અપ્રમાણસર મિલકતના કેસમાં વોન્ટેડ પૂર્વ અધિક કલેક્ટર કેતકી વ્યાસની અમદાવાદથી ધરપકડ, ક્રાઇમ બ્રાન્ચે ACBને સોંપી

Ketki Vyas arrested In Ahmedabad: એન્ટી-કરપ્શન બ્યૂરો (ACB) દ્વારા નોંધાયેલા અપ્રમાણસર મિલકતના કેસમાં લાંબા સમયથી વોન્ટેડ આણંદના પૂર્વ નિવાસી અધિક કલેક્ટર (RAC) કેતકી વ્યાસની અમદાવાદ ડિટેક્શન ઓફ ક્રાઈમ બ્રાન્ચ (DCB) દ્વારા અટકાયત કરવામાં આવી છે.

બહેનના ઘરેથી થઈ અટકાયત

હાલમાં સસ્પેન્ડ કરાયેલા વર્ગ-1 ના સિનિયર-સ્કેલ અધિકારી કેતકી વ્યાસને ક્રાઈમ બ્રાન્ચને મળેલી ચોક્કસ બાતમીના આધારે અમદાવાદના બોપલ વિસ્તારમાં આવેલી તેમની બહેનના ઘરેથી ઝડપી લેવામાં આવ્યા હતા. ત્યારબાદ આગળની કાનૂની કાર્યવાહી માટે તેમને ACBને સોંપી દેવામાં આવ્યા છે.

₹3.56 કરોડની અપ્રમાણસર મિલકતનો આરોપ

આવક કરતા 68.84% વધુ સંપત્તિ: ACBના જણાવ્યા અનુસાર, વ્યાસ પર 2012 થી 2023ના સમયગાળા દરમિયાન તેમની કાયદેસરની આવક કરતા ₹3.56 કરોડની વધુ સંપત્તિ (કાયદેસરની આવક કરતા 68.84 ટકા વધુ) ધરાવવાનો આરોપ છે.

હોદ્દાનો દુરુપયોગ: એજન્સીએ આક્ષેપ કર્યો છે કે, કેતકી વ્યાસે સરકારી કર્મચારી તરીકેના હોદ્દાનો દુરુપયોગ કરી ગેરકાયદેસર રીતે મેળવેલા ભંડોળનો પોતાના અને પરિવારના સભ્યોના નામે જંગમ અને સ્થાવર મિલકતોમાં રોકાણ કર્યું હતું. કેસ નોંધાયા બાદથી તેઓ લાંબા સમયથી ફરાર હતા.

હની-ટ્રેપ અને છૂપા કેમેરા કાંડનો વિવાદ

આણંદ જિલ્લામાં RAC તરીકેના કાર્યકાળ દરમિયાન કેતકી વ્યાસ અગાઉ પણ ભારે વિવાદમાં રહ્યા હતા. તત્કાલિન આણંદ કલેક્ટર ડી.એસ. ગઢવીની ઓફિસમાં છૂપો કેમેરો લગાવવામાં આવ્યો હોવાના કેસમાં પોલીસે તેમની અને તત્કાલિન ડેપ્યૂટી મામલતદાર જે.ડી. પટેલ સહિત અન્ય લોકો સામે કાર્યવાહી કરી હતી. આ કેસમાં સરકારી અધિકારીઓને હની-ટ્રેપ અને બ્લેકમેલ કરવાના આક્ષેપો થયા હતા, જેના પગલે જ ACB દ્વારા વ્યાસની આવક અને સંપત્તિની ઉંડાણપૂર્વક તપાસ શરૂ કરવામાં આવી હતી.

હાલમાં અમદાવાદ ACB યુનિટના આસિસ્ટન્ટ ડિરેક્ટર દ્વારા આ કેસની વધુ તપાસ ચલાવવામાં આવી રહી છે.