ઈઝરાયલમાં 'ટાઈમ મશીન' જેવી 4 લાખ વર્ષ જૂની ગુફા મળી, માનવ સભ્યતાના ખુલશે રહસ્યો

400000 year old cave Israel: ઉત્તરી ઈઝરાયલના ફોરિડિસ વિસ્તારમાં વૈજ્ઞાનિકોને એક ખૂબ જ મોટી સફળતા મળી છે. અહીં સંશોધકોને આશરે 4 લાખ વર્ષ જૂની એક રહસ્યમય ગુફા મળી આવી છે, જે આટલા લાંબા સમયથી સંપૂર્ણપણે સીલ હતી. આ ગુફા માનવ ઇતિહાસની એક અદ્ભુત 'ટાઇમ કેપ્સૂલ' સમાન છે, કારણ કે તેમાં આટલા વર્ષોથી કોઈ પણ પ્રકારની માનવીય દખલગીરી થઈ નથી.

ઈઝરાયલ એન્ટિક્વિટીઝ ઓથોરિટી અને હાઇફા યુનિવર્સિટીના સંશોધકો દ્વારા હાલમાં અહીં ઉત્ખનનનું કામ કરવામાં આવી રહ્યું છે. આ ગુફા આશરે 4 લાખથી 2.5 લાખ વર્ષ જૂની હોવાનું માનવામાં આવે છે. આ પ્રોજેક્ટને આર્કિયોલોજિસ્ટ કોબી વર્ડી, અમિત ગબાય અને પ્રોફેસર રોન લીડ કરી રહ્યા છે. તાજેતરના દાયકાઓની આ સૌથી મોટી પુરાતત્વીય શોધ માનવામાં આવી રહી છે, જે માનવ વિકાસના એવા યુગ પરથી પડદો ઉઠાવશે જેના વિશે અત્યાર સુધી ખૂબ જ મર્યાદિત માહિતી ઉપલબ્ધ હતી.

માનવ ઇતિહાસ માટે શા માટે ખાસ છે આ રહસ્યમય ગુફા?

આ રહસ્યમય ગુફા લોઅર પેલિયોલિથિક યુગના અંતિમ ભાગ એટલે કે 'અચ્યુલો-યબરુડિયન કલ્ચર' (Achelo-Yabrudian Culture) સાથે જોડાયેલી હોવાનું સામે આવ્યું છે. રિસર્ચર્સના જણાવ્યા અનુસાર, આ ગુફા એટલી શાનદાર સ્થિતિમાં છે કે તે એક સાચા ટાઇમ કેપ્સૂલની જેમ કામ કરી રહી છે, જેનાથી એવી દુર્લભ માહિતી મળી શકે છે જે વિશ્વમાં અન્ય ક્યાંયથી મળવી મુશ્કેલ છે. આ એ સમયગાળો હતો જ્યારે પૃથ્વી પર નિએન્ડરથલ અને આધુનિક માનવીઓ (હોમો સેપિયન્સ)નો ફેલાવો થયો ન હતો. આ સમયગાળો મનુષ્યોની રહેણીકરણી અને પર્યાવરણ સાથેના તાલમેલમાં આવેલા એક બહુ મોટા વૈશ્વિક બદલાવનો સાક્ષી રહ્યો છે.

4 લાખ વર્ષ પહેલાં પણ મનુષ્યોનું સામાજિક માળખું હતું વિકસિત

પ્રોફેસર રોનના જણાવ્યા મુજબ, આ એ જ યુગ હતો જ્યારે મનુષ્યોએ એક જગ્યાએ લાંબો સમય રોકાવાનું અને મોટા સમૂહો (સોશિયલ સ્ટ્રક્ચર) બનાવવાનું શરૂ કર્યું હતું. ગુફામાંથી મળેલા પુરાવા દર્શાવે છે કે તે સમયે લોકો આગનો ભરપૂર ઉપયોગ કરતા હતા અને તેમનું સામાજિક માળખું ઘણું જટિલ અને વિકસિત થવા લાગ્યું હતું. તેઓ લાંબા સમય સુધી ગુફાઓમાં સાથે રહેતા હતા, જે સાબિત કરે છે કે તેમની વચ્ચે પરસ્પર સહયોગ ખૂબ ઊંચા સ્તરનો હતો. આ લોકો પોતાની કમ્યુનિટીમાં પોતાના જ્ઞાન અને કૌશલ્યને એક પેઢીથી બીજી પેઢી સુધી પહોંચાડતા હતા. આ જ પાયાના પરિવર્તનોએ આગળ જતાં હોમો સેપિયન્સ એટલે કે આધુનિક માનવીના વિકાસનો પાયો નાખ્યો હતો.

ગુફાની અંદરથી મળ્યા હથિયારો અને જાનવરોના અવશેષો

વૈજ્ઞાનિકોને આ ખોદકામ દરમિયાન ગુફામાંથી અનેક ચોંકાવનારી વસ્તુઓ મળી આવી છે. જેમાં ચકમક પથ્થર (Flint)માંથી બનેલા ખાસ પ્રકારના હથિયારો સામેલ છે, જે તે સમયના હિસાબે ખૂબ જ એડવાન્સ માનવામાં આવે છે. આર્કિયોલોજિસ્ટ્સે ખૂબ જ બારીકાઈથી તૈયાર કરાયેલી નાની કુહાડીઓ, સ્ક્રેપર અને કટીંગ બ્લેડ મોટી સંખ્યામાં શોધી કાઢ્યા છે. આ સિવાય ગુફામાંથી ઘોડા, હરણ અને જંગલી ગધેડા જેવા પ્રાણીઓના હાડકાં પણ મળી આવ્યા છે. આ પુરાવાઓની સાથે આસપાસ પાણી હોવાના સંકેતો પણ મળ્યા છે, જેના કારણે જ શિકારી સમૂહો આ જગ્યા તરફ આકર્ષાયા હોવા જોઈએ.

શું સામાન્ય લોકો પણ જોઈ શકશે આ ઐતિહાસિક ગુફા?

આર્કિયોલોજિસ્ટ કોબી વર્ડીએ આ અદભુત શોધની સરખામણી યુનેસ્કોની વર્લ્ડ હેરિટેજ સાઇટ 'નાહલ મેરોટ' સાથે કરી છે, જે પ્રાગૈતિહાસિક કાળના અભ્યાસ માટે ખૂબ મહત્ત્વની માનવામાં આવે છે. ઈઝરાયલ એન્ટિક્વિટીઝ ઓથોરિટી ટૂંક સમયમાં જ આ ગુફા પર એક મોટો રિસર્ચ પ્રોગ્રામ શરૂ કરવા જઈ રહી છે, જેથી તે સમયના લોકોની જીવનશૈલી અને સંસાધનોના ઉપયોગ વિશે વિગતવાર માહિતી મેળવી શકાય. આ વૈજ્ઞાનિક અભ્યાસ અને સંશોધન પ્રક્રિયા પૂર્ણ થયા બાદ, સંબંધિત સંસ્થાઓ આ 4 લાખ વર્ષ જૂની રહસ્યમય ગુફાને સામાન્ય લોકો માટે ખુલ્લી મૂકવાની તૈયારી કરશે, જેથી લોકો માનવ વિકાસની આ અદ્ભુત સફરને નજીકથી નિહાળી શકે.