વડોદરા: પતિ-પત્નીના ઝઘડામાં પોલીસ બની નિશાન, 'થ્રેટ ટુ લાઈફ'નો મેસેજ મળતા સ્થળે પહોંચેલી 122ની ટીમ પર હુમલો

Vadodara Couple Attacks Police Team: વડોદરાના કારેલીબાગ વિસ્તારમાં મોડી રાત્રે હાઈવોલ્ટેજ ડ્રામા સર્જાયો હતો. પતિ-પત્ની વચ્ચે ચાલી રહેલા ઝઘડામાં મધ્યસ્થી કરવા ગયેલી પોલીસ ટીમ પર જ દંપતીએ હુમલો કરી દેતા ચકચાર મચી ગઈ છે. પોલીસે આ મામલે સરકારી ફરજમાં રૂકાવટનો ગુનો નોંધી દંપતી સામે કાયદેસરની કાર્યવાહી હાથ ધરી છે.

શું હતી સમગ્ર ઘટના?

મળતી માહિતી અનુસાર, કારેલીબાગ સ્થિત સંતોષી માતાના મંદિર નજીક રોડ પર એક દંપતી વચ્ચે ઉગ્ર બોલાચાલી થઈ રહી હતી. પત્ની દ્વારા માતા વિશે અપશબ્દો બોલાતા મામલો બિચક્યો હતો. આ દરમિયાન પત્નીએ પોલીસ કંટ્રોલ રૂમ 112 નંબર પર ફોન કરી 'થ્રેટ ટુ લાઈફ' હોવાનો મેસેજ આપ્યો હતો.

મેસેજ મળતા જ કારેલીબાગ પોલીસ સ્ટેશનના લોકરક્ષક જવાન દીપકભાઈ પોતાની ટીમ સાથે તાત્કાલિક લોકેશન પર પહોંચ્યા હતા. પોલીસ જ્યારે બંનેને શાંત પાડવાનો પ્રયાસ કરી રહી હતી, ત્યારે અચાનક જ પતિ-પત્ની પોલીસ સાથે ઝઘડવા લાગ્યા હતા. પોલીસે જ્યારે પતિને પકડવાનો પ્રયત્ન કરી રહી હતી,, ત્યારે પત્નીએ ઉશ્કેરાઈને પોલીસ જવાન પર હુમલો કર્યો હતો.

આ પણ વાંચો: ગુજરાતમાં ન્યાયતંત્ર સામે પડકાર, હાઈકોર્ટમાં 1.74 લાખ જ્યારે નીચલી કોર્ટમાં 19.67 લાખ કેસ પેન્ડિંગ

પોલીસે ગુનો નોંધી તપાસ હાથ ધરી

પોલીસ ટીમે અંતે બંને હુમલાખોરોને કાબૂમાં લઈ પોલીસ સ્ટેશન ખસેડ્યા હતા. આરોપીઓની ઓળખ ધીરજ સરોજ અને તેની પત્ની ઇન્દિરા ધીરજ સરોજ તરીકે થઈ છે. પોલીસે સરકારી કર્મચારીની ફરજમાં રુકાવટ અને હુમલો કરવા બદલ ગુનો નોંધી આગળની તપાસ શરૂ કરી છે.