'એ મારા મિત્ર છે, પંગો ના કરતા...', કોનું નામ લઈ ટ્રમ્પે ગલ્ફના દેશોને ચેતવ્યાં?

Donald Trump Recep Tayyip Erdogan : અમેરિકી પ્રમુખ ડોનાલ્ડ ટ્રમ્પે ન્યૂયોર્ક ખાતે મિડલ ઈસ્ટના નેતાઓ સાથેની બેઠક દરમિયાન તૂર્કિયેના પ્રમુખ રેસેપ તૈયપ એર્દોઆનની પ્રશંસા કરી છે. ટ્રમ્પે એર્દોઆનને પોતાના મિત્ર ગણાવતા તેમને 'ટફ કુકી' એટલે કે અત્યંત સખત શખ્સ તરીકે ઓળખાવ્યા હતા. આ સાથે જ ત્યાં ઉપસ્થિત અન્ય ક્ષેત્રીય નેતાઓને ચેતવણી આપતા જણાવ્યું હતું કે એર્દોઆન સાથે ક્યારેય પંગો લેવો નહીં. આ બેઠક દરમિયાન વૈશ્વિક રાજકારણ અને ક્ષેત્રીય મુદ્દાઓ પર ગંભીર ચર્ચા થઈ હતી.

GCC ની બેઠકમાં અનેક વૈશ્વિક નેતાઓની ઉપસ્થિતિ

GCC ની આ મહત્ત્વપૂર્ણ બેઠકમાં ઈરાકના વડાપ્રધાન અલી અલ-જેદ, જોર્ડનના કિંગ અબ્દુલ્લા બીજા, કતરના અમીર શેખ તમીમ બિન હમદ અલ-થાની, સીરિયાના પ્રમુખ અહમદ અલ-શરા સહિત અનેક ક્ષેત્રીય નેતાઓ હાજર રહ્યા હતા. આ બેઠક દરમિયાન જ ટ્રમ્પે એર્દોઆન તરફ ઈશારો કરીને કહ્યું હતું કે તૂર્કિયેથી આવેલા તેમના મિત્ર ખૂબ જ મજબૂત ઈચ્છાશક્તિ ધરાવનાર વ્યક્તિ છે અને તેમની સાથે પંગો લેવો યોગ્ય નથી. આ નિવેદનથી બેઠકમાં એક રસપ્રદ વાતાવરણ સર્જાયું હતું.

ટ્રમ્પની રમુજી ટિપ્પણી અને યોગ્ય ટ્રાન્સલેશનની અપેક્ષા

એર્દોઆનની પ્રશંસા કરતા ટ્રમ્પે મજાકિયા અંદાજમાં કહ્યું હતું કે તેમને સંપૂર્ણ આશા છે કે તેમની આ વાતનું સાચું અને સચોટ ભાષાંતર કરવામાં આવશે. તેમણે ઉમેર્યું હતું કે બેઠકમાં સારો ટ્રાન્સલેટર ઉપસ્થિત હોવો જરૂરી છે. ત્યારબાદ ટ્રમ્પે એર્દોઆનને 'ફેન્ટાસ્ટિક' અને શાનદાર વ્યક્તિ ગણાવ્યા હતા. મિડલ ઈસ્ટમાં ચાલી રહેલા તણાવ અને યુદ્ધની સ્થિતિ વચ્ચે ક્ષેત્રીય દેશો વચ્ચે વાતચીતનો દોર ચાલી રહ્યો છે ત્યારે ટ્રમ્પનું આ નિવેદન ખૂબ જ સૂચક માનવામાં આવે છે.

એર્દોઆનનું નિવેદન: ગલ્ફની મુશ્કેલીઓ જલ્દી દૂર થશે

આ બેઠક બાદ ન્યૂયોર્ક સ્થિત તુર્ક હાઉસની બહાર પત્રકારો સાથે વાતચીત કરતા પ્રમુખ એર્દોઆને સ્પષ્ટ કર્યું હતું કે તૂર્કિયે અને ક્ષેત્રના અન્ય દેશો ગલ્ફ સામે ઊભી થયેલા વિવિધ પડકારોને પહોંચી વળવા માટે સઘન પ્રયાસો કરી રહ્યા છે. એર્દોઆને જણાવ્યું કે આશરે આઠ જેટલા દેશોએ ગલ્ફની મુશ્કેલીઓને વહેલી તકે ઉકેલવા માટે ભાગ લીધો છે. સંયુક્ત રાષ્ટ્ર મહાસભાના 81મા સત્રને સંબોધિત કર્યા બાદ અને અનેક દ્વિપક્ષીય બેઠકો યોજ્યા પછી તેમણે આ નિવેદન આપ્યું હતું, જેના આગામી સમયમાં સકારાત્મક પરિણામો જોવા મળશે.