મોટો હુમલો

પુતિનનું આ નિવેદન એવા સમયે આવ્યું છે જ્યારે રશિયાએ રાત્રિભર ચાલેલા હુમલાઓમાં યુક્રેનની રાજધાની કીવ અને આસપાસના વિસ્તારો પર લગભગ 500 ડ્રોન અને 40 મિસાઈલો છોડી હતી. આ ભીષણ હુમલાઓમાં ઓછામાં ઓછા એક વ્યક્તિનું મૃત્યુ થયું છે, જ્યારે લગભગ 27 લોકો ઘાયલ થયા છે. યુક્રેનના પ્રમુખ વોલોદીમિર ઝેલેન્સકીએ કહ્યું કે લગભગ 10 કલાક સુધી ચાલેલો આ હુમલો એ વાતનો સ્પષ્ટ પુરાવો છે કે મોસ્કો ફેબ્રુઆરી 2022માં શરૂ થયેલા યુદ્ધને સમાપ્ત કરવાનો કોઈ ઈરાદો નથી રાખતું.

આ પણ વાંચો: ઈઝરાયલના એક નિર્ણય સાથે દુનિયા બે ભાગમાં વહેંચાઈ! જાણો સોમાલીલેન્ડનો શું છે વિવાદ?

ઝેલેન્સકી અમેરિકન પ્રમુખ ટ્રમ્પને મળશે

આ દરમિયાન, યુક્રેનના પ્રમુખ ઝેલેન્સકી રવિવારે ફ્લોરિડામાં અમેરિકન પ્રમુખ ડોનાલ્ડ ટ્રમ્પ સાથે મુલાકાત કરવાના છે. આ બેઠકમાં લગભગ ચાર વર્ષથી ચાલી રહેલા યુદ્ધને સમાપ્ત કરવાના સંભવિત માર્ગો પર ચર્ચા થવાની અપેક્ષા છે. માનવામાં આવે છે કે વાતચીતમાં સુરક્ષા ગેરંટી અને ડોનેત્સ્ક તથા ઝાપોરિઝ્ઝિયા જેવા પ્રાદેશિક વિવાદો મુખ્ય મુદ્દાઓ હશે.

ટ્રમ્પ સાથેની મુલાકાત પહેલા શનિવારે કેનેડા પહોંચેલા ઝેલેન્સકીએ કહ્યું કે કીવ પર થયેલા તાજા હુમલા શાંતિ વાર્તાને લઈને રશિયાના સાચા ઈરાદા દર્શાવે છે. તેમણે આ હુમલાઓને "શાંતિ માટેના અમારા પ્રયાસોનો રશિયાનો જવાબ" ગણાવ્યા હતા.

લશ્કરી થાણા પર પહોંચ્યા પુતિન

આ નિવેદનો પહેલાં, ક્રેમલિને જણાવ્યું હતું કે પ્રમુખ પુતિને એક રશિયન સૈન્ય કમાન્ડ પોસ્ટની મુલાકાત લીધી હતી, જ્યાં તેમને ચીફ ઓફ જનરલ સ્ટાફ વાલેરી ગેરાસિમોવ અને અન્ય ઉચ્ચ સૈન્ય અધિકારીઓ દ્વારા બ્રીફિંગ આપવામાં આવી હતી. આ મુલાકાત બાદ, રશિયન અધિકારીઓએ યુક્રેનના ડોનેત્સ્ક અને ઝાપોરિઝ્ઝિયા ક્ષેત્રોમાં કેટલાક નગરો પર નિયંત્રણ મેળવી લીધું હોવાનો પણ દાવો કર્યો હતો.