કેનેડામાં ગૂગલ મેપથી 39 કરોડ વર્ષ જૂની અવકાશી ઘટનાનું રહસ્ય ખૂલ્યું

ઓટ્ટાવા: ગૂગલ મેપના કારણે કેનેડામાં ૩૯ કરોડ વર્ષ પહેલાંની એક ઘટનાનું રહસ્ય ખૂલ્યું છે. વીક એન્ડમાં ફરવાનો પ્લાન કરતાં એક કેનેડિયનને ગૂગલમાં જે ખાડો દેખાયો તે કંઈક અલગ હતો. તેને આ બાબતે જિજ્ઞાાસા થઈ. જાત તપાસ કર્યા પછી એ વ્યક્તિએ સાયન્ટિસ્ટને જાણ કરી ને એમાંથી એક અવકાશી ઘટના પરથી પડદો ઉઠયો હતો. હવે આ આખી ઘટના ગ્લોબલ કોન્ફરન્સમાં રજૂ થવા જઈ રહી છે.
જોયેલ લાપોઈન્ટે નામના એક કેનેડિયને વીક એન્ડમાં ક્યાંક અજાણી જગ્યાએ ફરવાનો પ્લાન બનાવ્યો. તેણે ગૂગલમાં આસપાસના સ્થળો સર્ચ કર્યા. ગૂગલ મેપમાં એ જુદી જુદી જગ્યાઓ એક્સપ્લોર કરતો હતો ત્યારે એક સ્થળે જઈને તેની નજર અટકી ગઈ. કંઈક જુદો જ ખાડો તેને મેપમાં દેખાયો હતો. એની લંબાઈ અજીબ હતી અને દેખાવ પણ જુદો હતો. એ ખાડો જોવા ગયો. તેણે જરૂરી તપાસ કરી તો ખાસ જાણકારી મળી નહીં. ખાડો સ્થાનિક લોકોએ બનાવ્યો હોય એવી પણ કોઈ જાણકારી મળી નહીં.
જોયેલે આ ઘટનાની જાણકારી વિજ્ઞાાનિકોને આપી. પ્રોફેસર જોર્ડન ઓસિન્સ્કી અને ફ્રાન્સના સાયન્ટિસ્ટ જેરોમ ગટ્ટાકેકાએ બીજા એક્સપર્ટ સાથે મળીને આ ઘટનાએ જવાનું નક્કી કર્યું. આસપાસમાં દુર્ગમ જંગલ હતું એટલે ઘણી મુશ્કેલી પડી. આખરે એ સ્થળના સેમ્પલ લીધા. તેનું સઘન નિરીક્ષણ કર્યું તો ખાડો મેન મેડ લાગતો ન હતો. સાયન્ટિફિક પદ્ધતિથી તપાસ કરતાં જણાયું કે આ ખાડો ૩૯ કરોડ વર્ષ પહેલાં એસ્ટ્રોઈડની ટક્કરથી બન્યો હતો.
સ્થાનિક વિસ્તારોમાં જે આદિજાતિ રહેતી હતી તેના પરથી આ ખાડાનું નામ ઉહાચાટિક રાખવામાં આવ્યું છે. હવે સંશોધકો આ ક્રેટરની જાણકારી ગ્લોબલ કાઉન્સિલમાં આપવાના છે. જેને ઉલ્કાપિંડ પણ કહેવાય છે તેની ટક્કરથી પૃથ્વી પર ઘણા સ્થળોએ આવા ખાડા પડયા છે, પરંતુ આ ખાડાની ભાળ જે રીતે મળી તે રસપ્રદ છે. ગૂગલ મેપમાં જોતાં કોઈ વ્યક્તિની જિજ્ઞાાસાના કારણે કરોડો વર્ષ જૂની અવકાશી ઘટનાનો પત્તો મળ્યો હોય એવી આ પહેલી ઘટના છે.