T20 વર્લ્ડ કપની ફાઈનલ અગાઉ ટિકિટોની કાળાબજારી, અમદાવાદમાં સ્ટેડિયમ બહાર યુવક પકડાયો

World Cup Final Ticket Black Marketing: આગામી 8મી માર્ચ, 2026ના રોજ અમદાવાદના નરેન્દ્ર મોદી સ્ટેડિયમ ખાતે ભારત અને ન્યૂઝીલેન્ડ વચ્ચે ICC T-20 વર્લ્ડકપ-2026ની હાઈવોલ્ટેજ ફાઈનલ મેચ રમાવાની છે. આ ઐતિહાસિક મુકાબલાને લઈને ક્રિકેટ પ્રેમીઓમાં ભારે ઉત્સાહ જોવા મળી રહ્યો છે. જોકે, આ ઉત્સાહનો ગેરફાયદો ઉઠાવીને ટિકિટોનું કાળાબજાર કરતા તત્ત્વો સામે પોલીસ અત્યારે એક્શન મોડમાં આવી છે.

ચાંદખેડામાં સ્ટેડિયમ પાસે ટિકિટ વેચતા યુવકને પોલીસે ઝડપી લીધો

મોટેરા સ્ટેડિયમ બહાર ટિકિટોના કાળાબજાર થઈ રહ્યા હોવાની બાતમીના આધારે LCB ઝોન-2ની ટીમે વોચ ગોઠવી હતી. આ દરમિયાન ચાંદખેડા વિસ્તારમાં આવેલા સ્ટેડિયમ પાસેથી ટિકિટો વેચતા એક યુવકને પોલીસે રંગેહાથ ઝડપી પાડ્યો હતો. પોલીસે આ યુવક વિરુદ્ધ કાયદેસરની કાર્યવાહી હાથ ધરી છે અને કાળાબજારના આ નેટવર્કમાં અન્ય કોઈ સામેલ છે કે કેમ તે દિશામાં તપાસ તેજ કરી છે.

બાતમી મળતા જ LCBની ટીમે સ્ટેડિયમ પાસે ગોઠવી હતી ગુપ્ત વોચ

અમદાવાદના ચાંદખેડા વિસ્તારમાં LCB ઝોન-2ની ટીમ જ્યારે પેટ્રોલીંગમાં હતી, ત્યારે તેમને ચોક્કસ બાતમી મળી હતી કે મોટેરા સ્ટેડિયમ પાસે એક શખ્સ ઓનલાઇન બુક કરેલી ટિકિટો અત્યંત ઊંચા ભાવે વેચી રહ્યો છે. આ બાતમીના આધારે પોલીસે તાત્કાલિક વોચ ગોઠવી હતી અને સ્ટેડિયમ બહારથી જ આરોપીને કાળાબજાર કરતા રંગેહાથ ઝડપી લીધો હતો.

આ પણ વાંચો: વડોદરાના આજવામાં કોલેજિયન યુવતીને ઘરે કપડાં ધોવા બોલાવી યુવકે આચર્યું દુષ્કર્મ

2,000ની મૂળ કિંમતની ટિકિટ 11,000માં વેચતો હતો શખ્સ

પોલીસ તપાસમાં પકડાયેલા આરોપીની ઓળખ વાસણામાં રહેતા વંશ હિરલકુમાર શાહ તરીકે થઈ છે. પોલીસે આરોપી પાસેથી ભારત અને ન્યૂઝીલેન્ડ વચ્ચેની ફાઈનલ મેચની કુલ 2 ટિકિટો જપ્ત કરી છે. ચોંકાવનારી વિગત એ સામે આવી છે કે, આ શખ્સ માત્ર 2,000ની મૂળ કિંમત ધરાવતી એક ટિકિટ 11,000ની અધધ કિંમતે વેચીને ક્રિકેટ પ્રેમીઓને લૂંટી રહ્યો હતો. આ બાબતે મહત્ત્વની કાર્યવાહી કરતા ચાંદખેડા પોલીસે આરોપી સામે ગુનો નોંધી વધુ તપાસ હાથ ધરી છે.