અમદાવાદ: મોટેરામાં હિટ એન્ડ રને યુવકનો ભોગ લીધો, જનપથ ક્રોસ રોડ પર 3 મિત્રોને અડફેટે લેનાર કાર ચાલક ઝડપાયો
Summarized by AI; it may make mistakes. Check important info
Summarized by AI; it may make mistakes. Check important info
Hit-and-Run Accident Incident : અમદાવાદના જનપથ ચાર રસ્તા પાસે મોડી રાત્રે એક ભયાનક અકસ્માત સર્જાયો હતો. જેમાં પૂરઝડપે આવતી એક ફોર વ્હીલર કારના ચાલકે બેદરકારીપૂર્વક ગાડી ચલાવી ત્રણ મિત્રો સવારે એક્ટિવાને જોરદાર ટક્કર મારી હતી. આ ગમખ્વાર અકસ્માતમાં 21 વર્ષીય આશાસ્પદ યુવકનું મોત નીપજ્યું છે, જ્યારે તેની પાછળ બેઠેલા અન્ય બે મિત્રોને ગંભીર ઈજાઓ પહોંચી છે. ઘટનાને પગલે સ્થાનિક પોલીસે ગુનો નોંધી કાયદેસરની કાર્યવાહી હાથ ધરી છે.
મોટેરામાં હિટ એન્ડ રને યુવકનો ભોગ લીધો
આ અકસ્માત અંગે સાબરમતી વિસ્તારમાં આવેલી ન્યૂ રેલવે કોલોનીમાં રહેતા 47 વર્ષીય હિતેન્દ્રભાઈ કાંતિલાલ પટેલે એલ ટ્રાફિક પોલીસ સ્ટેશનમાં ફરિયાદ નોંધાવી છે. ફરિયાદ મુજબ, હિતેન્દ્રભાઈનો 21 વર્ષીય પુત્ર અંકિતકુમાર પટેલ તેના બે મિત્રો જસવંતકુમાર ઠાકોર (ઉં.વ.16) અને ગૌતમ પ્રદિપભાઇ સોલંકી (ઉં.વ.19) સાથે પોતાના એક્ટિવા પર જઈ રહ્યો હતો. ગત રાત્રે 1:30 વાગ્યાની આસપાસ જ્યારે તેઓ જનપથ ચાર રસ્તા પસાર કરી રહ્યા હતા, ત્યારે કાળ બનીને આવેલી એક કારે તેમને અડફેટે લીધા હતા, જેમાં હિતેન્દ્રભાઈએ પોતાના એકના એક પુત્રને ગુમાવ્યો છે.
વિગતવાર ઘટના મુજબ, 08 મેના રોજ રાત્રે 1:30 વાગ્યે કારના ચાલકે ગફલતભરી રીતે ગાડી ચલાવી એક્ટિવાને પાછળથી ટક્કર મારી હતી. આ અકસ્માતમાં અંકિતકુમારનું મોત નીપજ્યું હતું અને તેના બંને મિત્રો લોહીલુહાણ હાલતમાં ઘાયલ થયા હતા. અકસ્માત સર્જીને કાર ચાલક ઘટનાસ્થળેથી ફરાર થઈ ગયો હતો. જોકે, પોલીસે ત્વરિત કાર્યવાહી કરતા અદાણી શાંતિગ્રામમાં રહેતા 24 વર્ષીય આરોપી વેદાંત અમિત ગૌતમને આજે શુક્રવારે બપોરે 2:00 વાગ્યે તેની કાર સાથે ઝડપી પાડ્યો છે. પોલીસ દ્વારા આરોપી વિરુદ્ધ ગુનો દાખલ કરી આગળની તપાસ શરૂ કરવામાં આવી છે.
