બે દાયકા બાદ પેલેસ્ટાઈનમાં લોકશાહીની કસોટી: ગાઝા-વેસ્ટ બૅન્કમાં ચૂંટણીની જાહેરાત, પરંતુ પડકારો પહાડ જેવા

Palestine Elections 2026 : પેલેસ્ટાઇનમાં આશરે 20 વર્ષ પછી ચૂંટણી થશે. આ વાતની જાહેરાત રાષ્ટ્રપતિ મહમૂદ અબ્બાસે કરી છે. આ જ વર્ષે નવેમ્બર મહિનામાં આ ચૂંટણીઓનું આયોજન કરવામાં આવશે. આ સંદર્ભે રાષ્ટ્રપતિ અબ્બાસ દ્વારા એક વટહુકમ (અધ્યાદેશ) બહાર પાડવામાં આવ્યો છે. તે મુજબ, 28 નવેમ્બર 2026ના રોજ જેરૂસલેમ, વેસ્ટ બૅંક અને ગાઝા પટ્ટી સહિતના તમામ પેલેસ્ટિની વિસ્તારોમાં ચૂંટણી યોજાશે. પેલેસ્ટાઇનના રાષ્ટ્રપતિએ એક ફરમાન દ્વારા પેલેસ્ટાઇનના લોકોને નિર્ધારિત તારીખે પેલેસ્ટાઇન વિધાન પરિષદના સભ્યોને ચૂંટવા માટે મુક્ત અને પ્રત્યક્ષ ચૂંટણીમાં ભાગ લેવા આહ્વાન કર્યું છે.

પેલેસ્ટાઇનમાં યોજાશે વિધાયી ચૂંટણી

માનવામાં આવી રહ્યું છે કે, આ ફરમાનનો ઉદ્દેશ્ય લોકશાહીના પાયાને મજબૂત કરવાનો, અને પેલેસ્ટાઇન રાજ્યમાં શરૂ થયેલી ચૂંટણી પ્રક્રિયાને પૂર્ણ કરવાનો છે. પેલેસ્ટાઇનમાં અંદાજે 20 વર્ષ બાદ આ ચૂંટણી યોજાવા જઈ રહી છે.

20 વર્ષ પહેલા થઈ હતી ચૂંટણી

નોંધનીય છે કે, પેલેસ્ટિની વિસ્તારમાં છેલ્લી વિધાયી ચૂંટણી 2006માં યોજાઈ હતી. તે સમયે હમાસે અબ્બાસની ફતહ પાર્ટીને હરાવીને જીત મેળવી હતી. આ પછી પેલેસ્ટાઇનની રાજનીતિ પર પોતાનું વર્ચસ્વ કાયમ રાખ્યું હતું. અહેવાલો અનુસાર, તે ચૂંટણીમાં હારના કારણે ફતહ પાર્ટીમાં ભાગલા પડ્યા, જેના પરિણામે વર્ષ 2007માં હમાસે ગાઝા પર પોતાનું નિયંત્રણ મેળવી લીધું હતું.

ચૂંટણી પહેલા અનેક પડકારો

નવેમ્બરના અંતમાં ભલે ચૂંટણીની તારીખો જાહેર થઈ ગઈ હોય, પરંતુ પ્રસ્તાવિત ચૂંટણી આગળ વધે, તે પહેલા અનેક અવરોધો પાર કરવા પડશે. સૌથી મહત્ત્વનો પડકાર કબજા હેઠળના પૂર્વી જેરૂસલેમમાં પેલેસ્ટિનીઓની ભાગીદારીનો છે. કારણ કે ઈઝરાયેલે આ જાહેરાત પર હજુ સુધી કોઈ ટિપ્પણી કરી નથી. તમને જણાવી દઈએ કે, પેલેસ્ટાઇનના રાષ્ટ્રપતિ મહમૂદ અબ્બાસ વર્ષ 2005માં 4 વર્ષના કાર્યકાળ માટે ચૂંટાયા હતા, પરંતુ તેઓ હજુ પણ સત્તા પર બનેલા છે. વટહુકમો દ્વારા તેમના લાંબા ગાળાના શાસનની સ્થાનિક અને આંતરરાષ્ટ્રીય નિરીક્ષકો દ્વારા ટીકા કરવામાં આવી છે, જેમણે ભ્રષ્ટાચાર અને સત્તાના દુરુપયોગના આક્ષેપો લગાવ્યા છે.