આગામી ગુરૂવારે વડોદરા શહેરને મળશે નવા મેયર અને ડેપ્યુટી મેયર

Vadodara Corporation : વડોદરા મ્યુનિ.કોર્પોરેશનની સામાન્ય ચૂંટણી-2026માં ચૂંટાયેલા સભાસદની પ્રથમ સામાન્ય સભા આગામી ગુરૂવાર તા.28 મેના રોજ સવારે 11 વાગ્યે વડી કચેરી ખંડેરાવમાર્કેટ સર સયાજીરાવ સભાગૃહ ખાતે યોજાનાર છે. આ બેઠક માટેનો એજન્ડા જાહેર કરાયો છે.

સામાન્ય સભામાં શહેરના નવા મેયર, અને ડેપ્યુટી મેયરની પ્રથમ અઢી વર્ષ માટે ચૂંટણી યોજાશે. સાથે જ સ્થાયી સમિતિના 12 સભ્યોની પણ પ્રથમ અઢી વર્ષ માટે નિયુક્તિ કરાશે. સભાની શરૂઆતમાં ગત્ સામાન્ય સભાની કાર્યવાહીને મંજૂરી અપાશે. ત્યારબાદ મેયર, ડેપ્યુટી મેયર અને સ્થાયી સમિતિના સભ્યોની પસંદગીની પ્રક્રિયા હાથ ધરાશે. ભાજપ હાઈકમાન્ડ કોને મેયર સહિતના પદાધિકારીઓ બનાવે છે તે મુદ્દે રાજકીય મોરચે ગરમી જોવા મળે છે.

 28 મેના રોજ સવારે ભાજપ કાર્યાલય ખાતે ચૂંટાયેલા તમામ કાઉન્સિલરોની બેઠક બોલાવાશે, જેમાં પ્રદેશ તરફથી મોકલવામાં આવેલા નામોનું સીલબંધ મેન્ડેટ ખોલવામાં આવશે, જેના પગલે મેયર સહિતના નામોની સત્તાવાર જાહેરાત કરાશે.

 નવી નિમણૂંકો થયા બાદ સામાન્ય સભાના દિવસે જ સ્થાયી સમિતિની બેઠક પણ યોજાશે. આ દરમિયાન પાલિકાના શાસક પક્ષના નેતા અને દંડકની નિમણૂંક પણ કરી દેવાશે.