કુડા ચોકડી નજીક ટ્રકની અડફેટે ઇજાગ્રસ્ત મહિલાનું સારવારમાં મોત

ધ્રાંગધ્રા પોલીસ મથક ચાલક વિરૃદ્ધ ફરિયાદ નોંધાઇ

ઇજાગ્રસ્ત મહિલાએ રાજકોટની હોસ્પિટલમાં એક દિવસની ટૂંકી સારવારમાં દમ તોડયા

ધ્રાંગધ્રા -  ધ્રાંગધ્રા હાઈવે પર બેફામ દોડતા ડમ્પર અને ટ્રકે વધુ એક મહિલાનો જીવ લીધો હોવાનું સામે આવ્યું છે. ધ્રાંગધ્રા તાલુકાના નરાળી ગામના ભોપાભાઈ પાટડિયા અને તેમના પત્ની લીલાબેન બંને ગત સોમવારે સવારે બાઈક પર ધ્રાંગધ્રા ખાતે ખરીદી કરવા માટે આવી રહ્યા હતા.

દરમિયાન કુડા ચોકડી પર રોડ ક્રોસ કરવા માટે રાહ જોઈને ઉભા હતા ત્યારે પાછળથી બેફામ આવતા ટ્રકના ચાલકે બાઈકને અડફેટે લેતા લીલાબેનના પગ પર ડમ્પરનું ટાયર ફરી વળતા ગંભીર ઈજાઓ પહોંચી હતી. આ તરફ રાહદારીઓ દ્વારા તાત્કાલિક ૧૦૮ની મદદથી મહિલાએ ધ્રાંગધ્રા હોસ્પિટલ ખસેડી વધુ સારવાર અર્થે સુરેન્દ્રનગર ખસેડવામાં આવ્યા હતા. પરંતુ મહિલાની ઇજાઓ ગંભીર હોવાને લીધે રાજકોટ હોસ્પિટલ ખાતે રીફર કરવામાં આવ્યા હતા. જ્યાં સારવાર દરમિયાન અકસ્માતના એક દિવસ બાદ મહિલાનું મોત નિપજ્યું હતું. જે અંગે મૃતક મહિલાના પતિ ભોપાભાઈ પાટડિયાએ ડમ્પર ચાલક વિરૃદ્ધ ગુનો નોંધાવતા પોલીસે આગળની કાર્યવાહી હાથ ધરી છે.