'ઓપરેશન સિંદૂરમાં પાકિસ્તાની એરફોર્સને અમે મદદ કરી હતી..', ચીને પહેલીવાર સત્ય સ્વીકાર્યું

China Confirms Technical Support to Pakistan : ચીને પહેલીવાર સત્તાવાર રીતે સ્વીકાર્યું છે કે ગયા વર્ષે ભારત અને પાકિસ્તાન વચ્ચે થયેલા યુદ્ધ દરમિયાન તેણે પાકિસ્તાની વાયુસેનાને ઓન-સાઇટ ટેકનિકલ સહાય પૂરી પાડી હતી. ચીની સરકારી બ્રોડકાસ્ટર CCTV પર પ્રસારિત એક ઇન્ટરવ્યુમાં, એવિએશન ઇન્ડસ્ટ્રી કોર્પોરેશન ઑફ ચાઇના(AVIC)ના એન્જિનિયરોએ ખુલાસો કર્યો કે તેઓ યુદ્ધ દરમિયાન પાકિસ્તાનમાં હાજર હતા.

ચીની મિસાઇલ અને જેટનો ઉપયોગ

અહેવાલ મુજબ, આ સંઘર્ષ દરમિયાન ચીની બનાવટના J-10CE ફાઇટર જેટે ભારતના ફ્રેન્ચ બનાવટના રાફેલ ફાઇટર જેટને તોડી પાડ્યું હતું. આ પ્રથમ ઘટના છે જ્યારે ચીની બનાવટના આ વિમાને કોઈ દુશ્મન વિમાનને તોડી પાડ્યું હોય અને રાફેલ જેટ પટકાયું હોય. ચીની એન્જિનિયર ઝાંગ હેંગે જણાવ્યું કે, "અમે સપોર્ટ બેઝ પર સતત એર-રેડ સાયરન અને જેટના અવાજો સાંભળતા હતા. મે મહિનામાં 50 ડિગ્રી જેટલી કાળઝાળ ગરમી હોવા છતાં અમારી ટીમ પાકિસ્તાની સેનાને યુદ્ધના મેદાનમાં મદદ કરી રહી હતી."

પાકિસ્તાન અને ચીનનું સંરક્ષણ ગઠબંધન

પાકિસ્તાન હાલમાં ચીન સિવાય J-10C જેટનું સંચાલન કરતો એકમાત્ર દેશ છે. સ્ટોકહોમ ઇન્ટરનેશનલ પીસ રિસર્ચ ઇન્સ્ટિટ્યૂટના ડેટા અનુસાર, 2021થી 2025 વચ્ચે પાકિસ્તાનની 80% શસ્ત્રોની આયાત ચીનમાંથી થઈ છે. J-10CE એ અત્યાધુનિક રડાર સિસ્ટમ અને એર-ટુ-એર મિસાઇલથી સજ્જ છે, જેનો ઉપયોગ ગયા વર્ષના સંઘર્ષમાં ભારત સામે કરવામાં આવ્યો હોવાની પુષ્ટિ હવે ચીને પોતે કરી છે.