વુહાનની બદનામ લેબોરેટરીએ પાક. મિલિટ્રી સાથે કર્યો સિક્રેટ કરાર, થઈ શકે છે ભારત વિરૂદ્ધ ઉપયોગ
બેઈજિંગ, તા. 24 જુલાઈ 2020, શુક્રવાર
વુહાનની જે ઈન્સ્ટિટ્યુટને કોરોના વાયરસ માટે જવાબદાર માનવામાં આવે છે તે હવે પાકિસ્તાન સાથે મળીને ચીન, ભારત વિરૂદ્ધ બાયો વોરફેરની રણનીતિ તૈયાર કરશે. એક અહેવાલ પ્રમાણે ચીને પાકિસ્તાની મિલિટ્રી સાથે એક મોટો કરાર કર્યો છે. આ સમજૂતી દ્વારા સંભવિત બાયો વોરની ક્ષમતાને પ્રોત્સાહન આપવા સંશોધન કરવામાં આવશે. આ સમજૂતી ત્રણ વર્ષ માટેની હશે જેમાં ખતરનાક એજન્ટ એન્થ્રેક્સ પર સંશોધન સાથે અન્ય અનેક પ્રોજેક્ટ પર રિસર્ચ કરવામાં આવશે.
વુહાન લેબ પર લાગ્યા અનેક આરોપ
વુહાન ઈન્સ્ટિટ્યુટ ઓફ વાયરોલોજીમાં કોરોના વાયરસ તૈયાર કરવામાં આવ્યો હોવાની વાત માનવા અનેક નિષ્ણાંતો તૈયાર નથી જણાઈ રહ્યા. પરંતુ ચીને જે રીતે આ મહામારીને ડીલ કરી તેના કારણે તેણે વિશ્વભરની ટીકાઓનો સામનો કરવો પડી રહ્યો છે. ક્લાક્સોન વેબસાઈટ તરફથી એન્થોની ક્લૈને આ અહેવાલ તૈયાર કર્યો છે. તેમણે લખ્યું હતું કે વુહાનની આ લેબોરેટરીએ પાકિસ્તાન મિલિટ્રીની ડિફેન્સ સાયન્સ એન્ડ ટેક્નોલોજી ઓર્ગેનાઈઝેશન (ડેસ્ટો) સાથે ડીલ કરી છે. આ ડીલનો ઉદ્દેશ્ય ભવિષ્યમાં આવનારી સંક્રામક બીમારીઓ અંગે સંશોધન કરવા આંતરિક સહયોગ આગળ વધારીને બીમારીઓને બાયોલોજિકલ વિકલ્પ દ્વારા કેવી રીતે ફેલાતી અટકાવાય તેનું સંશોધન કરવાનો છે.
ચીન બહાર થશે ટેસ્ટિંગ
ક્લાક્સોન એક ઓસ્ટ્રેલિયન વેબસાઈટ છે અને એન્થોની ક્લૈન એક ઈન્વેસ્ટિગેટિવ પત્રકાર છે. અહેવાલ પ્રમાણે 'કોવર્ટ' પ્રોજેક્ટ્સને લઈ ઈન્ટેલિજન્સ અધિકારીઓએ ખૂબ જ ચિંતા વ્યક્ત કરી હતી. આ પ્રોજેક્ટમાં ચીન સામેલ થવાની અને બાયોલોજિકલ એજન્ટ્સની ટેસ્ટિંગ ચીનની બહાર થશે. તેનો ઉદ્દેશ્ય આંતરરાષ્ટ્રીય સ્તરે થઈ રહેલી ટીકાઓની આશંકા ઘટાડવાનો છે. ચીને કોરોના જેવા ખતરનાક વાયરસ સાથે જોડાયેલી સંવેદનશીલ જાણકારી છુપાવીને વિશ્વને મુશ્કેલીમાં મુક્યું તેવા આરોપ વચ્ચે આ સમાચાર સામે આવ્યા છે.
પાકિસ્તાની પ્રોજેક્ટને ચીનની મદદ
નિષ્ણાંતોના કહેવા પ્રમાણે વુહાનની લેબને તમામ પ્રકારની નાણાંકીય અને વૈજ્ઞાનિક મદદ પ્રોજેક્ટ દ્વારા મળી રહી હતી. પાકિસ્તાનના પ્રોજેક્ટને પણ ચીન તરફથી સંપૂર્ણ આર્થિક મદદ મળશે. ઈન્ટેલિજન્સ સૂત્રોના અહેવાલ પ્રમાણે ડેસ્ટો પહેલા પણ એન્થ્રેક્સ સાથે સંકળાયેલા આવા પ્રોજેક્ટમાં સામેલ રહ્યું છે. એજન્સી બાયોલોજિકલ વેપન પ્રોગ્રામની આડમાં આવા પ્રોજેક્ટ કરી રહી હતી. ક્લાક્સોનના અહેવાલ પ્રમાણે ચીન-પાકિસ્તાનના આ પ્રોજેક્ટ અંતર્ગત દરેક પ્રકારના ટેસ્ટ પૂરા કરી લેવાયા છે. આ ટેસ્ટ દ્વારા બેલિલસ થૂરિંગજેનસિસ (બીટી)ને અલગ કરવાનું કામ કરવામાં આવ્યું છે. આ એક એન્થ્રેક્સ જેવું જ એજન્ટ છે. વુહાન લેબોરેટરી તરફથી પાકિસ્તાનને બીટી માટે રી-એજન્ટ્સ સપ્લાય કરવામાં આવ્યા છે.
ભારત પર વધી રહ્યું છે જોખમ
આ પ્રોજેક્ટમાં ચીન સામેલ થયું તેના પર ભારત ખૂબ નજર રાખી રહ્યું છે. તે સિવાય પશ્ચિમી દેશોની કેટલીક ઈન્ટેલિજન્સ એજન્સીઓ પણ તેના પર નજર રાખી રહી છે. તેમના મતે ચીન પાકિસ્તાનને સામેલ કરીને ભારત વિરૂદ્ધ પોતાનો એજન્ડા આગળ વધારવા સંપૂર્ણ પ્રયત્ન કરી રહ્યું છે. આ પ્રોજેક્ટમાં તે ખાસ રસ લઈ રહ્યું છે તે તેની માનસકિતા છતી કરે છે. ચીન-પાકિસ્તાનના આ પ્રોજેક્ટે ક્રિમિયન-કોંગો હોમોરેજિક ફીવર વાયરસ (સીસીએચએફવી) પર પહેલા જ કેટલાક પ્રયોગ કરી લીધા છે. આ વાયરસ ઈબોલા વાયરસ જેવો જ છે અને તેના કારણે 25 ટકા મૃત્યુ થયેલા છે. પાકિસ્તાનની જે લેબમાં પ્રયોગ થઈ રહ્યા છે તે બાયો સેફ્ટી લેવલ-4 સુરક્ષા વ્યવસ્થાથી સજ્જ નથી.
